ՏԵՍԱՆՅՈՒԹ. Իշխանությունն իր ամբողջ ռեսուրսներով անցել է հակաքարոզչության. Իշխան Սաղաթելյան

ՀՅԴ գերագույն մարմնի ներկայացուցիչ Իշխան Սաղաթելյանը «Ժողովուրդ» օրաթերթի հետ զրուցել է ՀՅԴ-ում վերջին շրջանում կատարվող թեժ իրավիճակի մասին:

-Պարո՛ն Սաղաթելյան, բավական երկար ժամանակ է` երկրում չէիք: Որտե՞ղ էիք ու ի՞նչ խնդիրների ու հարցերի հետ էր կապված Ձեր` երկրից բացակայելը:

-Կանադայում էի, 10-օրյա այց էր, հանդիպումը երկու մասի էր բաժանված` մեկը քաղաքական պաշտոնական հանդիպումներն էր, ու նաեւ մասնակցել եմ ՀՅԴ-ի 129-ամյակին նվիրված տոնական միջոցառումներին: Հանդիպումներ է եղել Կանադայի հայկական գաղթօջախներում գործող ազգային տարբեր միությունների եւ կազմակերպությունների ներկայացուցիչների հետ: Տարբեր հանդիպումներ եմ ունեցել, որտեղ քննարկել ենք հայ-կանադական հարաբերությունները: Մեր Հայ Դատի գրասենյակներն էին հանդիպումները կազմակերպել:

-Տեղեկություններ կան, որ ՀՅԴ-ն փորձում է այս ժամանակահատվածում սփյուռքում հզորացնել իր կառույցները, ճի՞շտ է:

-Ճիշտ են, ու մենք բազմիցս ասել ենք, որ անկախ նրանից, թե ով են Հայաստանի իշխանությունները, ՀՅԴ-ն իր ողջ կարողականությունը, արտաքին կապերը, Հայ դատի գրասենյակները, միջազգային հեղինակությունը շարունակելու է օգտագործել ՀՀ-ի հզորացման համար: Ու այս առումով նրանք, ովքեր կարծում են, որ «Դաշնակցությունը» ՀՀ-ում զրո քաղաքական ազդեցություն ունի, պետք է տեսնեն ՀՅԴ-ի ուժը, պետք է հասկանան ՀՅԴ-ի հեղինակությունը եւ օգտակարությունը ՀՀ-ի համար:

-Բայց, ըստ ՁԵզ, սփյուռքում ՀՅԴ-ի հեղինակությունը բա՞րձր է. կարծես թե, ՀՀ-ում ՀՅԴ-ն այդքան էլ հեղինակություն չունի:

-Իսկապես սփյուռքում շատ բարձր է, ու դա կապված է իր ամենօրյա, հսկայածավալ գործունեությամբ: Հայաստանում վերջին իրադարձություններից հետո տեղի է ունեցել ընտրություն, որի ժամանակ մենք շեմը չենք հաղթահարել: Այս առումով անշուշտ մենք ունեցել ենք բացթողումներ, ունեցել ենք թերացումներ, բայց նաեւ այս իրավիճակին նպաստել է այն քաղաքական իրավիճակը, որ գոյություն ուներ ՀՀ-ում: Մենք` որպես ընդդիմություն, ձեւավորելու ենք այն օրակարգը, որ հստակ դառնանք այլընտրանք իշխանություններին: Այն թեզը, որ զարգացնում են, թե Հայաստանի ՀՅԴ-ն լավը, դրսինները լավն են, իրենց մեջ կա տարբերություն, դա իրականության հետ կապ չունի:

-Իսկ ի՞նչ իրավիճակ է այժմ ՀՅԴ-ում. դեռեւս դեկտեմբերի 5-ին ՀՅԴ «Նիկոլ Աղբալյան» ուսանողական միությունը մի հայտարարությամբ էր հանդես եկել, որտեղ էր, որ ՀՅԴ-ն հոկտեմբերի 31-ին ԳՄ հայաստանյան կոմիտեների ժողով է անցկացրել, որոշվել է պարտիզանական հարվածներ հասցնել իշնշվում խանություններին: Ինչի՞ մասին է խոսքը:

-Այն ժողովից, որի մասին խոսում էին, այդ ժողովում տվյալ մարդիկ չեն մասնակցել: Նախ որ հայտարարում են, թե ժողովն արել է Հրանտ Մարգարյանը, թե ինքն է վարել, սուտ են ասում: Ժողովը վարել եմ ես, ժողովին քաղաքական զեկույցով հանդես եմ եկել ես, ժողովի ամփոփումը իրականացրել եմ ես, ժողովին մասնակցել է շուրջ 140-150 հոգի, ժողովին ներկա են եղել ՀՅԴ-ի բոլոր կոմիտեներից 2 ներկայացուցիչ, Հայաստանի 10 մարզային կոմիտեներից 3 ներկայացուցիչ, նաեւ հրավիրված են եղել ուսանողական երիտասարդական միությունների վարչությունները ու Բյուրոյի եւ Գերագույն մարմնի նախկին անդամներ: Այդ ժողովը մեր հերթական ժողովներից մեկն է եղել, որտեղ քննարկել ենք օրակարգ:

-Ո՞րն է եղել ժողովի առանցքային հարցը:

-Առանցքային հարցերը` երկրի ներքաղաքական իրավիճակ, կատարել ենք գնահատումներ, որից հետո ԳՄ-ն հանդես է եկել հայտարարությամբ ու ներկայացրել, թե ինչ հարցեր ենք քննարկել: Բայց որոշ շրջանակներ փորձեցին ինչ-որ որակումներ տալ եւ հատուկ բառեր օգտագործել, թե իբրեւ… Ազատ քննարկում է եղել մոտ 5-6 ժամ, դա ՀՅԴ-ում շատ նորմալ պրոցես է: Հիմա որ ասում են պարտիզանական ջոկատներ, դա սուտ է, նման քննարկումներ կամ Հրանտ Մարգարյանը նման ելույթներ չի եղել:

-Ներկա՞ է եղել Հրանտ Մարգարյանը ժողովին:

-Մարգարյանը ներկա եղել է ու ելույթ ունեցողներից մեկը եղել է ինքը, բայց նման բովանդակությամբ ելույթ չի եղել:

-Ովքե՞ր են այդ դեպքում այն շրջանակները, ովքեր, ըստ Ձեզ, խեղաթյուրել են ժողովի բովանդակությունը:

-Այսօր արդեն «Նիկոլ Աղբալյան» ուսանողական միությունից հեռացված նախկին մի քանի դաշնակցականներ:

-Բայց Դուք ինչ-որ ականջնե՞ր եք տեսնում այդ անձանց արված հայտարարությունների հետեւում, այսինքն` նրանց հրահրե՞լ են, որ նման տեղեկություն տարածեն:

-Իհարկե տեսնում ենք ականջներ, դժբախտաբար, այսօր այդ երիտասարդները օգտագործվում են ինչ-որ շրջանակների կողմից:

-Իշխանակա՞ն շրջանակների:

-Ինչ-որ շրջանակների, ժամանակը կգա, դրա մասին ամբողջական կխոսենք, դա մեզ համար ակնհայտ է: Այդ երիտասարդները երբեք ՀՅԴ-ում խոսելու, արտահայտվելու, դիրքորոշում հայտնելու խնդիր չեն ունեցել: Իրենցից մեկը անգամ վերջերս մասնակցել է ՀՅԴ-ի ընդհանուր ժողովին, որտեղ ինքը ոչ մի բան չի խոսել: Ես ցավում եմ, որ իրենք այսօր օգտագործվում են ինչ-որ շրջանակների կողմից: Ամբողջ իշխանական մամուլը հակաքարոզչություն է իրականացնում ՀՅԴ-ի դեմ` հղում անելով կեղծ, գոյություն չունեցող թեզերի վրա: Ակնհայտ է, որ ՀՅԴ-ն ընդդիմադիր դաշտում ձեւավորում է օրակարգ, եւ դա դուր չի գալիս իշխանություններին: Ակնհայտ հակաքարոզչություն է գնում ՀՅԴ-ի դեմ, փորձում են պիտակավորել, փորձում են մեզ մղել այլ դաշտ:

-Իսկ ի՞նչ եք պատրաստվում անել իշխանությունների կողմից ՀՅԴ-ի դեմ իրականացվող հակաքարոզչությանը պատասխանելու համար, պլաններ ունե՞ք:

-Իշխանությունը իր ամբողջ ռեսուրսներով, լայնածավալ իր սպասարկուներով անցել է հակաքարոզչության, մենք ցանկացած սցենարի պատրաստ ենք: Մենք ընդդիմադիր քաղաքական ուժ ենք, մեր երկրի օրենսդրությամբ, մեր ծրագրերից բխող քայլերով շարժվում ենք առաջ:

Զրուցեց ՍՈՆԱ ԳՐԻԳՈՐՅԱՆԸ