Հայաստանում կոնտակտային սպորտաձեւերից մասսայականություն է վայելում կարատե սպորտաձեւը: Այն բաժանվում է տարբեր տեսակների, որոնցից մեկին էլ` Կիոկուշին կարատեին, կանդրադառնանք հիմա:
Նախ նշենք, թե ինչով է Կիոկուշին կարատեն տարբերվում կարատեի մյուս տեսակներից. կարատեի այս տեսակի տեխնիկան բաղկացած է ձեռքերի եւ ոտքերի ուղիղ հարվածներից: Այն ավելի շատ հիմնված է մոտ տարածությունից հզոր հարվածներ տեղալու վրա: Սպարինգի ժամանակ չի թույլատրվում ձեռքերով եւ արմունկներով հարվածել գլխին, ողնաշարին եւ պարանոցին,սակայն մարզումների ժամանակ այդ բոլոր հնարքները հարկավոր է սովորել ինքնապաշտպանության համար,բայց սպարինգում այն կիրառել չի թույլատրվում: Մրցումների ժամանակ մարտիկներին միավորներ բաժանում են` հետեւելով նոկդաուն կանոնին, այսինքն` հաջող նոկդաունների դեպքում եւ նաեւ մաքուր հարվածների:
Ինչպես եւ կարատեի մյուս տեսակների, այնպես էլ Կիոկուշին կարատեի մարտիկները բաժանվում են դասերի,որոնք որոշվում են գոտիների տարբեր գույներով: Սկսնակները կրում են սպիտակ գոտի: Առաջին քննությունը տալուց հետո մարզիկները ստանում են նարնջագույն գոտի,որը համապատասախանում է 10-րդ կյուին: Առաջին դանից սկսած սպորտաձեւով զբաղվողները ստանում են ամենաբարձր գոտին` սեւը:
Հենց այս սպորտաձեւը` Կիոկուշին կարատեն, մեծ տարածում ունի Հայաստանում: Սպորտաձեւի տարբեր հարցերի մասին «Ժողովուրդ» օրաթերթը զրուցել է Հայաստանի Կիոկուշին կարատեի ֆեդերացիայի փոխնախագահ Վարդան Կիրակոսյանի հետ:
-Այժմ ի՞նչ զարգացվածության մակարդակի վրա է գտնվում Կիոկուշին կարատեն Հայաստանում:
-Սպորտաձեւը Հայաստանում զարգացած է: Ֆեդերացիան ունի մոտ 3000 սան, եւ Երեւանում գործում են Կիոկուշին կարատեի 100-ից ավել դպրոցներ: Մարզաձեւը մեր երկրում վայելում է մասսայականություն, եւ մեր ֆեդերացիան Հայաստանի առաջատար ֆեդերացիաների թվին է պատկանում: Կարող եմ ասել, որ Կիոկուշին կարատեն միայն կոնտակտային ոճն է Հայաստանում, որ Սպորտի նախարարության կողմից ճանաչվել է պետական:
-Ունի՞ լայն տարածում մարզաձեւը ՀՀ մարզերում:
-Այո, կարատեի այս տեսակը տարածված է Հայաստանի Հանրապետության գրեթե բոլոր մարզերում: Տարբեր մարզերում ունենք տարբեր քանակի դպրոցներ: Կարող եմ ասել, որ Արագածոտնի մասում ունենք 4 դպրոց, Գեղարքունիքի մարզում` 6-ը,իսկ Արմավիրում ունենք 3 դպրոց:
-Վերջերս ի՞նչ հաջողություններ ունենք գրանցած այս սպորտաձեւում:
-Վերջերս մանսակցեցինք Աշխարհի Գավաթի խաղարկությանը եւ գրանցեցինք շատ լավ արդյուքներ: Կարողացանք նվաճել 4 ոսկե, 2 արծաթե եւ 2 բրոնզե մեդալներ: Մրցաշարից առաջ Հոլանդիայում տեղի ունեցավ մարզչական սեմինար (վերապատրաստում), որին մասնակցել են ֆեդերացիայի նախագահը, փոխնախագահներն ու մեկ մարզիչ:
-Կմանրասնե՞ք մի փոքր ուսումնամարզական հավաքների մասին: Հիմնականում որտե՞ղ եք անցկացնում դրանք:
-Անցկացնում ենք ուսումնամարզական հավաքներ ե՛ւ Հայաստանի ներսում, ե՛ւ երկրի սահմաններից դուրս: Ուսումնամարզական հավաք անցկացրել ենք այս տարվա հուլիսի 24-ից 30-ը Ծաղկաձորում: Իսկ երկրից դուրս ուսումնամարզական հավաք անցկացրել ենք Բուլղարիայում,որից հետո կարողացանք փայլուն հանդես գալ այդ մրցաշարում եւ նվաճել 4 ոսկե մեդալ: Այդ մրցաշարին մասնակցել են ե՛ւ մինչեւ 18 տարեկան մեր մարզիկները, ե՛ւ 18 տարեկանից մեծ:
-Առաջիկայում ի՞նչ մրցաշարեր կան, որոնց պետք է մասնակցեն մեր մարզիկները, եւ ի՞նչ սպասելիքներ ունեք այդ մրցաշարերից:
-Սեպտեմբեր ամսին տեղի կունենա Հայաստանի մարզային առաջնությունը,իսկ հոկտեմբերին` Հայաստանի Բաց առաջնությունը: Հայաստանի Բաց առաջնությունում առաջին երեք հորիզոնականները զբաղեցրածները կմեկնեն Կովկասի առաջնությանը մասնակցելու: Այդ ամենից հետո Իսպանիայում կկայանա Եվրոպայի առաջնությունը:
Կան ուժեղ մարզիկներ, եւ սպասելիքները շատ մեծ են: Ունենք Վահագն Հակոբյան մինչեւ 15 տարեկանների խմբում, ով Եվրոպայի բազմակի չեմպիոն է: Սպասելիքները շատ մեծ են մեր մարզիկներից:
Հավելենք նաեւ, որ ֆեդերացիայի փոխնախագահ Վարդան Կիրակոսյանը «Ժողովուրդ» օրաթերթի հետ զրույցում նշեց նաեւ, որ Կիոկուշին կարատեի ֆեդերացիան չի ֆինանսավորվում պետության կողմից, եւ բոլոր ծախսերը հոգում է հենց ֆեդերացիան:
Զրուցեց ԷԴՄՈՆ ՄԱՐՏԻՐՈՍՅԱՆԸ
ՄԵԴԱԼՆԵՐԸ
ՀՀ վարչապետ Նիկոլ Փաշինյանը ներկայացրել է Համահայկական 7-րդ ամառային խաղերի մեդալները: Վարչապետն իր էջում հրապարակել է ոսկե, արծաթե եւ բրոնզե մեդալների լուսանկարը:
ԿՐԱԿՈՑՆԵՐ
Օգոստոսի 5-ի կեսգիշերին մի քաղաքացուց ոստիկանություն ահազանգ է ստացվել, որ Եղեգնաձորի սուպերմարկետներից մեկի մոտից կրակոցի ձայներ են լսվում: Եղեգնաձորի ոստիկանները Երեւանյան խճուղում հայտնաբերել են Պորշ Կայեն մակնիշի մեքենա: Եղեգնաձորցի 27-ամյա վարորդը ապօրինի զենք պահելու կասկածանքով բերման է ենթարկվել ոստիկանություն: Մեքենայի զննությամբ հայտնաբերվել է 7.62 մմ տրամաչափի երկու պարկուճ: Բերման ենթարկվածը ձերբակալվել է: Ձեռնարկվում են միջոցառումներ` տեղի ունեցածի բոլոր հանգամանքները պարզելու ուղղությամբ:
.gif)
