Ի՞նչ համայնք, դա ի՞նչ տափակություն է

Արդեն երկու օր է, ինչ  ԱԺ-ում  քննարկվում է «Ավտոմոբիլային տրանսպորտի մասին» օրենքում փոփոխություններ ու լրացումներ կատարելու մասին  նախագիծը:

Նախագծի մասին հնչեցին տարբեր  գնահատականներ: Հիմնական մտահոգությունն այն է, որ փորձում են  ուղևորափոխադրման սակագինը բարձրացնել:

Armlur.am լրատվականի թղթակիցը փորձեց  սպառողների  հարցերով և տրանսպորտային ոլորտի խնդիրներով զբաղվող  կառույցների ներկայացուցիչներից պարզել` ինչու  է հիմա առաջ քաշվում այս նախագիծը և ինչ թաքնված վտանգներ է պարունակում:

«Իրազեկ և պաշտպանված սպառող» ՀԿ-ի ղեկավար Բաբկեն Պիպոյանը  մեր թղթակցի հետ զրույցում գնահատականներ առայժմ չհնչեցրեց`  չբացառելով, սակայն, որ նախագծի քննարկմանը կմասնակցի նաև իրենց ՀԿ-ն: Իսկ եթե չմասնակցեն լսումներին, դրանից հետո միայն իրենք հանդես կգան գնահատականներով:

«Բարև Երևան» խմբակցության անդամ Ստեփան Սաֆարյանը ևս չցանկացավ առայժմ գնահատականներ տալ, քանի որ դեռ ծանոթ չէ  օրինագծին:

Զրուցեցինք նաև Սպառողների միության ղեկավար Արմեն Պողոսյանի հետ:

-Պրն. Պողոսյան,  այս օրինագծով փորձում են տրանսպորտը դարձնել համայնքային սեփականություն: Դա որակական առումով որևէ ազդեցություն կունենա տրանսպորտի ոլորտի վա:

-Ի՞նչ համայնք, դա ի՞նչ տափակություն է: Մենք տարիներ շարունակ առաջարկել ենք ստեղծել բաց բաժնետիրական ընկերություն, որը այն չէ, ինչ առաջարկում են: Բաց բաժնետիրական ընկերության կեսը պետք է լինի քաղաքապետարանի սեփականությունը,  իսկ մյուս մասը պետք է  լինի այն մարդկանց սեփականությունը, որոնք հիմա շահագործում են երթուղային գծերը: Դրա շնորհիվ մենք կունենանք  արդյունավետ կառավարում: Ի դեպ, սա մենք չենք հնարում, սա եվրոպական փորձն է: Այն, ինչ առաջարկում ենք իրենք, խելամիտ չէ:  Ամենակարևորն այն է, որ մեզ հետ ոչինչ չեն քննարկում, իսկ դա պարտիզանական ձև է, որը  վաղուց մերժված  է աշխարհի կողմից:

-Ի՞նչ խնդիրներ են լուծելու այս օրինագծով, եթե այն հաստատվի:

-Իրենք կարծում են` այդ կերպ կարող են արդյունավետ կառավարել տրանսպորտային ոլորտը: Սակայն դա ճիշտ  մոդել չէ:

-Արդյոք սրանով փորձո՞ւմ են վերացնել գծատեր հասկացությունը:

–Այո’, փորձում են: Այս օրինագիծն ինձ համար շղարշ է: Ինչ կառույց էլ որ լինի,  տրանսպորտի ոլորտի մի մասն ԱԺ-ի, մի մասն էլ` քաղաքապետարանի պաշտոնյաների ձեռքում է:

-Որքանո՞վ են  հիմնավոր այն մտահոգությունները, թե սրանով փորձում են հանրությանը նախապատրաստել ուղեվարձի երկրորդ թանկացմանը:

– Դա հնարավոր է, ես չեմ  կարող 100 տոկոսով ասել, բայց չի բացառվում:

Սոնա Դավթյան