«Թմրամոլությունը, ցավոք սրտի, վաղուց է քաղաքական կատեգորիա Հայաստանի քաղաքական կյանքում»,-արձանագրում է ՀԺԿ վարչության քարտուղար Գրիգոր Հարությունյանը:
-Պարո՛ն Հարությունյան, իշխանությունից տեղեկատվություն կա, որ Հայ ազգային կոնգրեսի ներսում եթե ոչ խմորումներ, ապա լուրջ տարաձայնություններ կան, ինչը չէր թաքցրել նաեւ Արամ Սարգսյանը` ասելով, որ ներսում լինում են հակասություններ եւ բանավեճեր, որոնք, ի վերջո, բերում են կոնսենսուսի: ՀԺԿ-ի պարագայում ե՞ւս այդպես է:
-Իհարկե, այդ մասին Լեւոն Տեր-Պետրոսյանն ինքն էլ ասաց, որ ուժեր են եղել, ոչ քիչ քանակությամբ, որ համաձայն չեն եղել:
-Այսինքն` կարելի՞ է ասել, որ Կոնգրեսն ինչ-որ թեւերի է բաժանված:
-Չէ՛, չէ՛, ի սեր Աստծո:
-ԲՀԿ-ի վերաբերյալ Տեր-Պետրոսյանի գնահատականներին ինչպե՞ս են վերաբերում ՀԺԿ-ի շարքերում:
-Չենք քննարկել: Բայց կոնկրետ ինձ համար ձեւակերպումները լրիվ ընդունելի են: Սա առաջարկ է, որը կստիպի` քաղաքական դաշտում պարզություն մտնի:
-Իշխանության ներսից մեկնաբանվեց, որ այդ առաջարկից հետո ՀՀԿ-ի մոտ տրամաբանական հարց կառաջանա` այդ դեպքում ինչո՞ւ ԲՀԿ-ն իրեն չի միանում, եւ մեկ միասնական ցուցակով չեն գնում ընտրությունների:
-Թող գնան, իսկ ո՞վ է բան ասում:
-Խոսքն այն մասին է, որ Տեր-Պետրոսյանի առաջարկի արդյունքում ՀՀԿ-ում նման տրամադրություններ են ստեղծվում:
-Թող ստեղծվեն: Թող քրեական գործեր սարքեն իրար վրա, ի՞նչ ա եղել:
-Իսկ այն, որ թմրամոլությունը դարձել է քաղաքական կատեգորիա, համարում եք այդ առաջարկի արդյո՞ւնքը:
-Թմրամոլությունը, ցավոք սրտի, վաղուց է քաղաքական կատեգորիա Հայաստանի քաղաքական կյանքում, շատ ենք չէ՞ լսում, որ քաղաքականությամբ զբաղվող մարդիկ չեն խորշում դրանից: Ինչ վերաբերում է, որ այն «առաջարկի արդյունք» է, ապա ասեմ, որ ընտրությունները մոտենում են, եւ պետք է իշխանության ներսում որոշակիացնեն, «մուկն ու կատու» չպետք է խաղան, պարզապես Լեւոն Տեր-Պետրոսյանի առաջարկությունն արագացրեց էդ գործընթացը:
-Ակնհայտ է, որ հերթական անգամ Տեր-Պետրոսյանը 2,5 ամսով դադար վերցրեց: ՀԱԿ-ի ներսում քննարկվե՞լ է` արդյոք որքանով էր այդպիսի դադարը նպատակահարմար, եւ եղե՞լ են տարաձայնություններ:
-Ամեն դեպքում, մի քիչ ժամանակ կոալիցիային պետք է տրվեր: Տեսնո՞ւմ եք, չէ՞, արձագանքները: Եւ հետո, կարող է եւ շատ շուտ լինի: Չէ՛, սխալ բան չկար, եւ կարեւորը մեր գործողությունների ՕԳԳ-ն է. ձմեռ է, ցուրտ է, նոր գործընթացներ էլ չկան:
-Կոնգրեսի ներսի կուսակցությունների ղեկավարները կարծես վստահում են Տեր-Պետրոսյանի քաղաքական հոտառությանը, վերլուծություններին, հաշվարկներին: Չե՞ք կարծում, որ երբեմն այդ հաշվարկները չեն աշխատում:
-Կոնկրետ այն, ինչի մասին խոսում ենք, ոնց որ թե աշխատում է: Հիմա տեսե՛ք, «Բարգավաճ Հայաստան»-ը, իրեն կոալիցիայից բաժանելով, ինչ-որ տեղ էլ հանդես է գալիս… նաեւ ընդդիմադիր ինչ-որ մտքեր էլ են չէ՞ արտահայտում. արդար ընտրություններ, չգիտեմ ինչ: Հիմա թող ավելի կոնկրետ արտահայտվեն էլի~, իսկապե՞ս արդար ընտրության կողմնակից են, թե՞ ոչ, իրենք արդա՞ր ընտրությամբ են եկել, թե՞ ոչ:
-Իսկ պաշտոնանկություննե՞րն էլ եք համարում որպես «աշխատել»:
-Չէ՛, ես դրա հետ չէի կապի, որովհետեւ իրենք իրենց մեջ խնդիր ունեն:
-Դուք խոսում եք արդյունքների մասին, բայց կարծես ամենակարեւորի` արտահերթ ընտրությունների հարցում արդյունք չկա:
-Եկե՛ք էլի ոչինչ չբացառենք, որովհետեւ կարող է վաղն, օրինակ, կոալիցիան ցրիվ է գալիս կամ այլ խնդիրներ են առաջանում: Էս բոլորը թողնենք մի կողմ, բայց շատ քիչ ժամանակ է մնացել հերթականին:
-ՀԺԿ համագումարում ընտրություններին մասնակցելու ձեւաչափի վերաբերյալ որոշում չեղավ: Ինչո՞ւ, եւ ի՞նչ եք կարծում` ՀԺԿ-ն Կոնգրեսի հե՞տ, թե՞ մենակ կգնա:
-Պարտադիր չէ, որ համագումարով նման որոշում լինի, քանի որ վարչությունով էլ կարող ենք: Ես կարող եմ իմ անձնական կարծիքն ասել, որ 2008 թվականից մի նավակի մեջ ենք եւ պետք է այդպես էլ շարունակել:
-Իշխանությունն անհամբեր սպասում է, երբ Կոնգրեսի ներսում կսկսվեն համամասնական ցուցակի կազմման շուրջ կռիվները, որպեսզի ըմբոշխնի այդ պահը:
-Թող իրենք իրենց կռիվների մասին մտածեն: Մեզ մոտ ոչ մի անգամ կռիվ չի լինում:
-Բացառո՞ւմ եք:
-Մենք այդպիսի օրինակ ունենք` քաղաքապետի ընտրությունների ժամանակ. նորմալ, հանգիստ: Եւ հետո, ցանկացած կուսակցության ներսում ամեն դեպքում նման ժամանակներում կարող են ինչ-որ հարցեր առաջանալ, եւ բնական է, որ ինչ-որ մի քաղաքական ուժ կուզենա ավելի շատ տեղեր ունենալ, բայց դա չի կարող տանել քայքայման կամ տրոհման:
.gif)
