«Մարտի 1»-ի գործով նախկին քաղբանտարկյալ Գեւորգ Մանուկյանը ArmLur.am-ի հետ զրույցում պատմել է, թե իր եւ ընտանիքի դեմ սպառնալիքներով արշավ է սկսել Էջմիածնի քաղաքապետ Դիանա Գասպարյանի քեռին՝ Գարիկ Չիլինգարյանը, որը նաեւ ՍԴ անդամ Ալվինա Գուլումյանի ազգականն է:
«Մի քանի օր առաջ՝ գիշերը՝ Ֆրանսիայի ժամանակով ժամը 22:11 րոպեին, ես ստանում եմ հերթական սպառնացող հաղորդագրությունը Էջմիածնի գործող քաղաքապետ Դիանա Գասպարյանի հարազատ քեռու կողմից: Առաջին հայացքից սա սովորական թվացող հեռահար կռիվ է, իսկ իրականում այս պատմության արմատները տանում են 2008 թվի մարտյան իրադարձություններ, չկա այլ տարբերակ: Կարծում եմ, որ Էջմիածնի քաղաքապետ Դիանա Գասպարյանի հարազատների կողմից ուղղորդված իմ վրա ինտենսիվ հարձակումները միայն նրա համար են, որ ես երբեք չպահանջեմ 2008 թվի մարտի 1-ի բացահայտումը: Ես պատասխանատու կերպով հայտարարում եմ՝ Էջմիածնի քաղաքապետ Դիանա Գասպարյանը 2008 թվի մարտի մեկի գործը կոծկողներից է եղել, ունեմ համապատասխան փաստեր, առաջիկայում ավելի մանրակրկիտ կներկայացնեմ կոնկրետ իր դերակատարությունը դրա մասին, առայժմ այսքանը»,-նշել է նա:
Մեր զրուցակցի փոխանցմամբ՝ սույն թվականի փետրվարի 26-ին Գարիկ Չիլինգարյանը Գեւորգ Մանուկյանի ծանոթներից մեկի ֆեյսբուքյան էջին հնչեցրել է այն բառերը, որոնք վերջերս Ալեն Սիմոնյանին ասել էր «Ադեկվատ» շարժման անդամ Արթուր Դանիելյանը:
«Բայց քանի որ ես ֆիզիկապես չէի կարող իր այդ բառի համար իր քիթը ջարդել, որոշեցի նմանատիպ ձեւով իրեն հակադարձել հենց տիկին Գասպարյանի ֆեյսբուքյան էջում, այսինքն՝ վիրավորել, ոչ թե սպառնալ, ինչը տարբեր բաներ են: Մինչ այդ ես դիմեցի տիկին Գասպարյանի եւ իր քեռու մի ուրիշ ազգականի, ում հանդեպ ժամանակին հարգանք եմ ունեցել, եւ խնդրեցի, որ նման արտահայտության համար տիկին Գասպարյանը եւ իր քեռին ինձանից եւ իմ հարազատներից հրապարակավ ներողություն խնդրեն, սակայն բացասական պատասխան ստացա, իսկ ինձ այլ բան չէր մնում, քան համարժեք պատասխան տալը, այնուհետեւ տիկին Գասպարյանի քեռին՝ նույն ինքը Գարիկ Չիլինգարյանը, ինձ անձնական նամակով սպառնալիքներ հնչեցրեց, մեկ անգամ՝ երեկ՝ Ֆրանսիայի ժամանակով 13:44-ին, եւ գիշերը՝ 22:11-ին: Ի դեպ, սա Դիանա Գասպարյանի հարազատների կողմից իմ հասցեին սպառնալիքներ հնչեցնելու առաջին դեպքը չէ: Կարծում եմ՝ դա շարունակական բնույթ կկրի այնքան ժամանակ, քանի դեռ իրենք չեն պատժվում իրենց արարքների համար, եւ քանի դեռ ես պահանջում եմ 2008 թվականի մարտի 1-ի բացահայտումը: Ի դեպ, ավելացնեմ, որ ես հիմնավոր կասկածներ ունեմ, որ Դիանա Գասպարյանը եւ Ալվինա Գուլումյանը ակտիվ մասնակցություն են ունեցել 2008 թվի մարտի 1-ի շինծու քրեական գործը կոծկելու կապկացությամբ, սպորտային լեքսիկոնով ասած՝ պասերով են խաղացել, Ալվինա Գուլումյանը՝ Եվրոպական դատարանում, Դիանա Գասպարյանը՝ Հայաստանում: Իմ ձեռի տակ է հայտնվել մի տեսահոլովակ, որտեղ Դիանա Գասպարյանը հարցազրույց է տալիս առ այն, որ ինքը նախկինում աշխատել է մի կառույցում, որտեղ պատասխանել են Եվրոպական դատարանի պաշտոնական հարցումներին, եւ այլն»,-հավելեց մեր զրուցակիցը:
ArmLur.am-ը Գեւորգ Մանուկյանի հայտարարությունների շուրջ փորձեց մեկնաբանություն ստանալ նաեւ Էջմիածնի քաղաքապետ Դիանա Գասպարյանից.
«Ես խնդրում եմ Գեւորգ Մանուկյանին լինել ազնիվ եւ հրապարակել նաեւ այն կեղտոտ, զազրելի հայհոյանքները, որ նա հասցնում է իմ ընտանիքի անդամներին, եւ ազնիվ լինելով՝ ասել, որ այդ գրառումները դրանց պատասխաններն են, ազնիվ չէ պրովակացիայի ենթարկել՝ հրապարակելով միայն պատասխանները: Եթե Գեւորգ Մանուկյանը կարծում է, որ որեւէ խնդիր կա օրենքի հետ, ապա թող դիմի իրավապահ մարմիններին»:
Հիշեցնենք, որ Գեւորգ Մանուկյանը նախկին քաղբանտարկյալ է, ապրում է Ստրասբուրգում: Մարտի 1-ի չարաբաստիկ դեպքերի ժամանակ Գեւորգը կորցրել է աջ աչքի տեսողությունը:
ԼԻԴԱ ԵՂԻԱԶԱՐՅԱՆ
ԳՐԱՆՑՄԱՆ ՆՈՐ ԿԱՐԳ
Այս տարի ՀՀ պետական բոլոր հանրակրթական դպրոցներում առաջին դասարանցիների ընդունելությունը կատարվելու է առցանց համակարգի միջոցով. հայտնել են ՀՀ ԿԳՄՍ նախարարությունից: Բոլորի համար հավասար մեկնարկային պայմաններ ապահովելու նպատակով յուրաքանչյուր ծնող աշխարհի ցանկացած ծայրից իր երեխային կարող է առցանց համակարգով գրանցել պետական հանրակրթական դպրոցներում առաջին դասարան հաճախելու համար:
Մայիսի 8-ին՝ առավոտյան ժամը 9:00-ից սկսած, ծնողներն իրենց անձնական տվյալների առկայությունն ու ճշգրտությունը պետք է ստուգեն համապատասխան համակարգով՝ մուտք գործելով stugum.emis.am կայք: Այստեղ բացվում է երկու դաշտ, որտեղ պետք է մուտքագրվի ծնողի եւ երեխայի հանրային ծառայությունների համարանիշը: Եթե ծնողը մուտքագրել է հանրային ծառայությունների համարանիշը, սակայն ստացել է պատասխան՝ համակարգը չի հայտնաբերի ծնող-երեխա կապը, ապա ծնողին կառաջարկվի կայքում համապատասխան կոճակին սեղմելու միջոցով տվյալները փոխանցել ՔԿԱԳ, որպեսզի դրանք թվայնացվեն:
Հունիսի 1-ից՝ ժամը 9:00-ից սկսած, hayt.emis.am կայքում կմերկնարկի բուն հայտագրման գործընթացը: Այս տարի սահմանվել է առաջնահերթություն: Հունիսի 1-10-ն ընկած ժամանակահատվածում կհերթագրվեն հետեւյալ հայտատուները՝
1-ին դասարան գնացող երեխայի ծնողներից մեկը տվյալ դպրոցի աշխատակից է,
- 1-ին դասարան գնացող երեխան ունի տվյալ դպրոցում արդեն սովորող հարազատ քույր կամ եղբայր:
Հունիսի 11-ից՝ ժամը 9:00-ից սկսած, կկարողանան գրանցվել նրանք, ովքեր չեն համապատասխանում վերոնշյալ երկու կետերին:
ԿՉԵՂԱՐԿՎԵՆ ՄԻՋՈՑԱՌՈՒՄՆԵՐԸ
ԱՀ պարետ, պետական նախարար Գրիգորի Մարտիրոսյանը Եռատոնին ընդառաջ հանդես է եկել կոչով. «Նոր կորոնավիրուսի համավարակը մեծ մարտահրավեր է առաջադրել պետություններին, եւ դրա հաղթահարումը, հանրային առողջության ապահովումն ու պարզապես մարդկային կյանքեր փրկելը դարձել է պայքարի ամենօրյա օրակարգ: Առջեւում մայիսի 9-նն է՝ Արցախի պաշտպանության բանակի կազմավորման, Շուշիի ազատագրման եւ Հայրենական մեծ պատերազմում հաղթանակի եռատոնը: Նոր կորոնավիրուսի համավարակի սպառնալիքի պայմաններում, սակայն, ստիպված ենք չեղարկել տոնական միջոցառումներն ու սահմանափակվել առավել զուսպ ու ոչ մարդաշատ արարողություններով: Մասնավորապես, տեղի չեն ունենա ավանդական երթը դեպի Ստեփանակերտի հուշահամալիր, մարզամշակութային միջոցառումներ ու այլ տոնակատարություններ»:
35 ՔԱՂԱՔԱՑԻ
Ղազախստանի Ալմաթի քաղաքի միջազգային օդանավակայանից երեկ դեպի Երեւան ուղղություն է վերցրել «SCAT» ավիաընկերության օդանավը: Ալմաթի-Թբիլիսի-Երեւան չարթերային չվերթով Երեւան է վերադարձել 35 ՀՀ քաղաքացի, նրանց թվում՝ Ղրղզստանի մայրաքաղաք Բիշքեկից տարահանված 4 ՀՀ քաղաքացի: Հիշեցնում ենք, որ, Պարետատան որոշմամբ, Հայաստան վերադարձող ՀՀ քաղաքացիները ենթակա են 14-օրյա պարտադիր կարանտինային ռեժիմի, այն է՝ վերջիններս «Զվարթնոց» օդանավակայանից տեղափոխվելու են կարանտինային ռեժիմի համար նախատեսված հատուկ վայր:
ՃԱՆԱՊԱՐՀՆԵՐԸ ՓԱԿ ԵՆ
Նոր կորոնավիրուսի համավարակի տարածումը կանխելու նպատակով մայիսի 9-ին փակ են լինելու «Հաղթանակ» զբոսայգի եւ «Եռաբլուր» զինվորական պանթեոն տանող հետիոտների ու տրանսպորտային միջոցների համար նախատեսված բոլոր ճանապարհները: Եռատոնի շրջանակում տեղի կունենան միայն պաշտոնական արարողակարգային միջոցառումներ, իսկ մասսայական միջոցառումները հետաձգվում են: Նշենք, որ կարգը խախտելը կառաջացնի իրավական հետեւանքներ:
.gif)
