ՀՖՖ պաշտոնական կայքը հանդես է եկել կապված Հայաստանի Բարձրագույն խմբի եւ Առաջին խմբի առաջնությունները դադարեցնելու հետ: Հայտարարության մեջ նշված է, որ վերջնական որոշում կկայացվի վաղը` մարտի 13-ին.
«Հաշվի առնելով Կորոնավիրուսի տարածման նոր դեպքերը և աշխարհի տարբեր երկրներում մարզական միջոցառումների անցկացման հետ կապված սահմանափակումները՝ հայտնում ենք, որ Հայաստանի ֆուտբոլի ֆեդերացիան ամենօրյա կապի մեջ է ինչպես ՀՀ Առողջապահության նախարարության մասնագետների, այնպես ել ՈՒԵՖԱ-ի գործընկերների հետ:
Ըստ այդմ, հայտնում ենք, որ այս պահի դրությամբ Հայաստանի Բարձրագույն և Առաջին խմբերի առաջնությունների հանդիպումների հետաձգման վերաբերյալ որոշում չկա: Վաղը՝ մարտի 13-ին, հարցը կքննարկվի ևս մեկ անգամ, և կկայացվի համապատասխան որոշում:
Ինչ վերաբերում է Հայաստանի ազգային հավաքականի առաջիկա ընկերական հանդիպումներին, ապա ՀՖՖ-ն ամենօրյա կապի մեջ է նաև Ուզբեկստանի և Ղազախստանի ֆուտբոլի ֆեդերացիաների ներկայացուցիչների հետ: Այդ հանդիպումների անցկացման վերաբերյալ վերջնական որոշումը կկայացվի մարտի 17-ին, երբ ՀՖՖ նախագահը կմասնակցի ՈՒԵՖԱ-ի ներկայացուցիչների և ՈՒԵՖԱ-ի անդամ ասոցիացիաների նախագահների մասնակցությամբ օնլայն քննարկմանը»,- գրված է հայտարարության մեջ:
Հիշեցնենք, որ կորոնավիրուսի տարածման պատճառով դադարեցվել են Վրաստանի, Իտալիայի եւ Իսպանիայի առաջնությունները, իսկ Չեմպիոնների լիգայի, Եվրոպա լիգայի, Գերմանիայի եւ Ֆրանսիայի առաջնության մի շարք հանդիպումներ էլ անցկացվում են առանց հանդիսականների:
Հիշեցնենք նաեւ, որ Հայաստանի ազգային հավաքականի ընկերական հանդիպումները Ուզբեկստանի եւ Ղազախստանի հետ նախատեսված են համապատասխանաբար մարտի 26-ին եւ 30-ին:
Էդմոն Մարտիրոսյան
.gif)
