Հակատուբերկուլյոզային դիսպանսերի աշխատակիցները այսօր բողոքի ակցիա էին իրականացնում, ինչին անդրադարձել է ՀՀ առողջապահության նախարար Արսեն Թորոսյանը: Վերջինս սոցցանցի իր էջում գրել է.
Ի հավելումն առողջապահության նախարարության պաշտոնական պարզաբանման, տեղեկացնեմ, որ Երևանի հակատուբերկուլոզային դիսպանսերի ֆինանսավորման հարցը բազմիցս խորը ու համապարփակ քննարկվել է քաղաքային, ազգային ու միջազգային մակարդակներում։
Մեր երկրին բարեբախտաբար հակատուբերկուլոզային բազմաթիվ հիվանդանոցներ պետք չեն, քանի որ տուբերկուլոզը որպես հիվանդություն նահանջում է և մոտակա տարիներին ընդհանրապես վերանալու է։ Մեր երկրին այս շրջափուլում անհրաժեշտ է ընդամենը 1 պրոֆիլային ստացիոնար բժշկական կենտրոն տուբերկուլոզի բուժման համար և ԱԱՊ հաստատություններ, ինչպիսիք են պոլիկլինիկաները։
Մինչ իմ պաշտոնավարումն էլ Երևանի տուբդիսպանսերը չի դադարել ֆինանսավորվել պետական բյուջեից միայն նեղ անձնական շահերի շնորհիվ՝ դիսպանսերի ղեկավարության և քաղաքապետարանի բուժվարչության միջև, որոնք մինչ օրս էլ ուժի մեջ են։
Իմ պաշտոնավարման հենց սկզբից հակատուբերկուլոզային ծառայությունների օպտիմալացման գործընթացը մտել է նոր փուլ և շարունակվելու է։ Ի դեպ սկիզբը եղել է Դիլիջանի հակատուբերկուլոզային դիսպանսերի տարեկան 300մլն դրամ ֆինանսավորման դադարեցումը, որը չուներ որևէ հիմք ապացուցողական բժշկության տեսանկյունից։
Երևանի քաղաքային իշխանությունները պետք է մտածեն իրենց ենթակա հաստատությունների հետագա պրոֆիլի մասին՝ հաշվի առնելով ազգային մակարդակով մշակվող առողջապահության քաղաքականությունը։
.gif)
