Դատական ատյանների միավորման Ղրղզստանի փորձը ձախողված է. ինչ է ասում միջազգային փորձը

Սահմանադրական բարեփոխումների մասնագիտական հանձնաժողովի՝ օգոստոսի 22-ի որոշումը, շարունակում է լայն քննարկման առարկա մնալ: Ինչպես հայտնի է, այդ օրը  սահմանադրական բարեփոխումների մասնագիտական հաձնաժողովը 8 կողմ և 7 դեմ ձայների հարաբերակցությամբ որոշել է բարձրագույն դատական ատյանները միավորելու և Գերագույն դատարան ստեղծելու հայեցակարգը ներառել առաջիկայում հանրային քննարկման ներկացվող սահմանադրական բարեփոխումների հայեցակարգում: Ինչպես արդեն նկատեցինք քվեարկության պատկերից, այս որոշման վերաբերյալ անհամաձայնություններ են առկա: 

Այս օրերին նման որոշումը սխալ համարող շրջանակները մեջբերում են միջազգային փորձը՝ փորձելով ապացուցել, որ դատական ատյանների միավորումն ի վերջո արդյունավետ չի եղել: Մասնավորապես, որոշման շուրջ առաջին դժգոհությունն այն է, որ վճռաբեկության եւ սահմանադրական արդարադատության գործառույթներ ունեցող ատյանները մեկ տեղում միավորելով , վերանում է ՀՀ քաղաքացիների՝ անհատական դիմումներով Սահմանադրական դատարան դիմելու իրավունքը:

Նշենք, որ  Արցախում, որտեղ Գերագույն դատարանը, բացի վճռաբեկությունից, իրականացնում է նաև սահմանադրական արդարադատություն, անհատական դիմումների ինստիտուտը փաստացի չի գործում: 2009-2020թթ. վիճակագրության համաձայն՝ քաղաքացիները անհատական գանգատի հիման վրա Գերագույն դատարան են դիմել 9 գործով, որից՝ 8-ով Գերագույն դատարանը մերժել է դիմումը վարույթ ընդունել, 1 դիմում ընդունվել է վարույթ, սակայն Գերագույն դատարանը որոշել է, որ վիճարկվող Քաղ. դատ. օր-ի 247-րդ հոդվածի 1-ին մասը համապատասխանում է Սահմանադրությանը: