Արարատի մարզի Ռանչպար գյուղը ավելի քան 15 տարվա դադարից հետո ունի նոր մանկապարտեզ, ուր կհաճախի գյուղի 25 երեխա: «Արմենպրես»-ի հաղորդմամբ՝ այս մասին մանկապարտեզի բացման արարողությանը լրագրողների հետ զրույցում ասաց տնօրեն Հասմիկ Համբարձումյանը:
«Գյուղը 15-20 տարի է, ինչ չուներ մանկապարտեզ։ Նախկին մանկապարտեզի շենքը վթարային էր: Այժմ նոր մանկապարտեզում առայժմ ընդունելու ենք 25 երեխայի, որովհետև ամեն ինչ նախատեսված է 25 երեխայի համար: Հետո, երբ կավելանա բնակչությունը, կավելացնենք նաև տեղերը»,-ասաց Համբարձումյանը:
Մանկապարտեզում կաշխատի ընդհանուր 8 մասնագետ: Մեկ երեխայի համար ամսական վարձը կլինի 6 հազար դրամ: Տնօրենը նշեց՝ գյուղապետարանը կֆինանսավորի մնացած ծախսերը:
Ռանչպարի բնակիչ Բավական Ճիզմիչյանը նշեց, որ մինչև մանկապարտեզի կառուցումը ստիպված են եղել թոռներին ուղարկել Մասիս քաղաքի մանկապարտեզ, հիմա մանկապարտեզի բացումով շատերի համար հարց կլուծվի:
Ռուսաստանցի գործարար Մամիկոն Կարապետյանը, որն իր միջոցներով է կառուցել մանկապարտեզը, լրագրողների հետ զրույցում նշեց՝ ինքն իր ցանկությունը հայտնել է վարչապետին, վերջինս սիրով ընդունել է առաջարկը, միասին որոշել են մանկապարտեզի կառուցման վայրը: Նա նշեց՝ մանկապարտեզը կառուցվել է շուտ հավաքվող կոնստրուկցիայով, ինչը թույլ է տալիս շատ արագ ավարտել աշխատանքները: Մանկապարտեզի կառուցման ու կահավորման համար ծախսվել է 340 հազար դոլար:
ՀՀ վարչապետ Նիկոլ Փաշինյանը 2019-ի մարտին նախապես չծրագրավորված այցով Արարատի մարզի Ռանչպար գյուղում գտնվելով՝ ծանոթացել էր համայնքի խնդիրներին ու հանձնարարել զբաղվել դրանցով՝ առաջին հերթին կենտրոնանալով մանկապարտեզի խնդրի վրա: Դեկտեմբերի 3-ին արդեն վարչապետը շրջայց կատարեց մանկապարտեզում, ծանոթացավ կատարված աշխատանքին:
.gif)
