ԿՎԱԴՐՈԲԵՐՆԵՐԸ «ՀԱՍԱՆ» ՀԱՅԱՍՏԱ՞Ն

Կվադրոբերները դարձել են պատուհաս Ռուսաստանի Դաշնությունում, Լավրովն անհանգստացած էր, Միրզոյանը քիչ, թե շատ, տեղյակ։

Կրեմլում Նիկոլ Փաշինյան-Վլադիմիր Պուտին հանդիպմանն ընդառաջ՝ ՌԴ ԱԳ նախարար Սերգեյ Լավրովը հայ գործընկերոջ ու Ռուսաստանում Հայաստանի նորանաշնակ դեսպան Գուրգեն Արսենյանի հետ զրույցում քննարկել է երեխաների՝ շան պես քայլելու երեւույթը, որն այժմ տարածված է, իսկ դրանք կոչվում են կվադրոբերներ։

Վերջին մեկ ամսվա ընթացքում տեղեկատվական դաշտում տեղ է գտել «կվադրոբեր» բառը։ Կատուների ու շների մասին մանկական մոլուցքը հանկարծ դարձել է քննարկման հիմնական թեման, որի շուրջ արդեն բարձրաձայնում են պատգամավորներն ու նախարարները։ Միեւնույն ժամանակ լրահոսում համայնքի անդամները հայտնվեցին սարսափելի պատմությունների էպիկենտրոնում:

Նախ եւ առաջ ամենակարեւոր հարցն է՝ ի՞նչ բառ է «կվադրոբերը»:

Սա մարզումներ կատարող մարդ է։ Quadrobics բառը առաջացել է որպես քվոտուոր (թիվ 4) եւ աերոբիկա ձեւակերպումներից, այսինքն՝ վարժություններ եւ տեխնիկա, որոնք պետք է կատարվեն չորս վերջույթների/թաթերի վրա:

Կվադրոբերի նախահայրը համարվում է ճապոնացի Կենիչի Իտոն, ով 2000-ականների վերջին սկսեց չորս ոտքով հարյուր մետր վազել եւ ռեկորդներ սահմանել։

ՌԴ Պետդումայի պատգամավորներն առաջարկում են տուգանքներով պատժել այն երեխաներին, ովքեր չորեքթաթ վազում են կատվի եւ շան դիմակներով, ինչպես նաեւ այն ծնողներին, ովքեր իրենց երեխաների հետ ինչ-որ իմաստով խոսելու փոխարեն նրանց հետ քայլում են շղթաներով։ Նախատեսվում է նաեւ արգելել քվադրոբինգի քարոզչությունը, որը բառացիորեն հակադարձում է էվոլյուցիայի գործընթացին՝ զրկելով մարդկանց մարդկային արարքներից։

Կատուների եւ շների հագուստով աշակերտներին թույլ չեն տալիս մտնել ռուսական դպրոցներ։

Վերջերս Aurora News-ի տեսախցիկը ԵՊՀ-ի տարածքում ֆիքսել էր կվադրոբերի, որը շրջում էր շան հետ։

Հայաստանում դրանց դրսեւորումներն ակնհայտ չեն, նույնիսկ Ազգային ժողովում նման քննարկումներ չեն եղել, ինչպես ՌԴ Պետդումայում։

Մի քանի հայտնի դեպքեր կան կապված կվադրոբերների հետ.

Օրինակ՝ վերջերս Օմսկում տեղի ունեցած միջադեպը մեծ աղմուկ էր բարձրացրել, երբ մայրը շան կոստյումով զբոսնել էր որդու հետ: Եկատերինբուրգում մետրոյի վագոնում գտնվող տղան սկսել է քսվել ուղեւորների ոտքերին՝ ձեւանալով, թե կատու է։ Իսկ Կրասնոդարում կվադրոբեր աղջիկը հարձակվել է մյուսի վրա ու կծել նրան։

ԷՄՄԱ ՄԻՔԱՅԵԼՅԱՆ

ՎՆԱՍՆԵՐԸ ԴԵՌ ՉԵՆ ՓՈԽՀԱՏՈՒՑՎԵԼ

Տավուշի մարզպետարանը, հղում անելով «Հիդրոօթերեւութաբանության եւ մոնիթորինգի կենտրոն» ՊՈԱԿ-ին` մարզի  բնակչությանը նախազգուշացնում է առաջիկա օրերին հորդ անձրեւների, դրա հետեւանքով՝ հոկտեմբերի 17-18-ին հանրապետության գետերի մեծ մասրում  ջրի  ելքերի զգալի ավելացման մասին։ Այս տարվա մայիսի 27-ի  ջրհեղեղից տուժած տավուշցիներից քչերին է պետբյուջեից դրամական փոխհատուցում տրվել, միջպետական ավտոճանապարհի Դիլիջան-Իջեւան հատվածում ջրհեղեղից քանդած հատվածները դեռ վերականգնված չեն, այժմ էլ նոր ջրհեղեղի մասին են զգուշացնում։

2-3 ԱՄԻՍԸ ՄԵԿ ԵՆ ԱՇԽԱՏԱՎԱՐՁ ՍՏԱՆՈՒՄ

Իջեւան քաղաքում` միջպետական ավտոճանապարհի եզրին, խորհրդային տարիներին գործած հանրախանութի շենքի երկու հարկերում գործում են կարի արտադրամասեր։ Երկրորդ հարկում հնդիկ երիտասարդներ են աշխատում, առաջին հարկում՝ Իջեւան քաղաքի, սահմանամերձ Սարիգյուղ, Սեւքար, Բերքաբեր գյուղերի բնակիչ կարող բանվորուհիներ։ Բանվորուհիները դժգոհում են, որ իրենք աշխատավարձը ուշացումներով՝ 2-3 ամիսը մեկ են ստանում։ Կարի այդ արտադրամասի բանվորներն ասացին, որ իրենք  հանդերձանք են կարում Հայաստանի  բանակի զինծառայողների համար։ Հարց է ծագում՝ ՀՀ պաշտպանությունը  այդ ձեռնարկությանը ժամանակին չի՞ վճարում կատարած պատավերների դիմաց, թե՞ այդ ընկերության տնօրինությունն է անհարկի կերպով ձգձգում աշխատավարձերի վճարումը։ Այդ խնդրի վերաբերյալ պարզաբանումներ ստանալու համար տարբերի օրերի  բազմաթիվ անգամներ զանգահարեցինք «Տեքսուվորլդ» ՍՊԸ տնօրեն Ռազմիկ Օհանյանին, սակայն նա չարձագանքեց։

ՄԻ ԾՐԱԳԻՐ, ԱՅՆ ԷԼ` ԹԱՂԻՑ

Կառավարության՝ հոկտեմբերի 10-ի նիստում վարչապետ Նիկոլ Փաշինյանը հանգամանալից, ըստ մարզերի համայնքների, ներկայացրեց պետական բյուջեի ֆինանսավորմամբ իրականացված ծրագրերը։ Տավուշի մարզն ունի 5 քաղաք, 57 գյուղ, Նիկոլ Փաշինյանը մարզի 62 բնակավայրերից միայն մեկ բնակավայրում ծրագիր ներկայացրեց՝ Իջեւան համայնքի Իջեւան քաղաքի Բլբուլյան-Այգեստան փողոցների խաչմերուկից մինչեւ Այգեստան-Ասլանյան խաչմերուկ ընկած ճանապարհահատվածի ասֆալտապատումը, որն իրականացվել է։ Իջեւան քաղաքը Նիկոլ Փաշինյանի հայրենի քաղաքն է, Ասլանյան փողոցում գտնվում է իր հայրական տունը։ Այդ փուլում Տավուշի մարզից իրականացվել է ընդամենը մեկ ծրագիր, այն էլ՝ Նիկոլ Փաշինյանի թաղում։ Տավուշի մարզում բազում չլուծված հիմնահարցեր կան, հանրակրթական շատ դպրոցների շենքեր վատթար վիճակում են, սահմանամերձ Բարեկամավանի բուժկետի տանիքի ծածկը 4 տարի բաց է, սակայն չեն նորոգում։

ՈՍԿԱՆ ՍԱՐԳՍՅԱՆ

Տավուշ