Ապօրինի զենք պահելու եւ սեփական ձեռքերով ինքնադատաստանի գնալու հարցը շարունակում է խնդրահարույց ու մտահոգիչ մնալ հասարակության համար: «Ժողովուրդ» օրաթերթի տեղեկություններով` մինչ վանաձորյան սպանդի հայտնի իրադարձությունները` հոկտեմբերի 3-ին, ՀՀ ոստիկանապետի ժամանակավոր պաշտոնակատար Արման Սարգսյանը գաղտնի խորհրդակցություն է անցկացրել եւ կոնկրետ ապօրինի զենք պահելու հարցով խիստ հայտարարություն արել:
Ինչպես հայտնի է, 2019 թվականի սեպտեմբերի 20-ին ՀՀ վարչապետ Նիկոլ Փաշինյանը ոստիկանության աշխատակազմին էր ներկայացրել կառույցի ժամանակավոր պաշտոնակատար նշանակված ոստիկանապետի առաջին տեղակալ Արման Սարգսյանին: Նշանակումից հետո ոստիկանապետի ժամանակավոր պաշտոնակատտարը հանդիպումներ էր ունենում ոստիկանության տարբեր ստորաբաժանումների հետ եւ, ահա, հոկտեմբերի 3-ին ոստիկանապետի ժամանակավոր պաշտոնակատարը հանդիպել է ոստիկանության ղեկավար կազմի հետ եւ կոնկրետ զրույց ունեցել նրանց հետ:
«Ժողովուրդ» օրաթերթին մանրամասներ են հայտնի դարձել փակ գաղտնի այդ խորհրդակցությունից: Մասնավորապես, Արման Սարգսյանը ասել է, որ բոլորը իր համար հավասար են, ոստիկանապետն ու շարքային ոստիկանը, օպերլիազորը հավասար են իր համար եւ ծանոթ-բարեկամ չկա: Ավելին, վերջինս հայտնել է, որ իր բոլոր ընկերները արվեստի մարդիկ են, եւ ինքը ոստիկան բարեկամներ չունի, որ որեւէ մեկի համար միջնորդի կամ առաջ տանի. «Ուստի ով աշխատի, նա էլ կգնահատվի» :
Նկատենք, որ ոստիկանապետի ժամանակավոր պաշտոնակատարը նշել է, եթե ինքը նախարար է, դա չի նշանակում, որ միայն ոստիկանապետերի հետ է աշխատելու, այլ անգամ շարքային ոստիկանին կանչելու է իր մոտ եւ նրան անձամբ է լսելու:
Ի դեպ, Արման Սարգսյանը փակ գաղտնի խորհրդացության ժամանակ բավականին խիստ անդրադարձել է ապօրինի զենքին եւ նշել է, որ պետք է հանցագործներին շատ խիստ պատժենք, իսկ, ահա, ապօրինի զենքի մասով շեշտադրել է, որ ինչքան ապօրինի զենք կա, պետք է հայտնաբերվի:
Ասել է թե` ոստիկանապետի ժամանակավոր պաշտոնակատարը եւս ապօրինի զենք պահելու հարցը համարել է խնդրահարույց: Իսկ ի՞նչ ունենք այսօր:
Մոր հարցը
Մինչ իրավապահ համակարգը խորհրդակցություն է իրականացնում եւ պաքար է տանում ապօրինի զենքերի հայտնաբերման եւ պատասխանատուներին պատասխանատվության կանչելու հարցում, վրեժի ծարավը գտնում է եւ ըստ նպատակի օգտագործում հենց ապօրինի զենքը: Կատարվածի վառ ապացույցը հոկտեմբերի 4-ին տեղի ունեցած սպանդն էր, որի հետեւանքով 3 անձ սպանվեց:
Ինչպես հայտնի է, 2019 թվականի հոկտեմբերի 4-ին` ժամը 23:55-ին, Վանաձորի բժշկական կենտրոնից ոստիկանություն ահազանգ էր ստացվել, որ Վանաձոր քաղաքի Միչուրինի փողոցի տներից մեկը բժիշկների հերթապահ խումբ է մեկնել, որտեղ հայտնաբերվել են երկու երիտասարդի դի: Նույն հասցեից Լոռու մարզի 6 բնակիչներ տարբեր մարմնական վնասվածքներով տեղափոխվել էին Վանաձորի բժշկական կենտրոն, որտեղ եւս մեկ անձ մահացել էր: Այսինքն` մեկ գիշերվա մեջ 3 զոհ:
Արդյունքում, տեղի ունեցած զինված միջադեպից հետո Լոռու մարզային քննչական վարչությունում հարուցվեց քրեական գործ` ՀՀ քրեական օրենսգրքի 104-րդ հոդվածի 2 մասի 1-ին կետով` սպանություն, եւ 235-րդ հոդվածի 1-ին մասի` ապօրինի զենք պահելու հատկանիշներով:
Այսպիսով, իրավապահ համակարգը բացահայտել է Վանաձոր քաղաքում տեղի ունեցած զինված միջադեպը, սակայն հաշվի առնելով 3 անձի սպանելու դրդապատճառները` ընտանեկան եւ խիստ անձնական վրեժխնդրությունը, նախաքննական մարմինը որոշել է կատարվածը չհրապարակայնացնել:
Եվ, ահա, կատարվածից հետո ձերբակալվել է Վանաձոր քաղաքի 1979 թվականին ծնված մեկ անձ, որը իրավապահներին տվել է ինքնախոստովանական ցուցմունք` մատնանշելով` իր իր արարքը անձնական վրեժխնդրության հետ է կապված, եւ իր մոր անվան հարցն էր դրված:
Ավելին, նշենք, որ ինքնադատաստանի արդյունքում սպանված երիտասարդները, ըստ Վանաձորում տարածված լուրերի, ամենեւին էլ աչքի չեն ընկել օրինավոր վարքով, իսկ նրանցից մեկը կրկնակի դատապարտված է եղել:
Քնար Մանուկյան
.gif)
