ՆԵՐՈՂՈՒԹՅՈՒՆ Է ԽՆԴՐԵԼ

Երեւանի փոխքաղաքապետ Տիգրան Ավինյանի կինը՝ Մարիամ Պահլավունին, ներողություն է խնդրել բժիշկ-ուրոլոգ Գեւորգ Գրիգորյանից ոչ կոռեկտ «բառամթերքի» համար։ «Փաստինֆո»-ն գրում է, որ ներողություն խնդրելուն Պահլավունուն պարտադրել է դատարանը՝ արձանագրելով, որ նա վիրավորել է Գրիգորյանին։

Դեռեւս 2020թ. մարտին ուրոլոգ Գեւորգ Գրիգորյանը ֆեյսբուքյան իր էջում գրառում էր կատարել՝ հայտնելով, որ եթե Ավինյանը համապատասխան քայլեր չանի կնոջ ասածի համար, ապա հարցը կլուծվի իրավական ճանապարհով։

«Հարգելի՛ պարոն Ավինյան, Դուք չեք կարողացել զսպել Ձեր կնոջ ճառերը, եւ արդյունքում Ձեր կինը հանդես է եկել ոչ հարիր բառամթերքով սոցիալական ցանցում` հասցեագրված օտար տղամարդու, ինչը լայն տարածում է ստացել լրատվական դաշտում: Ակնկալում եմ Ձեր կողմից տղամարդուն վայել կեցվածք, պատասխանատվություն` սեփական կնոջ բառամթերքի համար»,- գրել էր Գրիգորյանը, սակայն արձագանք չստանալով՝ ապրիլի 4-ին դիմել էր դատարան՝ պահանջելով դատական կարգով պարտավորեցնել Պահլավունուն՝ ներողություն խնդրել, հերքել հրապարակայնորեն արտահայտված՝ պատիվը եւ արժանապատվությունը վիրավորող արտահայտությունները, ինչպես նաեւ 1 մլն դրամ բռնագանձել` որպես փոխհատուցում։

Խնդրո առարկա հայտարարությունը, որը, հայցվորի դիտարկմամբ, վիրավորանք էր պարունակում, եղել է «Առանց դրա էլ բոլորը շատ լավ գիտեն՝ ում շունն ես» արտահայտությունը։

Գործի քննության ընթացքում առաջին ատյանի դատարանը հայցի ապահովման միջոց է կիրառել՝ հայցապահանջի՝ 1 մլն դրամի չափով արգելանք դնելով Պահլավունու գույքի նկատմամբ։ Երեւանի ընդհանուր իրավասության դատարանը՝ դատավոր Սիմիզար Հովսեփյանի նախագահությամբ, 2022թ. հոկտեմբերի 11-ին մերժել էր հայցադիմումը՝ վճռելով հօգուտ Պհլավունու բռնագանձել 200.000 դրամ՝ որպես փաստաբանի խելամիտ վարձատրության գումար։ Հայցվոր կողմը բողոքարկել է վճիռը՝ պահանջելով բեկանել այն եւ բավարարել հայցը՝ ընդդեմ Պահլավունու։ Վերաքննիչ քաղաքացիական դատարանը՝ դատավոր Հարություն Ենոքյանի նախագահությամբ, կազմով դատավորներ Նարեկ Գաբրիելյանի, Կարեն Համբարձումյանի, մասնակի բավարարել է բողոքը՝ բեկանելով Սիմիզար Հովսեփյանի վճիռը։

Վերաքննիչ քաղաքացիական դատարանը պարտավորեցրել է Տիգրան Ավինյանի կնոջը ներողություն խնդրել բժշկից, ինչպես նաեւ բռնագանձել 100.000 դրամ՝ որպես փոխհատուցում Գրիգորյանին պատճառված վնասի համար։ Դատավոր Կարեն Համբարձումյանը հատուկ կարծիք է ներկայացրել՝ իր անհամաձայնությունը հայտնելով վճռի պատճառաբանական եւ եզրափակիչ մասերով վիրավորանքի դիմաց որոշված 100.000 դրամի չափով փոխհատուցման հետ, եւ գտնում է, որ փոխհատուցման չափը պետք է սահմանվեր 200.000 դրամի չափով, ինչպես եւ առաջարկվել էր որոշման նախագծով։

Վճիռը մտել է օրինական ուժի մեջ, ինչի հիման վրա՝ Մարիամ Պահլավունին ֆեյսբուքյան իր էջում հրապարակավ ներողություն է խնդրել բժիշկ-ուրոլոգ Գեւորգ Գրիգորյանից։

ՆՈՐ ՀԱԿԱԿՈՌՈՒՊՑԻՈՆ ԴԱՏԱՐԱՆ

Հայաստանը նոր վերաքննիչ հակակոռուպցիոն դատարան կունենա: Այս դատարանի ստեղծման վերաբերյալ նորմերն ուժի մեջ են մտնելու 2024 թվականի հունվարի 1-ից: Համապատասխան նախագիծն արդեն ուղարկվել է խորհրդարանին:

ArmLur.am-ը տեղեկացավ, որ Վերաքննիչ հակակոռուպցիոն դատարանը իրականացնելու է հակակոռուպցիոն քաղաքացիական եւ կոռուպցիոն հանցագործությունների վերաբերյալ գործերով կայացված դատական ակտերի վերաքննության կարգով վերանայումը: Այդ դատարանը կազմված է լինելու թվով առնվազն 12 դատավորներից, որոնցից առնվազն 6-ն իրականացնելու են կոռուպցիոն հանցագործությունների վերաբերյալ գործերով, եւ առնվազն 6-ը՝ հակակոռուպցիոն քաղաքացիական գործերով կայացված դատական ակտերի դեմ բողոքների քննություն:

Հիմնավորման մեջ նշվում է, որ նախագծերի նպատակն է ապահովել հակակոռուպցիոն քաղաքացիական եւ կոռուպցիոն հանցագործությունների վերաբերյալ գործերով կայացված դատական ակտերի վերաքննության կազմակերպումը մասնագիտացված՝ վերաքննիչ հակակոռուպցիոն դատարանի կողմից:

Այսպիսով, արդյունքում սույն թվականի հունիսի 15-ից վերաքննիչ քրեական եւ վերաքննիչ քաղաքացիական դատարանները դադարելու են քննել համապատասխանաբար կոռուպցիոն հանցագործությունների եւ հակակոռուպցիոն քաղաքացիական գործերով բողոքարկման ենթակա դատական ակտերը:

ԹՎԱՅԻՆ ՄԱՐԴՈՒ ԱՐՏԱԴՐՈՒԹՅՈՒՆ

Tencent Cloud ընկերությունը ներկայացրել է թվային մարդու արտադրության համար նախատեսված թվային հարթակ, որը կոչվում է Deepfakes-as-a-Service (DFaaS)։

Մարդու թվային տարբերակը ստեղծելու համար ծառայությանն անհրաժեշտ է տվյալ մարդու մասնակցությամբ ընդամենը երեք րոպե տեւողությամբ տեսանյութ, նրա կողմից արտասանված 100 նախադասություն եւ 24 ժամ ժամանակ. այս ամենը արժե ընդամենը 145 դոլար:

Մարդու թվային տարբերակը հասանելի է ինչպես ամբողջ հասակով, այնպես էլ մինչեւ գոտկատեղը տարբերակով։ Ծառայությունը հասանելի է թե՛ չինարեն, թե՛ անգլերեն լեզուներով:

Tencent Cloud Intelligent Digital Human Products-ի գլխավոր մենեջեր Չեն Լեյն ասել է, որ ընկերությունը հույս ունի կառուցել «խելացի թվային մարդու ստեղծման ավտոմատացված ֆաբրիկա»:

Tencent-ն իր թվային մարդկանց համար առաջարկում է հինգ ոճ՝ երեք 3D (իրական, կիսաիրական եւ անիմացիոն) եւ երկու 2D (իրական եւ անիմացիոն):

Թվային մարդկանց կարելի է օգտագործել, օրինակ, չատբոտերի հետ աշխատանքում, որոնք գնալով շատ տարածված են դառնում: Տեղական լրատվամիջոցները նաեւ հայտնում են, որ Tencent-ը կարող է օգտագործել այս մշակումը թվային բժիշկների, իրավաբանների եւ այլ մասնագետների ստեղծման համար:

ԲԱԺՆԵՏՈՄՍԵՐԸ ՆՎԱԶԵԼ ԵՆ

ԱՄՆ-ի խոշորագույն բանկերից մեկի՝ First Republic-ի շուկայական արժեքը նվազել է մինչեւ 557 մլն դոլար՝ 2021 թվականի նոյեմբերին 40 մլրդ դոլար պիկի համեմատ։

Ինչպես հաղորդում Է Reuters-ը, բանկի բաժնետոմսերը նվազել են գրեթե 50%-ով: Նկատվում է ավանդների ռեկորդային արտահոսք՝ շուրջ 100 մլրդ դոլարի չափով, որի ֆոնին կարգավորիչները փորձում են շտապ գտնել նոր սեփականատեր բանկի համար:

Ինչպես ասվում է նյութում, ամերիկյան կարգավորիչները փորձում են հրատապ գործարք կնքել First Republic Bank-ի վաճառքի վերաբերյալ, որը կարող է կլանել JPMorgan Chase Bank-ը:

Աճուրդին մասնակցելու հայտ են ներկայացրել մոտ վեց բանկեր, այդ թվում՝ Citizens Financial Group-ը, PNC Financial Services Group-ը եւ JPMorgan Chase-ը:

Նշվում է, որ վարկատուները կմասնակցեն First Republic Bank-ի բոլոր ավանդների, նրա ակտիվների զգալի մասի եւ որոշ պարտավորությունների աճուրդին:

First Republic-ը ԱՄՆ-ի քսան խոշորագույն բանկերի շարքում էր: Ապրիլի 13-ի դրությամբ Սան Ֆրանցիսկոյում տեղակայված բանկի ընդհանուր ակտիվները կազմել են 229 մլրդ դոլար, ավանդները՝ 104 մլրդ դոլար:

ՌԵԿՈՐԴԸ ԿԱՐՈՂ Է ԳԵՐԱԶԱՆՑՎԵԼ

Ակնկալվում է, որ հանգուցյալ ավստրիացի միլիարդատեր Հայդի Հորթոնի ոսկերչական հավաքածուի աճուրդը գերազանցելու է հանգուցյալ դերասանուհի Էլիզաբեթ Թեյլորի կողմից ավելի քան մեկ տասնամյակ առաջ սահմանած ռեկորդը:

2011 թվականին Թեյլորի զարդերն աճուրդում վաճառվել են գրեթե 116 միլիոն դոլարով, իսկ նրա երկրպագու Քիմ Քարդաշյանը 64900 դոլար է ծախսել Lorraine Schwartz-ի երեք ապարանջանների համար։

Այնուամենայնիվ, Հորտոյին պատկանող ավելի քան 700 զարդեր ընդհանուր առմամբ գնահատվում են ավելի քան 150 միլիոն դոլար՝ Ժնեւի Four Seasons Hotel des Bergues հյուրանոցում եւ մայիսին ու նոյեմբերին առցանց աճուրդների շարքում:

Christie’s աճուրդի տունը հայտարարել է, որ երբեւէ աճուրդի դրված ոսկերչական իրերի «ամենամեծ ու ամենաթանկ» հավաքածուն «գերաճ» կտա 2011 թվականի Էլիզաբեթ Թեյլորի հավաքածուին եւ 2019 թվականի Maharajas & Mughal Magnificence աճուրդներին:

Զարդերը ներառում են Հարրի Ուինսթոնի 90 կարատանոց Briolette of India ադամանդե վզնոցը, Cartier մատանին սուտակով եւ աղավնիի արյունով ադամանդներով, ժամանակակից եւ վաղեմի Bulgari ստեղծագործությունների շարք ու այլ շքեղ ապրանքանիշեր, ինչպիսիք են Tiffany-ը եւ Van Cleef & Arpels-ը: