«Ժողովուրդ» օրաթերթն օրեր առաջ գրել էր այն մասին, որ ազգությամբ ադրբեջանցի, կարգավիճակով սոպրանո Աննա Նետրեբկոյի ամուսին, երգիչ Յուսիֆ Էյվազովը հրաժարվել է փետրվարի 7-ին հանդես գալ Դրեզդենի ամենամյա օպերային պարահանդեսի բացման արարողությանը հայ երգչուհի Ռուզան Մանթաշյանի հետ՝ պատճառաբանելով վերջինիս հայ լինելը, այսինքն՝ քաղաքական նկատառումներով:
Համերգի կազմակերպիչ SemperOperaball կազմակերպությունը հերքել էր տեղեկությունը՝ դատապարտելով Էյվազովի հասցեին մեղադրանքները եւ նշելով, որ Ռուզան Մանթաշյանի հետ փետրվարի 7-ին կայանալիք համերգի վերաբերյալ պայմանագիր չի ունեցել։ Փոխարենը սոպրանո Ռուզան Մանթաշյանի հետ աշխատող «Աժանս Մասիս օպերա» գործակալությունը հունվարի 14-ին մեկնաբանել էր տեղի ունեցածը՝ պնդելով, որ Մանթաշյանի ելույթը չեղարկվել է ադրբեջանցի տենոր Էյվազովի ցանկությամբ: Երգչուհու ներկայացուցիչ Ռենե Մասիսը Semper Opernball-ի ղեկավար Հանս-Իոահիմ Ֆրեյին հորդորել էր ներողություն խնդրել Ռուզան Մանթաշյանից: Նա նշել էր, որ Ֆրեյը համառորեն շարունակում է իր տեսակետն արտահայտել զանգվածային լրատվամիջոցներով` չցուցաբերելով ճկունություն ու մնալով իր կարծիքին:
«Դուք կարեւորում եք Ձեր նախորդ միջոցառումներին բոլոր ազգերը ներկայացնող կատարողների, այդ թվում` հայերի մասնակցությունը: Մենք երբեք չենք վիճարկել այս իրողությունը, մենք նույնիսկ բացահայտ կերպով ողջունել ենք այն հունվարի 14-ի մեր մամլո հաղորդագրության մեջ: Ինչպես տեսնում եք, այս առումով մենք չենք վիճարկում Ձեր ու SemperOpernball-ի հեղինակությունը: Մյուս կողմից՝ առկա է հակասություն, որը ծագել է պարոն Էյվազովի կողմից տիկին Մանթաշյանի հետ «քաղաքական դրդապատճառներով» ելույթ ունենալուց հրաժարվելու հետեւանքով, ինչը հանգեցրեց մեր կատարողի հետ ձեռք բերված պայմանավորվածության չեղարկմանը»,-ասվում է հաղորդագրության մեջ:
Մանթաշյանի ներկայացուցիչը գրում է, որ կարելի է մտածել, որ Ֆրեյը ստիպված է եղել դա անել իր հրավիրյալ կատարողի անդրդվելի դիրքորոշման պատճառով:
Եղելությանն արձագանքել են հայ հայտնի արվեստագետներ: «Կարդում եմ նյութերը, վրդովմունքիս, զայրույթիս ձայնը բարձրացնում ու չեմ կարողանում հավատալ, որ նման ստոր, այլանդակ բան կարող է տեղի ունենալ արտիստիկ շրջանակներում, այն էլ՝ այսօր, Եվրոպայում, այն էլ՝ Գերմանիայի պես զարգացած երկրում»,-հայտարարել է դերասան Վարդան Պետրոսյանը՝ կոչ անելով ՀՀ արտաքին գործերի եւ ԿԳՄՍ նախարարություններին հանդես գալ համապատասխան կոշտ դիրքորոշմամբ:
Հայտնի օպերային երգչուհի Հասմիկ Պապյանը եւս դատապարտել է տեղի ունեցածը՝ շեշտելով, որ արհամարհվել են հայ երգչուհու շահերը, նրա անձին հասցվել է բարոյական վնաս: Երգչուհին եւս տեսակետ է հայտնել, որ Հայաստանի ԱԳՆ-ն կամ ԿԳՄՍ-ն կարող են նվազագույնը բողոքի նամակ հղել տվյալ հաստատությանը, որը բավարար կամք չի դրսեւորել այդ ամոթալի երեւույթը կանխելու համար:
«Ժողովուրդ» օրաթերթը ԱԳՆ մամուլի խոսնակ Աննա Նաղդալյանից հետաքրքրվեց՝ արդյոք նախարարությունը պատրաստվում է որեւէ կերպ արձագանքել տեղի ունեցածին: «Թեմային արձագանքելու է Կրթության, գիտության, մշակույթի եւ սպորտի նախարարությունը: Եթե պետական մի կառույցը ներկայացնում է հաղորդագրություն, դա արդեն կառավարության դիրքորոշումն է: Տվյալ դեպքում արձագանքով հանդես է գալու հենց ԿԳՄՍ-ն»,-պատասխանեց մեր զրուցակիցը:
ԿԳՄՍ նախարարի մամուլի քարտուղար Անժելա Կժդրյանն էլ իր հերթին մեզ տեղեկացրեց. «Նախարարությունը հենց սկզբից հետեւում է զարգացումներին, եւ հարցը մեր ուշադրության կենտրոնում է»:
Մնում է սպասել եւ տեսնել՝ մեր կառավարությունը հանդես կգա արդյոք կոշտ դիրքորոշմամբ եւ ցույց կտա իր «ողնաշարը»:
Հավելենք, որ ՀՀ Ազգային ժողովի պատգամավորները նամակ կհղեն Գերմանիայի Բունդեսթագ՝ հայ երգչուհի Ռուզան Մանթաշյանի ելույթը Դրեզդենում ադրբեջանցի երգչի քսենոֆոբիկ պահանջով կասեցնելու առնչությամբ. այս մասին հունվարի 21-ին Ազգային ժողովում հայտնել է «Իմ քայլը» խմբակցության անդամ Արթուր Մանուկյանը:
ԱՆՆԱ ԲԱԲԱՋԱՆՅԱՆ
ՀԻՄԱ ԷԼ «ՊԱՏՎԻ ՀԱՄԱՐ»-Ն Է ԷԿՐԱՆԱՎՈՐՎՈՒՄ
Արդեն հայտնի է, որ Սոս Ջանիբեկյանը, Մկրտիչ Արզումանյանը, Նարինե Պետրոսյանը, Անահիտ Կիրակոսյանը եւ այլք նկարահանվում են «Առաջին ալիքի» 16 մասանոց նոր հեռուստանովելում, որի ռեժիսորը Հրաչ Քեշիշյանն է: Նախագծի նկարահանումներն արդեն սկսվել են: Սոս Ջանիբեկյանը նկարահանումների առաջին օրվանից լուսանկար է հրապարակել եւ հայտնել, որ նոր ֆիլմը նկարահանվում է Շիրվանզադեի «Պատվի համար» դրամայի հիման վրա: Սցենարը գրել է դրամատուրգ Անահիտ Աղասարյանը: Մկրտիչ Արզումանյանը եւս լուսանկար է հրապարակել նկարահանման ընթացքից եւ մակագրել. «Աշխատում ենք»:
Դերասանուհի Նարինե Պետրոսյանը «Ժողովուրդ» օրաթերթի հետ զրույցում տեղեկացրեց, որ մարմնավորում է Էլիզբարյանների ավագ դստերը՝ Ռոզալիային. «Շատ գովելի է այն հանգամանքը, որ սկսել են էկրանավորվել հայ դասականների գործերը, եւ հանրության կողմից էլ հետաքրքրություն կա դրանց նկատմամբ: 16 մասանոց ֆիլմի ֆորմատը թույլ է տալիս մի փոքր շեղվել դասական մոտեցումներից եւ արդիականացնել թեման, կերպարները, իրավիճակները դարձնել մերօրյա, այսինքն՝ ֆիլմն ադապտացվում է մեր ժամանակների հետ: Ես խաղում եմ ցոփ ու շվայտ կյանքով ապրող աղջկա. չենք կարող միանշանակ ասել՝ դրական, թե բացասական կերպար է Ռոզալիան: Առաջարկը մեծ սիրով եմ ընդունել նաեւ այն պատճառով, որ ֆիլմի ռեժիսորը Հրաչ Քեշիշյանն է, որի հետ երկրորդ անգամ եմ աշխատում: Խաղալու եմ այնպիսի արտիստների հետ, ինչպիսիք են Ռաֆայել Քոթանջյանը, Ալեքսանդր Խաչատրյանը, Աննա Էլբակյանը. ինձ համար դա մեծ պատիվ է»:
Դերասանուհի Անահիտ Կիրակոսյանը նույնպես ուրախ է, որ անդրադարձ է կատարվում դասական հեղինակներին. «Լավ ռեժիսորի ու ճիշտ ընտրված դերասանների շնորհիվ հնարավոր է լինում երկրորդ շունչ հաղորդել արդեն հայտնի գործերին: Երիտասարդներից շատերն, առհասարակ, ծանոթ չեն այս գործերին եւ նմանատիպ ֆիլմերի միջոցով են ճանաչում հայ դասականներին: Սա կարող է այլընտրանք լինել անորակ պրոդուկտին, որը, ցավոք, մեծ վարկանիշ ունի մեր օրերում: Ու թեեւ իմ կերպարը գլխավորներից չէ, ուրախ եմ, որ մասնակցում եմ այս նախագծին»:
Հավելենք, որ ավելի վաղ «Առաջին ալիք»-ը ներկայացրել է «Քաոս» 16-մասանոց ֆիլմը՝ Շիրվանզադեի համանուն վեպի հիման վրա, եւ «Վերջին ուսուցիչը»՝ կրկին 16-մասանոց ֆիլմ՝ նկարահանված Վարդգես Պետրոսյանի համանուն վիպակի հիման վրա:
Ա. ԲԱԲԱՋԱՆՅԱՆ
.gif)
