Երեկ «Քաղաքացիական պայմանագիր» կուսակցության կենտրոնական գրասենյակում տեղի է ունեցել վարչության հերթական նիստը, որին մասնակցել է նաեւ ՀՀ վարչապետ Նիկոլ Փաշինյանը: Նիստի ընթացքին զուգահեռ տարաբնույթ խոսակցություններ էին պտտվում, որ իշխանական կուսակցության վարչությունը քննարկում է ԱԱԾ նախկին տնօրեն Արթուր Վանեցյանին պետական հեղաշրջման փորձի համար կալանավորելու հարցը, ինչպես նաեւ այն թեման, որ մեծ արտահոսք է սպասվում ՔՊ-ից:
Բայց «Ժողովուրդ» օրաթերթին այդ նիստից հասած որոշ մանրամասներ այլ բանի մասին են հուշում: Գուցե այդպիսի հարցեր էլ են քննարկվել, բայց պայմանավորվել են որեւէ դեպքում դուրս չհանել: Ամեն դեպքում, մեզ հասած լուրերի համաձայն՝ այս անգամ ՔՊ վարչության նիստն այնքան էլ երկար չի տեւել. եթե սովորաբար այն կարող էր 4-5 ժամ տեւել, ապա այս անգամ տեւել է 2.5 ժամից մի քիչ ավել:
Նիստի մասին ArmLur.am-ը զրուցել է «Քաղաքացիական պայմանագիր» կուսակցության վարչության անդամ Ռոմանոս Պետրոսյանի հետ:
-Պարո՛ն Պետրոսյան, ի՞նչ հարցեր եք քննարկել երեկ նիստի ընթացքում:
-Քննարկվել են կուսակցաշինական հարցեր:
-Տեղեկություններ կան, որ անդրադարձ է կատարվել Արթուր Վանեցյանի կալանքի հարցին:
-Որևէ նման հարց չի քննարկվել:
–«Իմ քայլը» խմբակցության պատգամավոր Հրաչյա Հակոբյանը երեկ իր հարցազրույցներից մեկում ասել է, թե Արթուր Վանեցյանի պաշտոնանկության պատճառը պետական հեղաշրջման փորձն է եղել: Ի՞նչ պետական հեղաշրջման փորձ է արել Արթուր Վանեցյանը:
-Ես չեմ ուզում մեկնաբանել Ձեր այդ հարցը և չեմ ուզում որևէ դիտարկում տալ: Ինքս ելնելով նաև իմ կարգավիճակից՝ նախկին ԱԱԾ տնօրենի գործունեության հետ կապված, որևէ գնահատական չէի ցանկանա հնչեցնել:
– Նիկոլ Փաշինյանը վարչության նիստից հետո ինչո՞ւ էր բարկացած: Ո՞վ էր նրան բարկացրել:
-Ես նման միտում պարոն Փաշինյանի մոտ չեմ նկատել, նիստը շատ արդյունավետ, կառուցողական և ադեկվատ պայմաններում է անցել:
– Նիկոլ Փաշինյանը նաև ասել է , որ շուտ-շուտ պետք է հավաքվել, ի՞նչ կա շուտ-շուտ քննարկելու:
-Ես նման բամբասանքների չեմ պատասխանի, և ասելու էլ ոչինչ չկա:
–Պարո՛ն Պետրոսյան, Ի՞նչ առիթով է պայմանավորված Ձեր այսօրվա խնջույքը «Դվին» ռեստորանում:
-Սա մեր կուսակցության, այսպես ասած, տոնական խնջույքն է, որը ընկերային միջավայրում կանցկացվի: Յուրաքանչյուրս հանգանակելով որոշակի գումար մեր անձնական միջոցներից՝ այսօր ցանկանում ենք մեր կուսակցությունով պարզապես երեկոյան կազմակերպել խնջույք միմյանց հետ շփվել ոչ ֆորմալ պայմաններում, որը շատ լավ, թափանցիկ քայլ է:
Լիդա Եղիազարյան
.gif)
