Հակակշիռը ո՞րն է, չաջակցե՞լը․ չեմ կարծում, թե դա լուրջ է․ Թագուհի Ղազարյանը՝ քննադատությունների մասին

ArmLur.am-ը զրուցել է ԱԺ «Իմ քայլը» խմբակցության պատգամավոր Թագուհի Ղազարյանի հետ։

-Տիկի՛ն Ղազարյան, կառավարության և իշխանության ձեռնարակած սոցիալական աջակցության փաթեթներին ընդդիմադիրները բավականին քննադատորեն են արձագանքում, մասնավորապես լայն քննադատվեց կառավարության աջակցության 11-րդ ծրագիրը։ Դուք ինչպե՞ս եք պատասխանում ձեզ քննադատողներին։

-Չեմ կարծում, թե Կառավարության 11-րդ աջակցության ծրագրի շուրջ մեծ քննադատություն կա։ Ընդհակառակը, շահառուների մեծ թիվ ունի այս ծրագիրը, ինչը քաղաքացիները դրական են ընդունում և ողջունում։ Այդ շրջանակում այսօր ևս մեկ ծրագիր ընդունվեց, և եթե անգամ կարող էին քննադատություններ լինել մինչ այդ, ապա դրանք պիտի որ դադարած լինեն այս վերջին որոշումից հետո։ Առհասարակ աջակցության ծրագրերի նկատմամբ քննադատությունը շատ ծանրակշիռ չի կարող լինել։ Դրանց հակակշիռը ո՞րն է․ չաջակցելը՞։ Չեմ կարծում, թե դա լուրջ է։ Մենք ու Կառավարությունը մեր աշխատանքն ենք անում, այն է՝ Արտակարգ դրության պայմաններում ապահովել քաղաքացիներին, որպեսզի միասին հաղթահարենք այս իրավիճակը հնարավորինս քիչ վնասներով։ Մենք մանրամասնորեն անդրադառնում ենք այն բոլոր խնդիրներին, որոնք առաջացել են քաղաքացիների մոտ այս օրերի սահմանափակումների արդյունքում և կրկնվող խնդիրների դեպքում դրանց համակարգային և համապարփակ լուծումներ ենք տալիս։ Այս գործընթացը շարունակական է։ Իսկ արդեն գործարկված աջակցության ծրագրերը, բնականաբար, չեն չեղարկվելու միայն այն պատճառով, որ մի խումբ քաղաքացիներին աջակցելը կարող է որևէ մեկի սրտով չլինել։

-Ձեզ որպես պատգամավոր քննադատում և մեղմ ասած մեղադրում են պասիվ գործունեություն ծավալելու մեջ։ Ի՞նչն է Ձեզ խանգարում որպեսզի ավելի ակտիվ և տեսանելի գործունեություն ծավալեք քաղաքական դաշտում։

-Ես Ազգային ժողովի մարդու իրավունքների պաշտպանության և հանրային հարցերի մշտական հանձնաժողովի անդամ եմ։ Իմ oրակարգերը, տրամաբանորեն, ուղիղ կապված են մարդու իրավունքների հետ։ Կարծում եմ բավականին հետևողական եմ մարդու իրավունքների ոլորտում տարվող քաղականությունների ու օրակարգերի հարցում թե՛ Կառավարության, թե՛ քաղաքացիական հասարակության հետ աշխատանքներում։ Դուք առաջին մարդն եք, ով հայտնում է ինձ նման վերապահումների մասին, խոստանում եմ հետայսու ավելի ուշադիր լինել այդ քննադատությունները հայտնաբերելու հարցում, որովհետև ոլորտային շահագրգռություն ունեցող կողմերից նման խնդրի բարձրաձայնման չեմ հանդիպել։

-ՀՀ Քաղավիացի շուրջ ստեղծված իրավիճակը ո՞նց եք գնահատում, ո՞ւմ եք համարում խնդրի պատասխանատու։

-Քանի որ դեռևս բավականաչափ խորությամբ չեմ ուսումնասիրել Ձեր մատնանշած հարցը, այս պահին ձեռնպահ կմնամ պնդումներ անելուց։ Խոստանում եմ հետագայում պատեհ առիթով անդրադառնալ դրանց։ Այնուամենայնիվ , խնդրի մասին քաղավիացիայի ղեկավարը տվել է մանրամասն պարզաբանում, ու իմ տպավորությամբ Կոմիտեն ամբողջությամբ տիրապետում է իրավիճակին։

-Երեկ, Ամենայն Հայոց կաթողիկոս Գարեգին երկրորդի հայտարարությանը ո՞նց եք վերաբերվում՝ ՀՀ երկրորդ նախագահ Ռոբերտ Քոչարյանի խափանման միջոցը փոխելու վերաբերյալ։

-Հայաստանի Հանրապետությունը աշխարհիկ պետություն է, այստեղ, բարեբախտաբար, արդեն երկար տարիներ գոյություն ունեն արդարադատության իրականացման համար պատասխանատու մարմիններ, մինչդեռ փորձը ցույց է տվել, որ եկեղեցու միջամտությունը արդարադատության իրականացմանը դրական արդյունքների չի հասցրել իմ դիտարկմամբ։ Կարծում եմ՝ եկեղեցին այլ առաջնահերթություններ պետք է ունենար, և տեսնում էլ եմ, որ հայ առաքելական եկեղեցու հետևորդները այլ  ակնկալիքներ ունեն եկեղեցուց և հոգևոր առաջնորդից։

զրուցեց Լիդա Եղիազարյան