Երեկ պաշտպանության նախարարությունը պաշտոնապես հրապարակեց մեր հերոսների սխրագործությունները Մարտկոցի կազմով թշնամական 7 տանկ և 1 հետևակի մարտական մեքենա խոցելու համար սերժանտ Մնացական Գեորգիի Սահակյանը ներկայացվել է «Մարտական խաչ» 1-ին աստիճանի շքանշանի, իսկ սերժանտ Արման Էդուարդի Վարդումյանը՝ «Մարտական ծառայություն» մեդալի: Թշնամական 2 ԱԹՍ խոցելու համար շարքային-պայմանագրային Վալերի Վարդանի Ավագիմյանը կպարգևատրվի «Մարտական ծառայություն» մեդալով: Իսկ փոխգնդապետ Էրիկ Վալերիկի Հակոբջանյանը, հրետանային ստորաբաժանումների հմուտ և կազմակերպված գործողությունների, ճշգրիտ հաշվարկների շնորհիվ մեծ կորուստներ է պատճառել հակառակորդին, ինչի համար ներկայացվել է «Արիության համար» մեդալի:
Մարտական գործողությունների ընթացքում զորքերի հմուտ և անխափան ղեկավարումն իրականացնելու, հակառակորդի մեծաթիվ ուժեր ջախջախելու համար գեներալ-մայոր Կարեն Էռնեստի Առստամյանը, գնդապետներ Դավիթ Արկադիի Ավետիսյանը, Նիկոլայ Բորիսի Մխիթարյանը ներկայացվել են «Մարտական խաչ»-ի ասպետության 1-ին աստիճանի:
«Մարտական խաչ» 2-րդ աստիճանի շքանշաններ կստանան շարքային Արեն Ավագի Չոբանյանը /խոցել է 4 զրահատեխնիկա/, շարքային Հովիկ Հովհաննեսի Ասատրյանը խոցել է 4 զրահատեխնիկա, շարքային Էրիկ Սամվելի Ղարիբյանը, շարքային Տիգրան Աշոտի Սիմոնյանը և շարքային Սպարտակ Հայկի Ասատրյանը /ոչնչացրել են թշնամական 2-ական տանկ ու կենդանի ուժ/ և շարքային Դավիթ Կարենի Բաղդասարյանը /իր հաշվեկշռում ունի թշնամական 1 ոչնչացված տանկ ու կենդանի ուժ/:
Ի դեպ ArmLur.am-ը դեռեւս հոկտեմբերի 2-ին գրել էր որ մարտական խաչ երկրորդ աստիճանի շքանշանակակիր 20-ամյա Հովիկ Ասատրյանը Շիրակի մարզից էր:
ArmLur.am-ը զրուցել էր նրա հորեղբոր՝ Արտավազդի հետ, որը մեզ հետ զրույցում պատմել էր Հովիկի անցած ճանապարհի մասին: Ըստ հորեղբոր՝ Հովիկի ծնողները մահացել են, եւ Հովիկը կրում է իր հայրիկի անունը, որին այդպես էլ չի տեսել: Ի դեպ հոկտեմբերի 3-ից մինչ օրս Արտավազդ Ասատրյանը փնտրում է իր եղբոր որդուն եւ դեռեւս որեւէ տեղեկություն չունի նրա մասին:
.gif)
