Էդ թափանցիկությունը եթե չկա, մարդիկ իրենց երեւակայությունը ինչ ուզեն, կարող են աշխատեցնել․ Հարություն Բաբայանը՝ վերջին իրադարձությունների մասին

ԱԺ «Լուսավոր Հայաստան» խմբակցության պատգամավոր Հարություն Բաբայանը «Ժողովուրդ» օրաթերթի հետ զրույցում ասաց, որ իր համար եւս թափանցիկ չեն գործում իշխանությունները այն առումով, որ չեն ներկայացնում հանրությանը, թե ինչու են այս կամ այն անձին հարցաքննության հրավիրում կամ պաշտոնանկ անում:

-Պարո՛ն Բաբայան, իշխանությունները կարծես թե հաշվեհարդար են սկսել այն անձանց նկատմամբ, ովքեր փորձում են իրենց հակադարձել, չկիսել իրենց դիրքորոշումը: Դրա վառ վկայությունը ՍԴ նախագահ Հրայր Թովմասյանի ընտանիքի դեմ ճնշումներն են:

-Ես միշտ ասել եմ` պետք է թափանցիկ գործել, ինչ անում ես, պետք է թափանցիկ անես, որպեսզի պարզ լինի` ինչի համար է այս մարդը հետաքննվում, ինչի համար է այս մարդու նկատմամբ օպերատիվ աշխատանք կատարվում: Երբ չես հայտարարում, կիքսեր են առաջանում, իսկ դրանք միշտ մեկնաբանվում են ցանկացած մարդու հայեցողությամբ:

-Ըստ Ձեզ` իշխանությունը թափացնիկ չի՞ գործում:

-Ես կարծում եմ, որ պետք է հայտարարի, թե ինչի համար է այդ ընտանիք մտել: Այնպես չէ, որ ես պաշտպանում եմ Հրայր Թովմասյանին, բայց ես թափանցիկության կողմնակիցն եմ: Եվ եթե իշխանությունը ցանկացած գործով, նույնիսկ ՀՀ նախկին ոստիկանապես Վալերիյ Օսիպյանին ինչի համար հեռացրեցին, թող ուղղակի հայտարարի` ինչի համար հեռացվեց, ինչի համար նշանակեցին խորհրդական եւ ինչի համար նորից հեռացրեցին:

Էդ թափանցիկությունը եթե չկա, մարդիկ իրենց երեւակայությունը ինչ ուզեն, կարող են աշխատեցնել: Կամ ինչո՞ւ ՀՀ ԱԱԾ նախկին պետ Արթոր Վաեցյանին հեռացրեցին:

Ես որեւէ մեկին չեմ պաշտպանում, այլ խնդրում եւ պահանջում եմ թափանցիկություն:Բոլորը պետք է իմանալ, որովհետեւ որդեգրված քղաքականությունից շեղում կարող ես արձանագրել: Դու ասել ես` ես ժողովրդի կողմից ընտրված իշխանություն եմ, ես ձեր առաջ հաշվետու եմ, նշանակում է` պահեք այդ հաշվետվությունը: Եթե չեն պահում, ապա թող չբողոքեն, որ լինում են այսպիսի հարցադրումներ, կասկածներ:

-Դուք, լինելով ընդդիմություն, այս հարցի շուրջ զրուցե՞լ եք իշխանությունների ներկայացուցիչների հետ` ի դեմս Ձեր գործընկների:

-Ես առիթ չեմ ունեցել, իմ հանձնաժողովում այդ հարցը չի քննարկվել: Ինձ այս պահին ավելի շատ հետաքրքրում է, թե մոտակա ժամանակներս պետբյուջեում ինչքան գումար է հատկացվել մշակույթի, կրթության ոլորտներին, ինչ բարեփոխումներ են նախատեսվում, որովհետեւ էսօր քննարկվում է ուսանողներին կրթաթոշակներ հատկացնելու եւ բարձրացնելու հարցերը, բայց ես մտածում եմ, որ պետությունը պետք է էնքան հզոր լինի եւ էնքան հնարավորություններ ունենա, որ պետության կողմից վարձատրվի դասախոսը, եւ ուսանողը ստանա բարձր կրթություն: Կրթված հասարակությունն է տալու բարձր պրոդուկտ, բարձր նպատակներ եւ արդյունքներ:

-Իշխանությունը կարող է շարունակել իր այսօրվա գործելաոճը, եթե Դուք` որպես ընդդիմադիր խմբակցություն, շարունակեք նույնպիսի զգուշավորությամբ խոսել երեւույթների մասին:

-Ես ասում եմ` իշխանությունը որդեգրել է թափանցիկ քաղաքականություն, որդեգրած քաղաքականությանը թող հավատարիմ մնա: Գործ են հարուցել, խնդրեմ, ոստիկանի սպանության հետ կապված, մեկ օրվա մեջ բացահայտվեց, բացահայտվեց մոտիվները, էդ մարդիկ, բա դրա էղածն ի՞նչ է, որ չեք հայտարարում` ինչի համար ես մարդուն գործից հեռացնում:

Ինչի՞ համար է ընտանիքում քննություն կատարվում, ինչի՞ համար է դուստրերին հրավիրում ԱԱԾ, ինչի՞ համար են հորը հրավիրում ԱԱԾ: Թող թափանցիկություն լինի: Դա մշակույթ է, քաղաքական մշակույթ, որ հաջորդ եկող բոլոր իշխանություններընույն սկզբունքը պահեն: Եթե մեկին ազատում ես, չի նշանակում, որ իրավունքն ունես նրան բռնաբարելու, որովհետեւ դու ես նրան ազատագրել: Տարբեր ես, տարբերությունդ պահի:

Սոնա Գրիգորյան