ԵՐԿԽՈՍՈՒԹՅԱՆ ԱՐԴՅՈՒՆՔԸ ԵԽԽՎ ԲԱՆԱՁԵՎՆ ԷՐ

ՀՅԴ ԳՄ ներկայացուցիչ Արմեն Ռուստամյանը, ով ցանկություն չունի մեկնաբանել, թե ինչու վերջացավ ՀԱԿ-իշխանություն երկխոսությունը, այնուամենայնիվ, «Ժողովուրդ»-ի հետ զրույցում նշեց, որ դա, լինելով «երկխոսություն երկխոսության համար», ձեռնտու էր իշխանություններին:  -Պարո՛ն Ռուստամյան, կուսակցությունները, այդ թվում ՀՅԴ-ն, հեռվից հետեւում էին ՀԱԿ-իշխանություն երկխոսությանը. հիմա, երբ եղավ այն, ի՞նչ եղավ, Ձեզ համար սպասելի՞ էր: -Մենք ասել ենք, որ երկխոսությունն ինքնին լավ երեւույթ է, եւ հիմա էլ եմ ասում: Բայց երբ փորձ է արվում  երկխոսությունը դիտարկել այն տրամաբանությամբ, որ իբր թե գոյություն ունի մի խումբ, որը երկխոսում է`  ներկայացնելով ողջ իշխանությունը, եւ մի այլ խումբ, որը ներկայացնում է ողջ հասարակությունը, սա բացարձակապես իրականությանը չէր համապատասխանում, ու նախ եւ առաջ հենց այդ պատճառով ձախողվեց հիմնական մասով: Այսինքն` ի սկզբանե հարցադրումները սխալ էին, այն հավակնությունները, որ երկխոսության ընթացքում փորձում էին ներկայացնել ՀԱԿ ներկայացուցիչները, դրանք անհիմն էին եւ ստեղծված իրավիճակին ու նաեւ հասարակական պահանջներին ադեկվատ չէին: Դա երկխոսություն էր երկխոսության համար, եւ «երկխոսությունը երկխոսության համար» ո՞ւմ էր ավելի ձեռնտու. պարզ չէ՞, որ միշտ  ձեռնտու է իշխանություններին: Դրա առաջին արդյունքն իշխանությունների համար շատ կարեւոր էր, եւ իրենք ստացան Եվրախորհրդի ԽՎ այս բանաձեւով, որով, եթե համեմատենք անցած բոլոր բանաձեւերի հետ` սկսած 1609-ից, չափացանց դրական իմաստով շեղված է հօգուտ իշխանությունների, որ իրենց ուղղակի ողջունելու առիթ հանդիսանա: Ասեմ ավելին, հանգեցնի եզրակացությանը, որ մենք փորձում էինք հանել կամ շտկել 11-րդ կետը, որ «էջը կարելի է համարել փակված»: Հիմա իրենք իրենց արածի արդյունքներն արագ ստացան եւ փորձում են դրանից շվարած մեկնաբանություններ տալ: Ես, իհարկե, իրենց ոճին ծանոթ եմ, իրենք ամեն ինչ էլ կարող են մեկնաբանել: Լեւոն Տեր-Պետրոսյանը կարող է իրար հակասող դրույթներն էնպես մեկնաբանի, որ տվյալ պահին լսողն ասի`  «էս ինչ կուռ տրամաբանություն էր»: Դա էլ իր` որպես գործչի մեծագույն հմտությունն է:-Այդ ընթացքում մեղադրանքներ էին հնչում` «գաղտնի պայմանավորվածություններ», չգիտեմ, «կիսում են ԱԺ-ն ու կառավարությունը», եւ հիմա երկխոսության այս վերջաբանի դեպքում չե՞ք կարծում, որ այդ մեկնաբանություններն անտեղի էին:-Նախ միշտ խուսափել եմ եւ շատ հստակ ասեմ` ինչու, էս հարցին անդրադառնալ լրջորեն: Ինչո՞ւ, որովհետեւ ինքն իր մեջ լուրջ բովանդակություն չի պարունակում. դրա հետեւում կարող են լինել տարբեր ենթաբեմային պայմանավորվածություններ, որ ես չեմ բացառել: Եւ հիմա փորձել մեկնաբանությունների միջոցով դրան լրջություն հաղորդել, գիտեք, իմ գործը չէ: Երկխոսությունն ինքնին ոչինչ չի տվել, մենք մեր մեկնաբանություններով պետք է դրան բովանդակությո՞ւն հաղորդենք, ես նման ցանկություն չունեմ, ոչ էլ ուշի ուշով հետեւում էի, որ տեսե՛ք, հայ ժողովուրդը դրանից ինչ է ստանալու:-Ազատության հրապարակում շուրջօրյա հանրահավաքներ անող ՀԱԿ ակտիվիստներին զուգարանից զրկելու իշխանության որոշումը հայտնի է: Սակայն հայտնի է, որ հրապարակին մերձակա սրճարանների մեջ «Մեղեդի»-ն պատկանում է դաշնակցականներին: Փաստորեն, ՀՅԴ-ն եւս միացավ այդ ակցիային: -Ես չգիտեմ էդ… Ձեր հաստատումը, ես էստեղ չեմ եղել, հեռվից հեռու ինձ շատ տհաճ էր այդ ամեն ինչը լսել, որ ինչ-որ զուգարանային պայքար է սկսվել:-Բայց 24 ժամ նստացույցի մասնակցող մարդու համար կարեւոր է այդ հարցը:-Բայց խնդրանքով դիմել նախագահին առ այն, որ բացեն զուգարանները, մի քիչ շատ է էլի զուգարանների համար: -Պարո՛ն Ռուստամյան, որքան էլ այս պահին հերքվում է, բայց շարունակում է շրջանառվել, որ Քոչարյանը գծագրում է ԲՀԿ-ի եւ ՀՅԴ-ի հետ կոալիցիայով վերադառնալ:-Բոլոր նման հարցերը չեն ստանում իրենց լիարժեք պատասխանը, եւ էդպես էլ լինելու է, որովհետեւ այդ հարցերը ժամանակավրեպ են: Էդ օրերը կմոտենան… կուսակցություններն իրավիճակի ամբողջական գնահատումից հետո են նման խնդիրներ օրակարգ բերում եւ լուծումներ գտնում: Հիմա դրա խնդիրը չէ, էդ օրակարգը մեր գործունեության մեջ չէ: -Մեծանուն շանսոնյե եւ համատեղությամբ Շվեյցարիայում ՀՀ դեսպան Շարլ Ազնավուրի վերջին հայտարարությունը դժգոհության ալիք բարձրացրեց, առնվազն մեկնաբանվեց, որ նա` որպես ՀՀ դեսպան, իրավունք չուներ նման բաներ ասելու: Որպես ցեղասպանությանը եւ դրան առնչվող խնդիրներին նախանձախնդիր կուսակցության անդամ` ի՞նչ կասեք, կարծես Ձեր կուսակցությունը չարձագանքեց: Ձեր կարծիքով` ինչ-որ բան փոխվե՞լ է մեր արտաքին քաղաքականության մեջ, որը, եթե չեմ սխալվում, հետապնդում է Հայոց ցեղասպանության միջազգային ճանաչումը: -Ես ծանոթ չեմ իր հայտարարություններին, ես երկար ժամանակ գործուղման մեջ եմ գտնվել: Լսել եմ, բայց ինքս չեմ կարդացել հարցազրույցը, ես մի հատ ծանոթանամ…ԱՆՈՒՇ ԴԱՇՏԵՆՑ