Համաշխարհային ֆուտբոլը տեսել է մեծ մրցակցություններ, տեսել է մեծ ֆուտբոլիստների, աստղերի, որոնք հավերժ կմնան Նորին մեծություն ֆուտբոլի պատմության ոսկեզօծ էջերում` Պելե, Մարադոնա, Կրոյֆ, Վան Բաստեն եւ այսպես շարունակ: Նրանք համաշխարհային ֆուտբոլի լեգենդներն են, սակայն նրանք միշտ կհիշվեն առանձին-առանձին, հատ-հատ՝ որպես իրենց ժամանակաշրջանների լավագույնները:
Կրիշտիանու Ռոնալդու եւ Լեոնել Մեսսի. այս այլմոլորակայինները այս սպորտաձեւի պատմության մեջ կհիշվեն՝ որպես նույն ժամանակաշրջանի երկու լավագույններ: Արդեն 10 տարուց ավել է, ինչ նրանք մրցակցում են եւ չեն կորցնում իրենց տեմպը, շատ անգամներ են պարտվում, սակայն կարողանում են գտնել կամքի ուժն ու վերադառնալ ֆուտբոլային թատերաբեմ: Ֆուտբոլը չի ունեցել, եւ հնարավոր է, որ չունենա էլ նման գերմարզիկների:
Ինչքան էլ որ ցավալի է, ե՛ւ Ռոնալդուն, ե՛ւ Մեսսին արդեն մոտեցել են իրենց կարիերայի մայրամուտին, բայց, ի հեճուկս բոլորին, նրանք կարծես կարիերայի եզրագծին մոտենալիս երկրորդ երիտասարդությունն են ապրում: Կրիշտիանուն շատ շուտով կդառնա 35 տարեկան, սակայն ասել, որ այդ փաստը խանգարում է պորտուգալացուն, չի կարելի: Շատերը կորցնում են իրենց մարզավիճակը արդեն 30-ից հետո, շատերը նույնիսկ ավարտում են կարիերան կամ գնում Չինաստան՝ գումար աշխատելու (տրանսֆերային նոր սիստեմի պատճառով այլեւս չեն կարող ), իսկ Ռոնալդուն 35 տարեկանում շարունակում է հաղթանակներ պարգեւել Թուրինի «Ծեր սինյորային»: Ռոնալդուն «Պարմայի» դեմ խաղում, բացի մի շարք ռեկորդներ թարմացնելուց (անդրադարձել ենք թերթի նախորդ համարում), հեղինակեց նաեւ իր կարիերայի 736-րդ գոլը պաշտոնական խաղերում: Կրիշտիանուին այժմ առաջին հորիզոնականից բաժանում է ընդամենը 69 գնդակ, առաջատարը Յոսեֆ Բիցանն է: Լեո Մեսսին իր ակտիվում ունի խփած 717 գոլ: Սարսափելի է անգամ պատկերացնել, բայց այս տիտանները միասին պաշտոնական խաղերում հեղինակել են գրեթե 1500 գոլ:
Լեո Մեսսին արդեն 32 տարեկան է, եւ ըստ մի շարք հեղինակավոր պարբերականների՝ Լեոն, բացի այս մրցաշրջանից, «Բարսելոնայում» կանցկացնի եւս մեկը եւ կմեկնի Արգենտինա՝ վայելելու կյանքը՝ պաշտպանելով հարազատ քաղաքի ակումբի գույները: Եթե սա իրոք իրականանա, ապա ֆուտբոլը կզրկվի իր վերջին 14-15 տարիների գլխավոր զարդից՝ Կրիշտիանու-Լիոնել դիմակայությունից: Շատ-շատ են եղել դեպքեր, երբ ֆուտբոլային փորձագետները Ռոնալդուի եւ Մեսսիի ժամանակաշրջանը համարել են ավարտված, սակայն մեծարգո ժամանակը բոլորին դրեց իրենց տեղերում, իսկ Ռոնալդուին եւ Մեսսիին տարավ վերեւ՝ դեպի ֆուտբոլային երկնակամար:
Երբ 2015 թվականին Մադրիդի «Ռեալը» կորցրեց Լա Լիգայում չեմպիոն դառնալու շանսերը, իսպանական հեղինակավոր պարբերական AS-ը հաջորդ օրը լույս տեսավ Ռոնալդուի նկարով. վերնագիրն ավելի քան խոսուն էր՝ THE END, այո, հենց այդպես: Այդ օրվանից արդեն անցել է 5 տարի, իսկ Ռոնալդուն շարունակում է լռեցնել իր քննադատներին: Երբ 2008 թվականին աշխարհի լավագույն ֆուտբոլիստ ճանաչվեց Լուկա Մոդրիչը, շատերը շտապեցին վերջ դնել Ռոնալդուի եւ Մեսսիի կարիերաներին, սակայն ընդամենը մեկ տարի անց Լեո Մեսսին ստացավ իր 6-րդ «Ոսկե գնդակը» եւ կրկին ճանաչվեց լավագույնը: Դեռ նոր է մեկնարկել 2020 թվականը, ու առաջնագծում կրկին նրանք են: Իտալիայի Ա Սերիայում անցկացրած 3 խաղերում պորտուգալացին հեղինակել է 6 գոլ: Մեսսին իր ակտիվում դեռեւս ունի ընդամենը մեկ խփած գնդակ, բայց իր խաղով առաջ է տանում «Բարսելոնային»:
Պետք է փաստենք՝ Մեսսիի եւ Ռոնալդուի ժամանակաշրջանը դեռեւս չի ավարտվել, սակայն դա էլ այսքան մոտ երբեք չի եղել. ամեն լավ բան էլ մի օր ավարտվում է: Ռոնալդուի եւ Մեսսիի մրցակցությունը հավերժ կհիշվի ու հավերժ կփառավորվի:
ԷԴՄՈՆ ՄԱՐՏԻՐՈՍՅԱՆ
ԴԱՆԱԿԱՀԱՐԵԼ Է ՀՂԻԻՆ
ՀՀ քննչական կոմիտեի Լոռու մարզային քննչական վարչությունում ձեռնարկված քննչական գործողությունների արդյունքում բացահայտվել է 23-ամյա երիտասարդի կողմից կնոջ առողջությանը դիտավորությամբ ծանր վնաս պատճառելու դեպքը: Վերջինիս մեղադրանք է առաջադրվել: 2020թ. հունվարի 17-ին «Վանաձորի ԲԿ» ՓԲԸ-ից ՀՀ ոստիկանության բաժին հաղորդում է ստացվել, որ «որովայնի առաջնային պատի թափանցող եւ ձախ բազկի կտրած-ծակած վնասվածքներ» ախտորոշմամբ իրենց մոտ է տեղափոխվել Վանաձոր քաղաքի բնակչուհի՝ ծնված 1998թ.: Դեպքի առթիվ հարուցվել է քրեական գործ: 22-ամյա Վանաձոր քաղաքի բնակչուհին տուժող է ճանաչվել: Պարզվել է ենթադրյալ հանցագործություն կատարած անձի ինքնությունը, որը տուժողի ամուսինն է՝ ծնված 1997թ.: 23-ամյա երիտասարդը 2020թ. հունվարի 21-ին Վանաձոր քաղաքի Կ. Դեմիրճյան փողոցի շենքերից մեկի բնակարանում, տեղեկանալով կնոջ հղի լինելու մասին, պահանջել է բնակվել իր հետ, սակայն մերժում ստանալով՝ վիճաբանություն է սկսվել, որի ընթացքում երիտասարդը իր մոտ գտնվող դանակով հարվածել է կնոջը՝ վերջինիս առողջությանը դիտավորությամբ պատճառելով ծանր վնաս:
.gif)
