Ինչպես է կոռուպցիոն սկանդալի մեջ հայտնված ընկերությանը նոր գործ հանձնարարվել. Փաշինյանի հայտարարության հետքերով

ՀՀ վարչապետ Նիկոլ Փաշինյանը հայտարարություն է տարածել՝  խնդրելով հնարավորինս շատ տարածել.

«Սիրելի հայրենակիցներ. ավտոմեքենաների հնամաշ թափքերը (կմախքները) որպես մետաղի ջարդոն հանձնելու հարցերով կարող եք դիմել հետեւյալ հասցեներով.

1. Երևան

– Այվազովսկու 4/2
– Արտաշատյան խճուղի 5/1

Հեռախոս՝ 091-41-59-36

2. Գյումրի

– Գյումրու կայարանամերձ տարածք, հեռ. 077-41-99-51
– Շարա Տալյան 7/2, հեռախոս 093-85-89-99

3. Վանաձոր

Հյուսիսային փ. 14, հեռախոս 093-41-81-16

4. Մասիս

Սայաթ Նովա 15, հեռախոս 093-24-03-32

5.Չարենցավան

Երևանյան 2, հեռախոս 098-89-92-73

Բոլոր նշված հասցեներում մեքենաների չկտրտված կմախքները գնվում են 1 տոննան 10-12 հազար դրամով: Գնումը կատարում է «Մետեքսիմ» ՍՊԸ-ն:

Ուշադրություն – Բոլոր այն դեպքերում, երբ մի տեղում կուտակված կլինեն ոչ պակաս քան 12 ավտոմեքենայի կմախք, ընդունող կազմակերպության տեխնիկան կմոտանա տվյալ տարածքին եւ կիրականացնի ավտոմեքենաների կմախքների տեղափոխումը:

Առավել մանրամասն տեղեկություններ կարող եք ստանալ վերը նշված հեռախոսահամարներով: Եթե զբաղված լինի, ավելի ուշ զանգեք: Դա նշանակում է շատերն են զանգում:)) »

Ի դեպ նշենք, որ ընկերությունը ստեղծվել է 2000 թվականին: Այստեղ պետք է ընդգծել, որ այս ընկերության 98 տոկոս բաժնետերը 2000 թվականից առ այսօր հանդիսանում է Միխաիլ Հարությունյանը: Եվ նա ամենեւին էլ պատահական մարդ չէ, այլ Դատական ակտերի հարկադիր կատարման ծառայության նախկին պետ Միհրան Պողոսյանի մորեղբայրը, Սերժ Սարգսյանի մանկության ընկերը:

Ընթացիկ տարում ոստիկանությունը կոռուպցիոն բնույթի հանցագործություն էր բացահայտել, որով պետությանը պատճառվել էր 136 մլն դրամի վնաս: Շուրջ 2.086 տոննա պոմպակայանի մղման խողովակաշարը ձևակերպվել էր որպես 1.680 տոննա և օտարվել ՍՊ և ՓԲ ընկերություններին։

Նշված ՍՊ ընկերությունը «Մետէքսիմ»-ն է: Իսկ ՓԲ ընկերությունը, ըստ մամուլի հրապարակումների, «Հիդրո Կորպորացիա»-ն է:

Ավելին, այս ընկերության անունը առաջին անգամ չէ, որ հայտնվել է մամուլի էջերում: «Ժողովուրդ» օրաթերթը ևս անդրադարձել է «Մետէքսիմ» ընկերության չարաշահումներին:

Ըստ այդմ՝ 2018 թվականի դեկտեմբերի 14-ին` արտահերթ խորհրդարանական ընտրություններից օրեր անց, Սահմանադրական դատարանը` Հրայր Թովմասյանի գլխավորությամբ, մի հոդված է ճանաչել հակասահմանադրական, որի հիման վրա «Մետէքսիմ» ընկերությունը տուգանվել էր Պետական եկամուտների կոմիտեի կողմից: Ներկայումս գլխավոր տնօրենը Գրիգորի Հարությունյանն է, որը Սերժ Սարգսյանի մտերիմներից է: Նշենք, որ «Մետէքսիմ» ՍՊԸ-ն բիզնես խմբի մեջ է այնպիսի ընկերությունների հետ, ինչպիսիք են «Միկմետալ», «Միկշին», «Քեթրին» եւ այլն:

Ընդ որում, «Մետէքսիմ» ընկերության եւ Միհրան Պողոսյանի մասով եւս ուշագրավ տվյալներ կան: Խոսքը 2014 թվականին տրամվայի լուծարման մասին է. տրամվայի ռելսերի ապամոնտաժումը բավականին արագ է կատարվել: Երեւանում ապամոնտաժումից առաջ կար տրամվայների շուրջ 180 կմ գիծ, որի յուրաքանչյուր մետրը 45 կգ էր, բոլորռելսերը միասին 8100 տոննա, եւ 2004 թվականին Պաշտպանության նախարարությունը, որի ղեկավարն այն ժամանակ Սերժ Սարգսյանն է եղել, հայտարարել է, թե ռելսերը հարկավոր են առաջնային գծի անվտանգության ապահովման համար:

Սակայն փաստացի դրանք ամբողջովին չեն օգտագործվել, եւ Պաշտպանության նախարությունից, «ՍիվիլՆեթ»-ի գրավոր հարցմանն ի պատասխան, հայտնել են, որ 2005-2011 թթ. Երեւանի քաղաքապետարանի ութ որոշումներով Պաշտպանության նախարարությանն է հատկացվել շուրջ 5700 տոննա տրամվայի ռելսերի ջարդոն, եւ նախարարությունն էլ ծախսել է ընդամենը 137 տոննան,այսինքն` տրամադրածի ընդամենը 2,4 տոկոսը: Եվ մնացած 5563 տոննա ջարդոնը կամ 97,6%-ը տրամադվել է «Մետէքսիմ» ՍՊԸ-ին: Այսինքն` այստեղ գործել է Սերժ Սարգսյան-Միհրան Պողոսյան-Միխայիլ Հարությունյան եռանկյունին:

Հիմա էլ` այսքան տարի անց, այս նույն ընկերության համար արդեն դրույթ էր հակասահմանադրական ճանաչվում, որը հնարավորություն տվեց խուսափել տուգանքից:

Իսկ այսօր հայտնի դարձավ, որ «Մետէքսիմ» ընկերությունը պետք է զբաղվի ավտոմեքենաների հնամաշ թափքերի՝ որպես մետաղի ջարդոն հավաքագրելու հարցերով: