Թիրախավորվում են կոնկրետ կազմակերպություններ` անունները կապելով ինչ-որ մոնստր սարքած անձանց հետ. ԱԺ պատգամավոր

ԱԺ «Իմ քայլը» խմբակցության պատգամավոր Հերիքնազ Տիգրանյանը «Ժողովուրդ» օրաթերթի հետ զրույցում հայտարարեց, որ իրեն անհանգստացնում է այն հանգամանքը, որ այսօր ՀՀ-ում քաղաքացիական հասարակության նկատմամբ ատելության եւ հայհոյախոսության դրվագները շատացել են:

-Տիկի՛ն Տիգրանյան, նախորդ շաբաթ Աժ մարդու իրավունքների մշտական հանձնաժողովի նիստի ժամանակ Դուք եւս միացաք քաղաքացիական հասարակությանը աջակցելու ստորագրահավաքին:Ի՞նչ փուլում է գտնվում ստորագրահավաքը, եւ ի՞նչը Ձեզ դրդեց, որպեսզի նման որոշում կայացնեք ու հանդես գաք` ի պաշտպանություն քաղհասարակությանը:

-Նախկինում ես ինքս եղել եմ քաղհասարակության ներկայացուցիչ եւ շատ կարեւորում են ազատ խոսքի արժեքը, բայց քանի որ երբեմն խոսքի ազատությունը շփոթում են նաեւ արդեն անկարգությունների, անպարկեշտ, ոչ պատշաճ վերաբերմունքի հետ, այստեղպետք է հասկանանք, թե որն է կարմիր գիծը,մինչեւ որտեղ կարելի է թույլ տալ խոսքի ազատություն, որից այն կողմը դու արդեն վիրավորում, զրպարտում կամ ուղակի խոչընդոտում ես նրանց որեւէ իրավունքի իրացմանը:

Վերջին շրջանի զարգացումները` կապված կոնկրետ հիմնադրամի գործունեության եւ տարբեր կազմակերպություններին ֆինանսավորելուն, փորձելով գտնել սեւ կատու այնտեղ, որտեղ չկա` ստեղծում են հանրության մեջ թյուր պատկերացումներ ընդհանրապես քաղհասարակության վերաբերյալ, քաղհասարակությանը ֆինանսավորող կազմակերպությունների վերաբերյալ, եւ մարդիկ, որոնք ընդհանրապես տեղեկացված չեն այն հիմնադրամներից ու նրանց գործունեությունից, իրենց մոտ ձեւավորվում են անհիմն ֆոբիաներ, անհիմն անհանգստություններ, ընկնում են համաշխարհային դավադրությունների տեսության մեջ եւ այլն:

Ստորագրահավաքը կամ հայտարարությանը միանալը հիմնականում նրանում էր կայանում, որ հայտարարության շեշտադրումներն ինձ համար ընդունելի էին, ընկալելի էին, որովհետեւ պետք է ունենալ ազատ խոսքի իրավունք, կարծիք արտահայտելու իրավունք, բայց երբեւէ չպետք է այդ խոսքի ազատությունն անցնի արդեն ատելության շեմը:

Իսկ մեզ մոտ ազատ խոսքը համեմված է ե՛ւ հայհոյախոսությամբ, ե՛ւ նաեւ ատելության խոսքով, ինչը շատ վատ է, եւ երեւույթի զանգվածային դրսեւորումները առաջացնում են նաեւ դրա իրավական կարգավորման անհրաժեշտությունը: Զուտ դրանով էր պայմանավորված, որ միացա:

-Ըստ Ձեզ` սա ի՞նչ հետեւանք պետք է ունենա, եթե հավաքվի անհրաժեշտ ստորագրություն, եթե արդեն հնչեցվել է պատգամավորների կողմից անհանգստություն:

-Պատժամիջոց կամ հետեւանք պետք է առաջանա ոչ թե նրա համար, որ պատգամավորներն են ստորագրահավաք արել, այլ որովհետեւ երեւույթն ինքն է զանգվածային արդեն դարձել, եւ հասարակային հարաբերությունը, որպես այդպիսին,պահանջում է իրավական կարգավորում: Այո, կարելի է ատելության խոսքը, այն կարգավորումները, որոնք ունեն Քրեական օրենսգրքում, բավարար չեն սաստելու կամ համապատասխան պատասխանատվություն կիրառելու, «ատելության խոսքը» եզրույթը պետք է նաեւ քրեականացվի այն աստիճան, այն մակարդակով, որը թույլատրելի է` հիմք ընդունելով Եվրոպական դատարանի նաեւ նախադեպային որոշումները:

-Գաղտնիք չէ, որ նույն Ձեր խմբակցության պատգամավորների կողմից ու, ընդհանրապես, իշխանության ներկայացուցիչների կողմից սոցիալական հարթակներում ատելության խոսք է հնչում:Արդյոք Ձեր այս պայքարը վերաբերելո՞ւ է նաեւ նման անձերին:

-Այստեղ չի ասվում` որեւէ սուբյեկտի կողմից ցանկացած խոսք, որ ատելության խոսք է, ինքն արդեն պատժելի պետք է լինի: Սուբյեկտը, որ կլինի արտաբերողը, անկախ նրա կարգավիճակից, որեւէ էական նշանակություն չպետք է ունենա: Առավելեւս հանրային պաշտոն զբաղեցնող անձի համար շատ ավելի խիստ պետք է լինեն զսպումները, եւ նրա ինքնացենզուրան պետք է բարձր լինի:

-Բայց, կարծես թե, ընդդիմադիր խմբակցության պատգամավորները չեն միանում Ձեր այս նախաձեռնությանը. ԲՀԿ-ն արդեն մերժել է, իսկ ԱԺ «Լուսավոր Հայաստան» խմբակցությունը չի շտապում այդ հարցում որեւէ քայլ ձեռնարկել: Ըստ Ձեզ` ինչո՞ւ:

-Ես տեղյակ չեմ. նիստի ընթացքում ես առաջարկել եմ ֆրակցիաներով միանալու առաջարկը դիտարկել: Դրանից հետո տեղյակ չեմ` ֆրակցիաներումինչ քննարկում են արվել: Գուցե ֆրակցիան` որպես Ազգային Ժողովի մարմին, ինքը չմիանա, ունենա որոշակի վերապահումներ, բայց նրանք, ովքեր անհատապես տեսնում են խնդիրը, բաց են ստորագրության համար: Նույն ԲՀԿխմբակցությունը եթե չի միանում, պատգամավորներն ազատ ենմիանալու: Այստեղ նաեւ անհատական վերաբերմունքի հարց է:Իսկ եթե ֆրակցիաները չեն միանում, միեւնույնն է, հայտարարության արժեքը դրանից չի նսեմանում:

-Բաց հասարակությունը Ձեզ երբեւէ որպես պատգամավոր դիմե՞լ էր` ի պաշտպանության իրենց հանդես գալու:

-Ո՛չ, երբեք:

-Դա Ձե՞ր նախաձեռնությունն է, անհանգստացնող որեւէ բա՞ն եք տեսել:

-Դա իմ նախաձեռնությունն է եղել, որովհետեւ ես երկար ժամանակեղել եմ հասարակական կազմակերպության ներկայացուցիչ, եւ այն հնարավորությունները, որ տալիս է ընդհանրապես պետությունը, պետք է խրախուսի քաղաքացիական հասարակության զարգացմանը, իսկ դա հենց լինում է հասարակական կազմակերպությունների, միավորումների ազատությունը իրացնելու միջոցով:

Ըստ էության, ստացվում էր այնպես, որ թիրախավորվում են կոնկրետ կազմակերպություններ` անունները կապելով ինչ-որ մոնստր սարքած անձանց հետ: Սորոսականներ են անվանում երբեմն` չիմանալով` ով եւ ինչ է Սորոսը, կամ ընդհանրապես ինչ ծրագրեր է ֆինանսավորել Հայաստանում, թե էլ ովքեր են նախկին իշխանություններից օգտվել այդ ֆինանսավորումից, եւ, ի վերջո, եթե կային լուսավորյալ մարդիկ նաեւ նախկին իշխանությունների մեջ, դա նաեւ հենց շնորհիվ այդ հիմնադրամի, որը ֆինանսավորել է նրանց բազմաթիվ ուսումնական այցերն ու վերաորակավորումները:

-Բայց Բաց հասարակության հիմնադրամի դեմ պայքարողները հայտարարում են, թե նրանք քանդում են մեր պետության հիմքերը: Դուք համամի՞տ եք:

-Համամիտ չեմ ու չեմ էլ ցանկանում մեկնաբանել նման անհեթեթությունները:

Զրուցեց ՍՈՆԱ ԳՐԻԳՈՐՅԱՆԸ