ՆԱԽԱՐԱՐԻՆ ԿԿԱՆՉԵՆ ԱԶԳԱՅԻՆ ԺՈՂՈՎ

«Ժողովուրդ» օրաթերթի տեղեկությունների համաձայն՝ ԱԺ առողջապահության եւ սոցիալական հարցերի մշտական հանձնաժողովը պատրաստվում է առաջիկայում լսումներ հրավիրել, որը կվերաբերի ծննդատների ֆինանսավորման դադարեցման կամ, այլ կերպ ասած, փակման հարցին: Ըստ մեր տեղեկությունների՝ հանձնաժողովի ներկայացուցիչները փորձում են օրը հստակեցնել:

Բանն այն է, որ առաջիկա օրերին խորհրդարանում լիագումար նիստեր են ընթանում, ինչի համար լսումների օրվա հետ կապված խնդիր է առաջացել: Ըստ մեր տեղեկությունների՝ հանձնաժողովը պատրաստվում է ՀՀ առողջապահության նախարարին, ոլորտին առնչվող անձանց հրավիրել խորհրդարան՝ պարզաբանումներ պահանջելով՝ ծննդատների փակման որոշման հետ կապված:
Երեկ «Ժողովուրդ» օրաթերթը զրուցել է ԱԺ առողջապահության եւ սոցիալական հարցերի մշտական հանձնաժողովի անդամ Լուսինե Բադալյանի հետ։
-Տիկի՛ն Բադալյան, ԱԺ առողջապահության եւ սոցիալական հարցերի մշտական հանձնաժողովը պատրաստվում է լսումներ կազմակերպել ծննդատների փակման հետ կապված: Ինչպե՞ս է հանձնաժողովը վերաբերվում այդ որոշմանը, ի՞նչ եք պատրաստվում անել այդ մասով, քանի որ հանրությունը դեմ է, գրեթե ամեն օր բողոքի ակցիաներ են ընթանում մարզերում:
-Մինչեւ այս պահը իմ լսած պատճառաբանությունները դեռեւս չեն բավարարում ինձ, եւ դրա պատճառով մենք շուտով պատրաստվում ենք քննարկում շահագրգիռ կողմերի հետ, որպեսզի փորձենք պատճառները տեսնել: Պետք է քննարկում լինի. ես կարծում եմ, որ ծառայությունները պետք է մոտեցնել ժողովրդին եւ ոչ թե հեռացնել ժողովրդից: Այնտեղ պատճառաբանությունները, թե մասնագետի խնդիր կա, ինչի համար ֆինանսավորումից են զրկում: Այսինքն՝ եթե ծննդատունը ունի լիցենզիան, այսինքն նա պարտավոր է ծնունդ ընդունել. եթե հրատապ դեպք եղավ, եթե ֆինանսավորումից ենք զրկում, ապա այդ դեպքում ի՞նչ է լինում: Այսինքն՝ բուժկետրոնը կա՛մ իր հաշվին պետք է ծառայությունը մատուցի, կա՛մ հղին պետք է վճարի դրա համար, որովհետեւ այնտեղ պետական ֆինանսավորում չկա: Եթե պայմանները չեն բավարարում, ապա ես կարծում եմ, որ պետք է քննարկել լիցենզիայից զրկելու հարցը եւ ոչ թե ֆինանսավորումից զրկելու հարցը: Լսեցի հիմնավորումներից, որտեղ ասվում է՝ տեղ կա՝ տաք ջուր չկա, պայմաններ չկան, ապա կարելի էր այս հարցը մազպետարանների հետ լուծել, ասյինքն՝ ուղիղ համագործակցության արդյունքում՝ նախարարություն եւ մարզպետարան, այս խնդիրն էլ կարելի էր լուծել: Հիմա մենք ուսումնասիրում ենք, թե նույն Մարալիկի կենտրոնը, որը սպասարկում է հարակից մեկ տասնյակից ավելի գյուղերի, այդ գյուղերի հեռավորությունը Արթիկի ծննդատնից ինչքան է, այսինքն՝ մենք հիմա միայն խոսում ենք Մարալիկ 26կմ, բայց ցավերի մեջ գտնվող հղիի համար 26կմ այդ ճանապարհներով հասնելը բավականին ծանր է լինելու:
-Այսինքն՝ այս հարցերը դեռեւս չե՞ք ուղղել Առողջապահության նախարարությանը, որպեսզի պարզեք, թե ինչու են նման եզրահանգման եկել: Խոսե՞լ եք նախարարի հետ:
-Մենք չենք խոսել, նախարարի հետ հանդիպումը խմբակցության հետ կայացել է այն ժամանակ, երբ հանձնաժողովի նախագահը եւ հանձնաժողովի երկու ակտիվ անդամներ Հայաստանում չեն եղել, եւ մենք դրա մասին չենք իմացել: Մենք գտնվում էինք շատ կարեւոր գործուղման մեջ, հետեւաբար ես չեմ լսել, թե ինչ հարցեր են հնչել հանդիպման ժամանակ, եւ ինչպես է այդ հարցերին պատասխանել նախարարը:
-Դա՞ է պատճառը, որ նախարարին պատրաստվում եք հանձնաժողով հրավիրել:
-Ոչ միայն նրան, այլ նաեւ շահագրգիռ կողմերին, մեծ քննարկում ենք նախատեսում կազմակերպել, որպեսզի իմանանք՝ գուցե նախարարն այլ պատճառաբանություններ ունի: Ես իմ անձնական դիրքորոշումն եմ ներկայացնում: Այս ժամանակահատվածում ես հասցրեցի միջազգային փորձը ուսումնասիրել, բժշկության ամենազարգացած երկրների հետ կապվել՝ Գերմանիա, Շվեյցարիա, որտեղից որ բանավոր պատասխան ստացա, թե ցանկացած դեպքում որեւիցե ծննդատուն չի փակվում, ինվեստորներ են փորձում գտնել, որպեսզի զարգացնեն, այդ բացերը լրացնեն. եթե չեն գտնում, ապա ինչպես որ աշխատում է, թողնում են, որ այդպես էլ աշխատի: Ծննդօգնությունը ռազմավարական նշանակություն ունեցող երեւույթ է երկրի համար:
-Այս որոշումը, կարծես թե, դեմ է ՀՀ վարչապետ Նիկոլ Փաշինյանի՝ օգոստոսին Արցախում արած այն հայտարարությանը, թե մինչեւ 2050 թվականը պետք է կարողանանք Հայաստանի բնակչությունը հասցնել առնվազն 5 միլիոն մարդու: Առողջապահության նախարարությունը, կարծես թե, հակագործընթաց է իրականացնում:
-Դրա համար եմ նշում, որ պետք է այս ամենը շատ մանրամասն քննարկվի, որի համար մենք որոշել ենք նման քննարկում կազմակերպել, որովհետեւ, մի կողմից, մենք ասում ենք, որ Երեւանը ծանրաբեռնված է, եւ բեռնաթափելու խնդիր կա, եւ մենք կենտրոնանում ենք մարզերի զարգացման վրա, մյուս կողմից՝ որոշակի ծառայություններ հեռացնում ենք մարզերից: Այս դեպքում պետք է շատ երկար քննարկվի, հրատապ լուծումներ չտրվի: Պետք է լսել բոլոր կողմերին, որից հետո մենք կկարողանանք դիրքորոշում հայտնել. սա դեռեւս իմ անձնական կարծիքն է: Եթե ինչ-որ բան փչանում է, ես կարծում եմ, որ այն կարելի է սարքել:

ԱՇԽԱՏՈՒՄ ԵՆ, ԲԱՅՑ ԱՐԴՅՈՒՆՔ ՉԿԱ

ԱԺ Արարատի եւ Արմավիրի մարզերում Հայաստանի Հանրապետության տարածքային կառավարման եւ ենթակառուցվածքների նախարարության ջրային կոմիտեի, դրա կառուցվածքային ստորաբաժանումների եւ ջրային տնտեսության ծրագրերի իրականացման գրասենյակի գործունեության արդյունավետությունն ուսումնասիրող քննիչ հանձնաժողովի նախագահ, ԱԺ «Իմ քայլը» խմբակցության պատգամավոր Ծովինար Վարդանյանը «Ժողովուրդ» օրաթերթի հետ զրույցում հայտարարեց, որ դեռ ուսումնասիրում են ոլորտը:

-Տիկի՛ն Վարդանյան, ի՞նչ արդյունք ունի Ձեր ղեկավարած հանձնաժողովը, 6 ամսից ավելի է՝ ստեղծվել է հանձնաժողովը:
-Այս պահին ուսումնասիրում ենք վարկային պայմանագրերը, նաեւ ԾԻԳ-ի հետ կապված բոլոր փաթեթները, դրանք ենք ուզել Ջրային կոմիտեից, որտեղ կան բոլոր այն տեղեկությունները, թե ինչպես են տարբեր կազմակերպություններ մասնակցել մրցույթների: Այդ փաթեթներն ենք ուզել՝ հասկանալու համար՝ ընթացակարգերը ինչպես են եղել, ոնց են ընտրվել այն կազմակերպությունները, որոնք իրականացել են ծրագրերը, ինչու են մերժվել որոշները:
-Իսկ ինչո՞ւ է հանձնաժողովը դանդաղ տեմպերով աշխատում. կարելի է ասել, դեռեւս արդյունք չունեք, ինչո՞ւ:
-Կապված է փաստաթղթաշրջանառության հետ, քանակը շատ մեծ է փաթեթների, շատ մեծ ծավալի փաստաթղթեր են ,ու ես չեմ կարծում, որ այդ ամենը դանդաղ է ընթանում: Մենք վերցրել ենք երկու մարզ, ու այնտեղ երկու ջրօգտագործող ընկերություններ կան, ջրային կոմիտեն է, այսինքն՝ այստեղ առկա փաստաթղթերի քանակը, դրանց կապվածությունը, դրանց ուսումնասիրությունը շատ մեծ է ու ժամանակատար է:
-6 ամիսը բավարար չեղավ հանձնաժողովին, ու ավելացվել է եւս վեց ամիս: Ձեր կարծիքով՝ դա բավարա՞ր է քննիչ հանձնաժողովին իր լիակատար աշխատանքների իրականացման համար:
-Կարծում եմ՝ բավարար կլինի, որովհետեւ հիմա ավելի համակարգված պատկերացում ունենք, թե ինչ պետք է արվի, աշխատանքի բաժանումներ են տեղի ունեցել հանձնաժողովում, պատգամավորական խմբերն ամեն մեկը մի ոլորտ է ուսումնասիրելու, որն ավելի է հեշտացնելու աշխատանքը: Մեր նպատակն է խնդիրների վերհանումը, հասկանալ, թե ինչ ուղղություններով պետք է լինեն օրենսդրական նախաձեռնությունները: Իսկ եթե լինեն բացահայտումներ, ապա կտեղեկացնենք դրա մասին:

Նյութերը՝ ՍՈՆԱ ԳՐԻԳՈՐՅԱՆԻ

ՀԱՅՏՆԻ ԵՆ ԱՆՈՒՆՆԵՐԸ
Ինչպես հայտնի է, փետրվարից իր գործունեությունն է սկսելու Սահմանադրական բարեփոխումների մասնագիտական հանձնաժողովը: Այդ հանձնաժողովի կազմում խորհրդարանական խմբակցություններից ներկայացված է լինելու մեկական հոգի: Երեկ հայտնի դարձավ, որ «Լուսավոր Հայաստան» խմբակցությունը Սահմանադրական բարեփոխումների մասնագիտական հանձնաժողովի կազմում կներկայացնի խմբակցության պատգամավոր Տարոն Սիմոնյանը: Սակայն «Իմ քայլը» խմբակցությունը դեռեւս չի որոշել, թե ում է ներկայացնելու այդ հանձնաժողովի կազմում:
Լրագրողների հետ զրույցում խմբակցության ղեկավար Լիլիթ Մակունցը հայտնեց, որ առաջիկայում որոշում կկայացնեն, սակայն, ըստ էության, ներգրավված կլինի Պետաիրավական հարցերի հանձնաժողովի անդամներից որեւէ մեկը:
«Ժողովուրդ» օրաթերթի տեղեկություններով՝ ԲՀԿ-ն եւս արդեն որոշել է՝ ով կներկայացնի խմբակցությունը այդ հանձնաժողովում. նա կլինի պատգամավոր Սերգեյ Բագրատյանը:
Սակայն հետաքրքիր է, որ ՀՀ արդարադատության նախկին փոխնախարար Տիգրան Խաչիկյանի խոսքով՝ հանձնաժողովի կազմավորման կարգը սահմանող որեւէ իրավական որոշում չկա:

ԿՄՏԱԾԻ
Դեռեւս դեկտեմբերի 16-ին խորհրդարանում ստեղծվել էր ատելության խոսքի դեմ աշխատանքային խումբ, որը հայտարարել էր, թե իրենց խմբին կարող են միանալ ՀԿ-ներ: Երեկ արդեն ավարտվեց ժամկետը, որով սահմանվել էր աշխատանքային խմբին միանալու առաջարկը: «Ժողովուրդ» օրաթերթը տեղեկացավ, որ ընդամենը 10-12 ՀԿ են միացել խմբին: Եւ աշխատանքային խումբը պատրաստվում է դիմում գրել միջազգային իրավունքի մասնագետ Արա Ղազարյանին՝ խնդրելով նրան միանալ իրենց աշխատանքին:
«Ժողովուրդ» օրաթերթը զրուցել է Արա Ղազարյանի հետ՝ պարզելու՝ արդյոք կմիանա այդ խմբի աշխատանքներին: Նա ասաց, թե չի կարող պատասխանել մեր հարցին, դեռ պետք է մտածի:

ԵՐԿԱՐ ԿՏԵՎԻ
«Ժողովուրդ» օրաթերթը տեղեկացավ, որ Ազգային ժողովի երեկ մեկնարկած նստաշրջանը բավականին երկար է տեւելու: Բանն այն է, որ օրակարգում բավականին մեծ թվով նախագծեր են ընդգրկված, եւ քննարկումները երկարատեւ են լինելու: Երեկ պատգամավորները մասնավոր զրույցներում խոսում էին երկար օրակարգի մասին, եւ, ըստ էության, հետաքրքիր նախագիծ է համարվում Երեւան քաղաքի հարցով ստեղծվելիք քննիչ հանձնաժողովը, որը ղեկավարելու է ընդդիմադիր «Լուսավոր Հայաստան» խմբակցության պատգամավոր Անի Սամսոնյանը: Այստեղ բոլոր խմբակցությունները պետք է թեկնածուներ ունենան, որոնք կուսումնասիրեն՝ Երեւանի քաղաքապետ Հայկ Մարությանի գործունեության մեջ կոռուպցիոն տարրեր կան, թե ոչ: