Հավաքած տվյալները արտակարգ դրությունից հետո կոչնչացնեն. իմքայլական պատգամավոր

Նախօրեին «Ժողովուրդ» օրաթերթը տեղեկացրել էր, որ խորհրդարանի իշխանական խմբակցությունում եւս եղել են պատգամավորներ, ովքեր ներքին քննարկումների ժամանակ դեմ են արտահայտվել ՀՀ պարետ Տիգրան Ավինյանի՝ խորհրդարան ուղարկած գաղտնալսման մասին նախագծին:

Որոշ պատգամավորներ, այդ թվում եւ Հովհաննես Հովհաննիսյանը, չէին մասնակցել քվեարկությանը: Սակայն ավելի ուշ իմքայլական պատգամավորները մի մարդու նման երկրորդ ընթերցմամբ եւ ամբողջությամբ ընդունեցին «Արտակարգ դրության իրավական ռեժիմի մասին» եւ «Էլեկտրոնային հաղորդակցության մասին» օրենքների փաթեթում փոփոխություն կատարելու մասին հարցը:

«Ժողովուրդ» օրաթերթը զրուցել է ԱԺ «Իմ քայլը» խմբակցության պատգամավոր Հովհաննես Հովհաննիսյանի հետ, որը նախօրեին անգամ չէր մասնակցել «Արտակարգ դրության իրավական ռեժիմի մասին» եւ «Էլեկտրոնային հաղորդակցության մասին» օրենքների փաթեթում փոփոխություն կատարելու մասին նախագծերի առաջին ընթերցման քվեարկությանը, բայց երկրորդ ընթերցման ժամանակ «կողմ» է քվերակել նախագծին: Փորձել ենք իմքայլական պատգամավորից պարզել, թե ինչու է փոխել իր դիրքորոշումը նախագծի վերաբերյալ, ու ինչու առանց ընդդիմադիրների նման օրենք ընդունեցին, երբ վերջիններս ամեն ինչ անում էին, որ քվեարկությունը տապալվի:

-Պարո՛ն Հովհաննիսյան, Դուք ինչո՞ւ որոշեցիք կողմ քվեարկել հանրությանը որպես գատնալսման նախագիծ հայտնի փաթեթին, երբ մի քանի օր առաջ անգամ չմասնակցեցիք նախագծի առաջին ընթերցման քվեարկությանը: Ինչո՞ւ մտափոխվեցիք, կամ ո՞վ մտափոխեց կամ ազդեց Ձեր քվեարկության վրա:

-Իմ նման մարդիկ, ովքեր հասարակական սեկտորում են աշխատել, մարդու իրավունքների պաշտպանության ոլորտում են աշխատել, իրենք երբեք կողմ չէին քվեարկի, նույնիսկ մոտ չէին գա նման նախագծին, բայց հիմա արտակարգ իրավիճակ է, ու այս պահին արտակարգ լուծումներ են պետք մեզ: Այո, առաջին ընթերցման ժամանակ ես չեմ քվեարկել, քանի որ ես առաջարկություններ ունեի նախագծում փոփոխություններ կատարելու առումով:

Հիմնական մտավախությունը բոլորինը նույնն էր, բայց, նախ, սկսենք նրանից, որ առաջին հերթին մանիպուլացվեց նախագիծը, երբ հայտարարվեց, թե սա գաղտնալսում է եւ այլն, իսկ գաղտնալսում բառը իրականում այս նախագծի հետ որեւէ աղերս չունի: Սա ընդամենը կոնտակտի, այն էլ մի քանի տվյալների արդյունքի կոնտակտի մասին է: Այսինքն՝ եթե կա վիրուսակիր, որն ունի կոնկրետ այդ հեռախոսը, եւ ինքը շփվել է մի քանի հոգու հետ, խոսել է նրանց հետ, ու ինքն էլ հայտնաբերվել է՝ որպես վարակակիր, զանգում են տվյալ մարդկանց, ում հետ ինքը խոսել է, ու տեղեկացնում են դրա մասին: Բայց նախ եւ առաջ այդ մարդուն են ասում՝ արդյոք խոսե՞լ ես ընդամենը, թե՞ նաեւ տեսել ես: Եթե պարզվում է այդ շրջանակը, ում հետ շփվել է վարակակիրը, ապա ասում են՝ գնա՛, մեկուսացի՛ր, որովհետեւ դու, հնարավոր է, խնդիր ուենաս, ու իրեն պահում են հսկողության տակ:

-Բայց ինչո՞ւ ի սկզբանե Դուք դա չհամարեցիք նորմալ ու նախագծին կողմ չքվեարկեցիք, եթե կարծում եք, որ դա անձնական տվյալների հավաքագրում չէ, առավել եւս գաղտնալսում չէ: Որպես օրենսդիր մարմնի ներկայացուցիչ՝ ինչո՞ւ էիք սկզբում մերժում նախագիծը:

-Սկզբում, այո, ինձ մտահոգում էր այդ տվյալների մասին տեղեկությունը, ես չգիտեի՝ դա ինչպես են ոչնչացնելու, եւ ինչ մեթոդով է դա իրականացվելու: Իսկ արդեն հստակ է, որ մեկ ամսից հետո՝ արտակարգ դրության ավարտից հետո, այդ ամբողջ տվյալները ոչնչանալու են: Ինձ մտահոգում էր դա, թե ով է ոչնչացնելու՝ արդյոք տվյալ կազմակերպությունը, որը տվյալ է հավաքում, ինքն է ոչնչացնելու, թե այլ մարդիկ. այդտեղ մի քիչ անվստահության էլեմենտ կար:

-Իսկ ինչպե՞ս վստահ լինենք, որ իսկապես այդ տվյալները չեն հայտնվելու ինչ-որ մեկի ձեռքի տակ, ու այն իսկապես ոչնչացվելու է, ի՞նչ մեխանիզմով եք դա իրականացնելու:

-Ես առաջարկեցի, որ ընդդիմության ներկայացուցիչների ներառմամբ, նաեւ առաջարկեցի, որ մասնագիտական կազմակերպությունները, հասարակական կազմակերպությունները ներառվեն այդ պրոցեսում: Այնուհետեւ ԱԺ-ում հաշվետվություն ներկայացվի, որ, այո, մենք տեսել ենք՝ այդ տվյալները ոչնչացվել են, որից հետո ոչ ոքի մոտ կասկած չի նման այդ հարցի հետ կապված:

Օրինագծում ներառել էին, որ ընդդիմության ներկայացուցիչների ներկայությամբ է դա տեղի ունենալու, իսկ բանավոր կերպով համաձայնեցինք, որ կարգը, ինչը պետք է բխի օրենքից, այնտեղ կներառվեն նաեւ մասնագետները, ՀԿ սեկտորը: Ավելին ասեմ՝ պարետն ասում էր, որ ով ցանկանում է, թող գա, մենք խնդիր չունենք այս պահին՝ այդ խնդիրների ոչնչացման պրոցեսի հետ կապված: Մեր պրոբլեմը դա չի, մեր պրոբլեմն այսօր վարակակիրների արագ հայտնաբերումն է, հետո ուզում են, կարող են հազար մասնագետներով գնան այդ տվյալները ոչնչացնեն:

-Ձեր խմբակցությունը ՀՀ պարետ Տիգրան Ավինյանի հետ ներքին քննարկումներ է ունեցել, խնդրում եմ նշեք՝ արդյոք պարետն այնպիսի մտահոգող տեղեկություն է տվել վիրուսի տարածման եւ կանխարգելման հետ կապված, ինչի համար Ձեր խմբակցությունը արտահերթ նիստեր հրավիրեց, առանց ընդդիմության ներկայության այդ նախագծերը ընդունեց՝ կրկնելով նախկին իշխանությունների վարքագիծը: Ինչո՞ւ գնացիք նման քայլի, ի՞նչ անհանգստացնող տեղեկություն ունեք:

-Գիտեք, որ ասեմ ինչ-որ շատ վտանգավոր է, կամ հասարակությունից ինչ-որ բան թաքցվում է, ապա չկա նման բան, այսինքն՝ մենք գիտենք այն նույն ինֆորմացիան, ինչ գիտի հանրությունը: Որեւէ այլ բան մենք չգիտենք: Մտահոգվում է ամբողջ աշխարհը, ու դա միայն մենք չէ, որ մտահոգվելու առիթ ունենք: Նույն այդ համալիրի լուսանկարը, որտեղ տեղադրված են մահճակալները, դրանք կանխարգելիչ, նախապատրաստական միջոցառումներ են, որոնք իրականացնում է պետությունը: Կառավարությունը ամեն սցենարի պետք է պատրաստ լինի: Ամեն ինչ կախված է քաղաքացու զգոնությունից:

Զրուցեց ՍՈՆԱ ԳՐԻԳՈՐՅԱՆԸ