«Ժողովուրդ» օրաթերթի զրուցակիցը «Միսս Հայաստան 1998», «Միսս ԱՊՀ 1999», «Միսիս գլոբ 2010» տիտղոսակիր գեղեցկուհի Գոհար Հարությունյանն է: Նա անդրադարձել է բնավորության գծերին, տարօրինակություններին, թուլություններին, որոնցից մարդիկ օգտվում են: Գոհարը խոսել է նաեւ իր անվան շուրջ պտտվող ամենազվարճալի բամբասանքի մասին եւ պարզաբանել այն: Գեղեցկուհին խոստովանել է՝ չի հավատում, որ հինգ երեխայի մայր է եւ ինքն իրենից չէր սպասում նման կարգավիճակ:
-Գոհա՛ր, ի՞նչը կարող է մատնել Ձեր տրամադրության մասին:
-Փոքրուց կարմրող եմ եղել, բայց դա ամոթի նշան է: Իսկ տրամադրությանս մասին խոսում է իմ ամբողջ դեմքը. երբեք չեմ կարողանում թաքցնել այն, թե ինչ է կատարվում ներսումս: Զգացողություններս անմիջապես արտացոլվում են դեմքիս:
-Ձեր ամենամեծ տարօրինակությունը ո՞րն եք համարում:
-Շատ քնկոտ եմ եւ, ի դեպ, երազներս իրականանում են: Դա շատ սարսափելի է: Օրինակ՝ եթե երազումս կոշիկ եմ տեսնում, անպայման ընտանիքում մեկը հիվանդանում է: Այսինքն՝ կան նշաններ, որոնք ինձ արդեն հուշում են մոտալուտ իրադարձությունների մասին: Դա, երեւի, մի քիչ տարօրինակ է:
-Թուլություն, որից օգտվում են կողքինները:
-Չափազանց անկեղծ եմ, եւ դրանից ոմանք, ցավոք, օգտվում են: Ոչ մի պատնեշ չկա շփման մեջ: Շատերն են ինձ զգուշացնում, որ այդպես կարող եմ վնասել ինձ:
-Զայրացած պահերին փորձում եք…
-Մեկուսանալ: Օրինակ՝ գնում եմ կինո կամ թատրոն, աշխատում եմ տանից դուրս գալ: Դա իրավիճակը հաղթահարելու լավագույն ձեւն է:
-Ձեզ միշտ օտար եք զգացել լեզուների՞, թվերի՞, թե՞ քիմիական տարրերի աշխարհում:
-Քիմիական տարրերի եւ լեզուների աշխարհում, իսկ մաթեմատիկայով, օրինակ, հետաքրքրվել եմ. այն հարազատ է ինձ:
-Մտերիմ ընկերը նա է, ումից պարտքով փող կվերցնե՞ք, թե՞ ում տեղ կտաք ոտքերի տակ ցուրտ օրերին:
-Երկուսն էլ: Թեպետ պարտքով փող վերցնել չեմ սիրում, բայց պարտքով փող կտամ:
-Երբ ասում են Հայաստան, առաջինը պատկերացնում եք…
-Մեր ժողովրդին, հայ մարդուն:
-Ձեր մասին լսած ամենազվարճալի բամբասանքը:
-Ասում են, թե երեխաներս տարբեր հայրերից են (ծիծաղում է): Վերջերս է ականջիս հասել այդ ասեկոսեն, որն, իսկապես, ծիծաղելի էր:
-Եթե բիզնես հիմնելու հնարավորություն լիներ, ո՞ր ոլորտում կդրսեւորվեիք:
-Բարդ հարց է, իրականում արդեն մի քանի տարի է՝ մտածում եմ այդ հարցի շուրջ: Հիմա կցանկանայի գեղեցկության դպրոց հիմնել, որտեղ աղջիկներին կպատրաստեն մեծ կյանքին: Դա կարող է լինել մոտիվացնող կյանքի դպրոց: Ես զգում եմ դրա անհրաժեշտությունը: Հայ աղջիկները պետք է նպատակներ դնեն իրենց առաջ, կայանան, ֆինանսապես անկախ լինեն:
-Մասնագիտություն, որ Ձերը ոչ մի գնով չէր դառնա:
-Երգչուհի չէի կարող լինել:
-Հե՞շտ եք դիմում օգնության:
-Ոչ, պետք է դանակը ոսկորին հասնի, որ օգնություն խնդրեմ: Բայց եթե պետք է, ամեն ինչ կանեմ, որպեսզի գործս առաջ գնա:
-Լավատե՞ս եք, հոռետե՞ս, թե՞ իրատես:
-Ավելի շատ իրատես, մի քիչ էլ հոռետես:
-Նպատակն արդարացնում է բոլոր միջոցնե՞րը, կա՞ մի բան, որ, այնուամենայնիվ, չի արդարացնում:
-Ոչ բոլոր. կան բարոյական արժեքներ, որոնք երբեւէ չեմ շրջանցի: Ամեն ինչի կարելի է հասնել մաքուր ճանապարհով՝ աշխատասիրության եւ համառության շնորհիվ:
-Մեքենայի սիրելի մակնիշը:
-Մեքենա, իհարկե, վաղուցվանից եմ վարում, բայց մակնիշամանիա չունեմ:
-Ձեր հմայքի գաղտնիքը:
-Կարծում եմ՝ բնական լինելը:
-Կինը սեքսուալ է, երբ…
-Սիրում է եւ սիրված է:
-Վախենում եք…
-Հիվանդություններից:
-Եվ վերջին հարցը՝ ինքներդ էլ Ձեզնից չէիք սպասի, բայց…
-Հինգ երեխա ունեցա (ծիծաղում է): Մինչեւ հիմա չեմ հավատում, ասում եմ՝ տեսնես ովքեր են այս երեխաները:
Աննա Բաբաջանյան
.gif)
