Լուսանկարն արվել է Երեւանում
Մայրաքաղաքի խանութներից մեկի այս գրությունը, մեղմ ասած, անհասկանալի է. քաղցրավենիքի անվանումը ենթարկվել է բազմաթիվ աղավաղումների:
ՀԱՐՑ. Շրջանառության հարկ վճարող անհատ ձեռնարկատերերի համար պարտադի՞ր է դրամարկղի գիրքը, թե՞ ոչ:
Ալբերտ Պետրոսյան (50 տարեկան)
ՊԱՏԱՍԽԱՆ. Հայտնում ենք, որ ըստ «Դրամարկղային գործառնությունների մասին» Հայաստանի Հանրապետության օրենքի 2-րդ հոդվածի դրույթների` այն տարածվում է Հայաստանի Հանրապետության տարածքում գործող իրավաբանական անձանց, ԱԱՀ վճարող համարվող անհատ ձեռնարկատերերի, պետական եւ այլ հիմնարկների, դրանց` Հայաստանի Հանրապետության տարածքում գործող առանձնացված ստորաբաժանումների (մասնաճյուղերի, ներկայացուցչությունների), օտարերկրյա կազմակերպությունների` Հայաստանի Հանրապետության տարածքում գործող առանձնացված ստորաբաժանումների (մասնաճյուղերի, ներկայացուցչությունների) վրա:
Շրջանառության հարկ վճարող համարվող անհատ ձեռնարկատերերի նկատմամբ «Դրամարկղային գործառնությունների մասին» Հայաստանի Հանրապետության օրենքի դրույթները չեն կիրառվում եւ նրանք չպետք է վարեն դրամարկղի գիրք:
ՀՀ պետական եկամուտների կոմիտե
«ԺՈՂՈՎՈՒՐԴ». Նշենք, որ «Դրամարկղային գործառնությունների մասին» օրենքի համաձայն` այն կարգավորում է ՀՀ տարածքում ՀՀ արժույթով եւ արտարժույթով դրամարկղային գործառնությունների իրականացման, ինչպես նաեւ կանխիկ դրամի պահպանման հետ կապված հարաբերությունները:
ՀԱՐՑ. Սպառողը ո՞ր դեպքում իրավունք ունի գնված ապրանքը հետ վերադարձնել կամ փոխանակել: Կոնկրետ ժամկետ կա՞ սահմանված ապրանքի փոխանակման համար:
Սյուզաննա Հարությունյան (60 տարեկան, տնային տնտեսուհի)
ՊԱՏԱՍԽԱՆ. Քաղաքացու հարցին ի պատասխան` հայտնում ենք, որ պատշաճ որակի ոչ պարենային ապրանքը փոխարինվում կամ վերադարձվում է, եթե նշված ապրանքը չի օգտագործվել, պահպանված են դրա ապրանքատեսքը, սպառողական հատկանիշները, կապարակնիքները, ապրանքային պիտակները, ինչպես նաեւ սպառողին տրված վճարման փաստը հավաստող փաստաթուղթը կամ այլ հաշվարկային փաստաթուղթ, եւ առկա են ապրանքը հենց այդ վաճառողից ձեռք բերելու մասին ապացույցներ: («Սպառողների իրավունքների պաշտպանության մասին» ՀՕ, հոդված 23):
Միաժամանակ տեղեկացնում ենք, որ սպառողն իրավունք ունի փոխարինելու կամ վերադարձնելու պատշաճ որակի ապրանքն իրեն հանձնելու օրվանից` 14 օրվա ընթացքում, եթե վաճառողն ավելի երկար ժամկետ չի հայտարարել: Պատշաճ որակի ապրանքը վերադարձնելու ժամկետը համարվում է պահպանված, եթե սպառողն ապրանքը ստանալու օրվանից` 14-օրյա ժամկետում, այն հանձնել է փոստային, սուրհանդակային, տրանսպորտային կամ առաքման այլ ծառայության: («Սպառողների իրավունքների պաշտպանության մասին» ՀՕ, հոդված 23):
ՀՀ շուկայի վերահսկողության տեսչական մարմին
«ԺՈՂՈՎՈՒՐԴ». Սպառողն իրավունք ունի վերադարձնելու կամ փոխարինելու պատշաճ որակի ոչ պարենային ապրանքն այլ չափի, ձեւի, գույնի կամ համանման կոմպլեկտայնության ապրանքով այն վաճառողի մոտ, որից ձեռք է բերել ապրանքը, եթե այն հարմար չէ օգտագործվել սպառողի կողմից իր նշանակությամբ` գնի տարբերության դեպքում անհրաժեշտ վերահաշվարկ կատարելով վաճառողի հետ:
.gif)
