ArmLur.am-ը զրուցել է ԱԺ «Իմ քայլը» խմբակցության պատգամավոր Հովհաննես Իգիթյանի հետ` պարզելու համար, թե որքանով է իրական այն տեղեկությունները, ըստ որի՝ վերջինս դեռեւս մարտին հանդիպել է թուրքամետ լոբբիստ Սամսոն Օզարարատի հետ: Իգիթյանը ներկայացրել է, թե ինչի համար էր Հայաստան եկել Օզարարատը, ու ինչ նպատակով էր նրա հետ հանդիպել: Պատգամավորը նշեց, որ Օզարարատը թուրքամետ լոբբիստ չէ, ֆրանսիահայ է, ով Հայաստանին տարբեր հարցերով օգնում է:
-Պարո՛ն Իգիթյան, մոտ մեկ ամիս առաջ Դուք հանդիպել եք թուրքամետ լոբբիստ Սամսոն Օզարարատի հետ: Նույնիսկ լուսանկար կա Ձեր հանդիպումից: Ի՞նչ նպատակով եք իր հետ հանդիպել:
-Դուք ինչի՞ց եք վերցրել, որ նա թուրք լոբբիստ է:
-Իսկ ո՞վ է ինքը:
-Ինքը Ֆրանսիայի քաղաքացի հայ է, «Սոս Արմենի» կազմակերպության նախագահն է: Ինքը մեծ դերակատարություն ունեցավ եւ շարունակում է մեծ դերակատարություն ունենալ Ֆրանսիայում ոչ միայն ցեղասպանության ճանաչման, այլ ցեղասպանության քրեականացման օրենք ընդունելու հարցում: Այստեղ նախկիններից մի քանի հոգի կան, որոնք անձնական կոնֆլիկտ են ունեցել իր հետ եւ շարունակում են առաջ տանել: Այս մարդը, ում ճանաչում եմ երկրաշարժի 3-րդ օրվանից, երբ առաջին ինքնաթիռը շատ ճիշտ օգնությամբ, ինքն ու ֆրանսիացի 2 բժիշկներ եկան այստեղ, նա միշտ աշխատել է Հայաստանի համար:
-Ինչո՞ւ են իրեն այդպես կոչում:
-Սամսոն Օզարարատը հրավիրվել է Հայաստան հիմնականում սեւծովյան կազմակերպության շրջանակներում բոլոր 3 նախագահների օրոք: Հայաստանը դիմել է իրեն, եւ ինքն իր հաշվին, իր ընտանիքի ժամանակի, իր անձնական ռեսուրսների հաշվին սեւծովյան կազմակերպությունում առաջ էր տանում Հայաստանի շահերը: Ես ցավում եմ, որ վերջին ժամանակ, երբ նա Հայաստան էր եկել, ով է արել այդ նկարը: Այնպիսի տպավորություն է ստեղծվում, որ ինչ-որ մեկը հետեւում էր կա՛մ իրեն, կա՛մ ինձ: Նորմա՞լ եք համարում, որ պատգամավորին ինչ-որ մեկը, այսպես ասած, հետեւում է, գաղտնի լուսանկարներ է անում, չեմ բացառում նաեւ, որ գաղտնալսում է, կամ Ֆրանսիայի բարեգործական կազկակերպության ղեկավարին ինչ-որ մեկը նկարում է:
-Դա կապում են այն բանի հետ, որ Սամսոն Օզարարատը միշտ փորձում է հայ-թուրքական հարաբերություններում մերձեցում անել, եւ Հայաստան գալու նպատակը դա է եղել:
-Եթե ուզում ենք անպայման մարդուն անուն կպցնենք, որը ես չէի ցանկանա, բայց ասեմ, որ Սամսոն Օզարարատը միշտ եղել է հայկական լոբբիստ Թուրքիայում, եւ հայկական լոբբիստ՝ Ֆրանսիայում, լավ իմաստով: Նա, լինելով Ֆրանսիայի քաղաքացի, միշտ ֆրանսիական դրոշով իր ընկերների եւ Սփյուռքի մյուս անդամների հետ միասին պահանջում է Ֆրանսիայի ղեկավարությունից ավելի կապիտալիզացնել այն վերաբերմունքը, որը Ֆրանսիայում վաղուց եղել է հայերի հանդեպ: Դա եղել է տարբեր հայտարարություններով: Գիտենք, որ որոշ երկրներ ոչ միայն ճանաչել են ցեղասպանությունը, այլ նաեւ քրեականացրել են ցեղասպանության հետքերը:
-Ձեր վերջին հանդիպմանը կոնկրետ ի՞նչ պայմանավորվածություն եք ձեռք բերել:
-Երբ ինձ դիմեց լրագրողը, ես ուղարկեցի այն հիմնավոր ծրագիրը, թե ինչով է եկել: Դա եղել է թե՛ Քովիդի, թե՛ հետպատերազմյան վիճակի հետ կապված որոշ հարցեր, որը մենք քննարկում էինք: Իսկական մարդիկ, որոնք զբավղում են բարեգործությամբ, գովազդ անել չեն ուզում:
-Արդյոք հայ-թուրքական հարաբերությունների քննարկում ունեցե՞լ եք: Այդ հարցը ձեր օրակարգում կա՞: Ի՞նչ է նա կարծում այս հարցի վերաբերյալ:
-Ո՛չ, չենք ունեցել, բայց երբ ես հարցեր ունեմ Թուրքիայի որոշ քաղաքական ուժերի հայտարարությունների հետ, ես իրեն՝ որպես լավ թուրքերեն իմացողի, Թուրքիայի քաղաքական անցուդարձն իմացողի, հարցնում եմ՝ հասկանալու համար, թե ով ինչ հայտարարություն է անում, եւ դա օգտագործում եմ իմ գործունեության մեջ ԵԽԽՎ-ում եւ մյուս երկրներում:
-Այսինքն՝ առաջիկայում հնարավո՞ր է՝ նա նորից Հայաստան գա, հայկական իշխանությունները իրեն հրավիրեն, կամ ինչ-որ առաջարկներ լինեն:
-Եթե հրավիրեն, իհարկե, ինքը կգա եւ դա անելու է հասարակական հիմունքներով: Ես գիտեմ մի քանի հոգի, ընդ որում՝ ոչ «Դաշնակցության» անունից, ուղղակի նախկին իշխանություններից, որոնք մեծ կոնֆլիկտ են ունեցել:
Զրուցեց ՍՈՆԱ ԳՐԻԳՈՐՅԱՆԸ
ՏՐԱՆՍՊՈՐՏԱՅԻՆ ՈՒՂԻ ՉԻ ԼԻՆԻ
«Ռուսաստանի կողմից կա պատրաստակամություն եւ ամենաբարձր մակարդակով արված բազմաթիվ փորձեր խնդիրը լուծելու համար»,- ասել է փոխվարչապետ Մհեր Գրիգորյանը՝ պատասխանելով հարցին, թե որքանով են իրեն բավարարում Ռուսաստանի գործողությունները՝ ուղղված նոյեմբերի 9-ի պայմանագրի ութերորդ կետի կատարմանը։
«Եկեք ֆիքսենք, որ նման հանգամանք կա, ինչի համար շնորհակալ լինենք նաեւ։ Հարցի բարդության աստիճանը դուք էլ լավ հասկանում եք։ Կողմերն անում են ամեն ինչ, որպեսզի հարցը լուծվի»,- ասել է փոխվարչապետը։ Հարցին, թե արդյոք Ադրբեջանը դնում է նախապայմաններ գերիների վերադարձի դիմաց, փոխվարչապետը պատասխանել է? «Իմ հարթակի տեսանկյունից նման հարց չի քննարկվել»։ Իսկ այն հարցին, թե Մհեր Գրիգորյանը ստացել է իշխանության կողմից նախընտրական ցուցակում առաջադրվելու, փոխվարչապետը պատասխանեց. «Ես կուսակցական չեմ։ Այս պահին նման հարց չկա»։ Մ. Գրիգորյանն անդրադարձել է ճանապարհների ապաշրջափակման խնդրին. «Այժմ հիմնական աշխատանքներն իրականացվում են փորձագիտական ենթախմբերի կողմից, որովհետեւ դետալ առ դետալ պետք է ուսումնասիրել խնդիրները։ Մենք քննարկում ենք ուղիներ, որոնց իրավական կարգավորումներն իրականացվելու են բացառապես ԱՊՀ երկրների իրավական բազայով, միջազգային պայմանագրերով, կոնվենցիաներով, որոնց Հայաստանի Հանրապետությունը միացած է։ Որեւիցե այլ ձեւաչափով քննարկումներ ես այդ հարթակում չունեմ»,- նշել է փոխվարչապետը։
Հարցին, թե որքանով է խանգարում նոյեմբերի 9-ի պայմանագրում Ադրբեջանի՝ ութերորդ կետի չկատարումը, Մհեր Գրիգորյանը պատասխանել է. «Մենք ունենք նաեւ հունվարի 11-ի եռակողմ հայտարարությունը, որն ավելի մանրամասն նկարագրում է աշխատանքային խմբի անելիքը փոխվարչապետների մակարդակով։ Նույնիսկ էմոցիոնալ առումով նման բան իրականացնելու համար ֆոնը պետք է լինի շատ ավելի բարի-դրացիական»։
Այն դիտարկմանը, որ պաշտոնական Բաքուն անընդհատ խոսում է Զանգեզուրի միջանցքի մասին, փոխվարչապետը հակադարձել է. «Այո, միջանցք բառ ընդունված է օգտագործել որպես տրանսպորտային ուղի, բայց ես հենց այդ կապակցությամբ էլ շեշտում եմ, որ նույնիսկ որպես տրանսպորտային ուղի չի քննարկվելու նման որեւիցե հարց»։
ՇՈՒԿԱՅԻՑ ՎԵՐԱՑԵԼ ԵՆ
Հայաստանում ծորակ ներկրող ընկերությունները հայտնվել են անհարմար դրության մեջ. պատճառը Թուրքիայից ապրանք ներկրելու վեցամսյա արգելքն է, որը գործում է այս տարվա հունվարի 1-ից: «Ժողովուրդ» օրաթերթը տեղեկացավ, որ ֆրանսիական ծագում ունեցող, բայց Թուրքիայում արտադրվող «Tema» ծորակներն արդեն մոտ 4 ամիս է, ինչ հայկական շուկայից վերացել են: Ի դեպ, այս ծորակներն արտադրող ֆրանսիական ընկերությունը գործարան ունի Ֆրանսիայում, Թուրքիայում, Մեքսիկայում: Այն հայաստանցի գործարարները հնարավորություն ունեին ներկրել Թուրքիայից, քանի որ այս դեպքում մաքսազերծման ծախսերն ավելի ցածր են կազմում, իսկ Ֆրանսիայից ներկրելու դեպքում մաքսազերծման ծախսերը մի քանի անգամ բարձր են: Եւ որպեսզի բարձր գնով ծորակ չներկրեն եւ այն թանկ չվաճառեն, դադարեցվել է դրանց ներկրումը: Բայց այս ծորակ արտադրող ընկերությունը Թուրքիայի հետ կապ չունի, այլ ֆրանսիական է, արտադրանքն ինքը արտադրվում է մի քանի տարբեր երկրներում տեղակայված գործարաններում, որոնց թվում է նաեւ Թուրքիան։ Հաշվի առնելով սա՝ այդպես էլ Էկոնոմիկայի նախարարությունը չհստակեցրեց, թե ինչպես է ազդում այսպիսի արտադրանքների խմբաքանակների վրա կառավարության սահմանած արգելքը, եւ ինչպիսի մեթոդներով է որոշվում ապրանքի ծագման երկիրը։ Ի դեպ, թուրքական ապրանքների ներկրման սահմանափակման ժամկետը հնարավոր է երկարաձգվի:
ՉԾԱՌԱՅԱԾԸ՝ ԲԱՆԱԿԻ ՄԱՍԻՆ
Աժ «Իմ քայլը» խմբակցության պատգամավորները երեկ խորհրդարանի ամբիոնն օգտագործեցին բանակի, զինվորի մասին գովաբանող արտահայտություններ անելու եւ կրկին նախկիններին մեղադրելու համար, թե թալանել են այն: Այդ պատգամավորների թվում ուշագրավ էր հատկապես Վաղարշակ Հակոբյանի ելույթը, որն իր ելույթը համեմեց «մունաթով» եւ «կիսագողական» բառապաշարով: Սակայն նկատենք՝ բանակից, այն թալանելուց, ղեկավարելուց եւ սխալներից խոսում է մի մարդ, որն անգամ պատկերացում չունի, թե ինչ է այն, եւ մեկ օր անգամ զինված ուժերում չի ծառայել: Ազգային ժողովի պաշտոնական կայքում տեղադրված կենսագրության մեջ եւս առկա չէ նրա՝ ծառայած լինելու մասին տվյալ, եւ երբ նա պետք է իր պարտքը կատարեր հայրենիքի հանդեպ, նա պարզապես փախել է, եւ ամենեւին կապ չունի՝ ինչ պատճառով չի ծառայել: Սակայն բանակում չծառայած մարդն այսօր խոսում է զինվորների սոված լինելու մասին: Եվ այն, որ բանակը թալանված է եղել, դա գիտեն բոլորը, սակայն երեք տարի իշխանության լինելով հանդերձ՝ այդ դեպքերից գեթ մեկը բացահայտված չէ:
.gif)
