COVID-19 կորոնավիրուսի տարածման պատճառով ֆուտբոլային գրեթե բոլոր առաջնությունները շարունակում են մնալ դադարեցված։ Դադար է ֆուտբոլային աշխարհում, որն էլ ակումբները փորձում են օգտագործել իրենց տրանսֆերային ծրագրերը կազմելու համար։ Առջեւում ամառային տրանսֆերային պատուհանն է, որը խոստանում է լինել սպասվածից շատ ավելի թեժ։ ArmLur.am-ը առաջարկում է ծանաթանալ տրանսֆերային վերջին նորություններին։
«Լիվերպուլը» հրաժարվել է Վերներին գնելու մտքից
Անգլիական «Լիվերպուլը» սառեցրել է բոլոր բանակցությունները գերմանական «Լեյպցիգի» հետ՝ հարձակվող Տիմո Վերների տեղափոխության հետ կապված։ Ինչպես տեղեկացնում է Daily Mail-ը ՝ գերմանացին շատ մոտ է եղել անգլիական ակումբ տեղափոխվելուն, սակայն վերջինիս տրանսֆերային արժեքը COVID-19-ի պատճառով ստեղծված ճգնաժամի արդյունքում «կարմիրները» պատրաստ չեն վճարել։
Գերմանացու համար պահանջվող գումարը կազմում է 51 մլն ֆունտ ստերլինգ։ Ըստ աղբյուրի՝ «Լիվերպուլը» կսպասի մինչեւ համաճարակի ավարտը, որից հետո կկայացնի որոշում՝ գնահատելով ստեղծված իրավիճակը։
«Մանչեստեր Յունայթեդը» կպայքարի Իվան Ռակիտիչի համար
Անգլիական «Մանչեստեր Յունայթեդը» ամառային տրանսֆերային պատուհանի ընթացքում կփորձի գնել կատալոնական «Բարսելոնայի» խորվաթ կիսապաշտպան Իվան Ռակիտիչի տրանսֆերը։
Ինչպես տեղեկացնում է իսպանական Marca-ն , «Բարսելոնան» 20մլն եվրո է պահանջում կիսապաշտպանի դիմաց։ Հիշեցնենք, որ Ռակիտիչի պայմանագիրը կատալոնական ակումբի հետ ավարտվում է 2021 թվվականի ամռանը։
«Բարսելոնան» ամեն գնով ցանկանում է խորվաթից ազատվել առաջիկա ամռանը, քանի որ 2021 թվականին Ռակիտիչը թիմից կհեռանա որպես ազատ գործակալ, որի արդյունքւոմ էլ «բլաուգրանան» ֆինանսական շահույթ չի ունենա։
Մբապեն շարունակում է մնալ «Ռեալի» դիտակետում
Մադրիդի «Ռեալը» առաջիկա տրասֆերային պատուհանի ընքացքում կփորձի գնել ֆրանսիական ՊՍԺ-ի աստղային հարձակվող Կիլիան Մբապեին։ Ֆրանսիացին արդեն 2 անգամ հասցրել է մերժել «սերուցքայիններին», բայց դա վերջիններիս ամենեւին էլ չի ստիպում մոռանալ Կիլիանին ձեռքբերելու մտքից։ Ինչպես տեղեկացնում է իսպաական AS-ը՝ Մբապեն առաջիկա ամառային տրանասֆերային պատուհանի ընթացքում կրկին կլինի Ֆլորենտինո Պերեսի գլխավոր նպատակը։ Ամեն դեպքում, այս տրանսֆերի իրականացումը առաջիկա ամռանը քիչ հավանական է, քանի որ ՊՍԺ-ն աստղաբաշխական գումար կպահանջի Մբապեի տրանսֆերի դիմաց, Մբապան էլ ՝ աստղաբաշխական աշխատավարձ։ Մեծ հարց է ՝ «Ռեալը» կկարողանա՞ բավարարել երկու կողմերի պահանջները ստեղծված ճգնաժամի պատճառով։
«Բավարիան» հետեւում է տեր Շտեգենի շուրջ զարգացող իրադարձություններին
Կատալոնական «Բարսելոնայի» գերմանացի դարպասապահ Մարկ-Անդրե տեր Շտեգենը դեռեւս չի կարողանում համաձայնության գալ իր ներկայիս ակումբի հետ նոր պայմանագրի կնքման հարցում։ Ինչպես տեղեկացնում է Sport-ը՝ դարպասապահը կատալոնական ակումբից պահանջում է աշխատավարի բարձրացում, ինչն էլ ձգձգում է պայմանագրի կնքումը։ «Բարսելոնան» չի ցանկանում կրկնապատկել գերմանացու աշխատավարձը եւ փորձում է ավելի շահավետ համաձայնության գալ։ Ըստ աղբյուրի՝ տեր Շտեգենի շուրջ զարգացող իրադարձություններին ուշի-ուշով հետեւում է Բունդեսլիգայի գործող չեմպիոնը՝ Մյունխենի «Բավարիան»։
Ժեժուսը՝ «Յուվենտուսի» դիտակետում
Անգլիական «Մանչեստեր Սիթիի» բրազիլացի հարձակվող Գաբրիել Ժեժուսը կարող է կարիերան շարունակել Թուրինի «Յուվենտոսում»։ Այս մասին տեղեկացնում է CalcioMercato-ն։ Նշվում է, որ Իտալիայի գործող չեմպիոնը պատրաստ է «Քաղաքայիններին» զիջել Դուգլաս Կոստայի տրանսֆերը։ Իտալական ակումբը ցանկանում է իր կազմում ունենալ երիտասարդ հարձակվող, քանի որ թիմի ֆուտբոլիստներ Գոնսալո Հիգուայինը եւ Կրիշտիանու Ռոնալդուն գտնվում են ֆուտբոլային պատկառելի տարիքում։ Ըստ աղբյուրի՝ թուրինյան թիմը Ժեժուսին տեղ է խոստացել մեկնարկային կազմում։ Հիշեցնենք, որ Դուգլաս Կոստան Պեպ Գվարդիոլայի գլխավորությամբ հանդես է եկել Մյունխենի «Բավարիայում։
«Ռեալը» պայմանագիր կառաջարկի Ֆաբիան Ռուիսին
Իտալական «Նապոլիի» ֆուտբոլիստ Ֆաբիան Ռուիսի գործակալ Ալվարո Տորեսը հաստատել է, որ իր հաճախորդը հայտնվել է Մադրիդի «Ռեալի» ուշադրության կենտրոնում․«Այո, ճիշտ է, որ «Ռեալը» հետաքրքրվում է նրա ծառայություններով։ Մենք դրա մասին տեղեկացրել ենք «Նապոլիին», բայց այժմ Ռուիսը պետք է կենտրոնանա իր ներկայիս ակումբի վրա։ Ամռանը կտեսնենք․ նա կիսապաշտպան է, ով կարող է նշանավորել մեկ աբողջ դարաշրջան»,- Տորեսի խոսքերն է փոխանցում Canal Sur Radio-ն։ Հիշեցնենք, որ Ռուիսի ծառայություններով հետաքրքրված են նաեւ կատալոնական «Բարսելոնան» ու անգլիական «Լիվերպուլը»։
«Տոտենհեմի» տրանսֆերային նպատակը Արկադյուշ Միլիկն է
Լոնդոնի «Տոտենհեմը» ցանկանում է ձեռքբերել իտալական «Նապոլիի» հարձակվող Արկադյուշ Միլիկին։ Այս մասին տեղեկացնում է football.london-ը։ Ըստ աղբյուրի՝ Միլիկը կմերժի իտալական ակումբի կողմից պայմանագիրը երկարաձգելու յուրաքանչյուր առաջարկ, քանի որ ցանկանում է փոխել ակումբային գրանցումը։ Լեհ հարձակվողի տրանսֆերը գնահատվում է 35մլն ֆունտ ստերլինգ։ Չի բացառվում նաեւ, որ «Տոտենհեմը» Միլիկին կփորձի թիմ հրավիրել արդեն 2021 թվականի ամռանը, երբ կավարտվի ֆուտբոլիստի եւ նեապոլիտանական ակումբի միջեւ գործող պայմանագիրը։
Էդինսոն Կավանիի ծառայություններով հետաքրքրված են մի շարք ակումբներ
Ֆրանսիական ՊՍԺ-ի ուրուգվայցի հարձակվող Էդինսոն Կավանին ամենայն հավանականությամբ ամռանը կլքի փարիզյան թիմը։ Ֆուտբոլիստի ծառայություններով հետաքրքրված են մի շարք ակումբներ, այդ թվում՝ ֆուտբոլիստի նախկին ակումբը՝ իտալական «Նապոլին»։ Կավանիի գործակալ Ուոլտեր Գուգլիելմոնեն հայտնել է, որ «Նապոլին» դեռեւս ոչ մի առաջարկ չի կատարել ուրուրգվայցուն․«Անկեղծ ասած, ամեն բան կարող է տեղի ունենալ, քանի որ Էդինսոնով հետաքրքրված են շատ ակումբներ։ «Նապոլիի» հետ դեռեւս ոչ մի շփում չի եղել։ Կավանիի ավագան Հարավային Ամերկայու՞մ․ ամեն ինչ կարող է պատահել։ Բրազիլիայում էլ կան ակումբներ, որոնք հետաքրքրված են նրա ծառայություններով, օրինակ՝ «Ֆլամենգոն», «Պալմեյրասը»,«Ինտերնացիոնալը»։ Արգենտինայում էլ ՝ «Բոկա Խունիորսը»,- Գուգլիելմոնեի խոսքերն է փոխանցում CalcioNapoli-ը։
Պեդրոն՝ Մխիթարյանի այլընտրանք
Լոնդոնի «Արսենալը» մերժել է իտալական «Ռոմային» ՝ Հայաստանի ազգային հավաքականի ավագ Հենրիխ Մխիթարյանի ամբողջկան տրանսֆերը գնելու առաջարկը։ Ինչպես տեղեկացնում է The Express-ը Հենրիխ Մխիթարյանը նույնպես ցանկանում է մշտական հիմունքներով համալրել հռոմեական ակումբի շարքերը, սակայն լոնդոնյան թիմի պահանջած գումարը «Ռոման» պատրաստ չէ վճարել։ Ըստ աղբյուրի՝ «Զինագործները» Մխիթարյանի ամբողական տրանսֆերի դիմաց պահանջում են 18մլն ֆունտ ստերլինգ։
Նշվում է, որ ստեղծված իրավիճակից ելնելով «Գայլերը» իրենց հայացքը կուղղեն դեպի Լոնդոնի կապույտ հատված՝ «Չելսի»։ Եթե «Ռոման» չկարողանա համաձայնության գալ «Արսենալի» հետ, ապա կհրաժարվի Մխիթարյանի տրանսֆերը գնելու մտքից եւ առաջարկ կկատարի «Չելսիի» իսպանացի ֆուտբոլիստ Պեդրոյին։ Հռոմում կարծում են՝ կկարողանան «կապույտների» Պեդրոյի տրանսֆերը համաձայնեցնել ավելի քիչ գումարով քան 18մլն ֆունտ ստերլինգն է։
Էդմոն Մարտիիրոսյան
.gif)
