ՊԱՏԳԱՄԱՎՈՐՆԵՐԸ ԿՈՂՄ ԵՆ ԽՈՐՀՐԴԱՐԱՆԱԿԱՆ ԼՍՈՒՄՆԵՐԻՆ

Օրերս մի խումբ լրագրողներ բաց նամակով դիմել էին ԱԺ նախագահին, խմբակցությունների ղեկավարներին, պատգամավորներին, որպեսզի 2012թ. ԱԺ ընտրությունների ժամանակ Վանաձորի թիվ 30 ընտրատարածքում ԱԺ գործող պատգամավոր Էդմոն Մարուքյանին տրված տեղեկանքի պատմության մասով արված լրագրողական հետաքննության արդյունքների հիման վրա անցկացնեն խորհրդարանական լսումներ: Երեկ «Ժողովուրդ»-ն այս առիթով զրուցել է ԱԺ տարբեր խմբակցությունների ներկայացուցիչների հետ` պարզելու նրանց տեսակետն այս հարցի առնչությամբ:

ԱԺ ԲՀԿ խմբակցության քարտուղար ՆԱԻՐԱ ԶՈՀՐԱԲՅԱՆ
-Տիկին Զոհրաբյան, 2012թ. առ այսօր մամուլում եղել են բազմաթիվ աղաղակող հրապարակումներ 2012թ. ԱԺ ընտրությունների ժամանակ Վանաձորի թիվ 30 ընտրատարածքում պետական մակարդակով կազմակերպված աննախադեպ հանցագործությունների մասին, որին իր իրականացրած լրագրողական հետաքննության շրջանակներում օրերս անդրադարձել է նաեւ «Ժողովուրդ» օրաթերթը: Այժմ լրագրողները խնդրում են խորհրդարանական լսումներ կազմակերպել հարցը քննարկելու համար: Ձեր տեսակետը ինչպիսի՞ն է:
-Ես՝ որպես պատգամավոր, դեմ չեմ ցանկացած ֆորմատով հարցը քննարկելուն: Ընթերցել եմ «Ժողովուրդ» օրաթերթի հրապարակած շարունակական հոդվածները ու կոնկրետ ինձ համար, որպես քաղաքացի, պատգամավոր շատ կարեւոր է, որ բոլոր գործընթացները լինեն պարզ, թափանցիկ եւ տեսանելի: Ամենակարեւորը օրենքի շրջանակներում է, ու եթե կա օրինազանցություն, համենայնդեպս շատ հոդվածներ դրա վկայությունն են, ապա ինչու ոչ` ես ինքս դեմ չեմ, որ հրավիրվի խորհրդարանական լսումներ: Ու նաեւ Էդմոն Մարուքյանն ինքը մասնակցի այդ խորհրդարանական լսումներին ու ներկայացվեն պարզաբանումներ: Շատ կարեւոր է ստանալ նաեւ այդ հարցերի պատասխանները: Լրագրողական հանրությունը, ինձ՝ որպես նախկին լրագրողի, ուղղել է հարցեր, եւ ես կարծում եմ, որ այդ հարցերին պետք է պատասխանի Էդմոն Մարուքյանը:

ԱԺ ՀԱԿ խմբակցության անդամ ԼՅՈՒԴՄԻԼԱ ՍԱՐԳՍՅԱՆ
-Տիկին Սարգսյան, խնդրում եմ նշեք Ձեր տեսակետը ԱԺ պատգամավոր Էդմոն Մարուքյանի՝ կեղծ տեղեկանք ստանալու փաստի առնչությամբ:
-Յուրաքանչյուր կեղծ գործընթաց կամ կեղծ փաստաթղթերի ներկայացում մեզ համար, բնականաբար, անընդունելի է եւ պարսավելի: Բնականաբար այստեղ առանց իշխանության մասնակցության նման բան չէր կարող լինել, քանի որ շատ մանրակրկիտ են ստուգվում բոլոր փաստաթղթերը, բնակվելու ժամանակահատվածը ՀՀ-ում ու այս դեպքում բացառությունը ինձ շատ զարմացնում է: Երբ ՀԱԿ համամասնական ցուցակը ձեւավորում էինք եւ Խաչատուր Սուքիասյանին մերժեցին նման պատճառաբանությամբ, հաշվի առնելով այն հանգամանքը, որ նա ՀԱԿ համամասնական ցուցակով է ներկայացված եւ ընդդիմադիր է, արդեն ամեն ինչ հասկանալի է դառնում: Ու ինձ համար շատ զարմանալի է, որ մեկ ուրիշի դեպքում կարծես թե դա չեն նկատել: Ես նորմալ եմ գնահատում խորհրդարանական լսումները, ի վերջո մենք պե՞տք է ճշմարտության գանք, թե՞ ոչ:

ԱԺ ՕԵԿ խմբակցության անդամ ԻՇԽԱՆ ԽԱՉԱՏՐՅԱՆ
-Պարոն Խաչատրյան, հետեւե՞լ եք Էդմոն Մարուքյանի շուրջ ծավալված իրադարձություններին եւ կո՞ղմ եք այդ առիթով ԱԺ-ում լսումներ կազմակերպելու հարցին:
-Կողմ ենք խորհրդարանական լսումներին, քանի որ լրատվամիջոցներով բազմաթիվ հրապարակումներ են եղել այդ խնդրի հետ կապված: Կարծում եմ՝ խորհրդարանական լսումների ժամանակ ամեն ինչ կպարզաբանվի: Մենք կողմնակից ենք գործընթացներն արդար եւ թափանցիկ անցկացնելուն: Եթե պահանջը կա լսումներ կազմակերպելու, մենք կողմնակից ենք:

ԱԺ ՀԱԿ խմբակցության անդամ ԳԱԳԻԿ ՋՀԱՆԳԻՐՅԱՆ
-Պարոն Ջհանգիրյան, որպես իրավաբան, ինչ կասեք ԱԺ պատգամավոր Էդմոն Մարուքյանի վիճահարույց տեղեկանքի մասին:
-Լրատվական կայքերում հանդիպել եմ նման հրապարակումների քաղվածքներին, որտեղ վկայակոչվում է, որ իբր կեղծ տեղեկանք է օգտագործվել եւ Էդմոն Մարուքյանն այդ կեղծ տեղեկանքի արդյունքում գրանցվել է որպես պատգամավորական թեկնածու, որից հետո ընտրվել է: Ես կարծում եմ, որ եթե այդպիսի փաստեր կան, դրանք պետք է ստուգեն համապատասխան մարմինները: Ու մենք այստեղ որեւէ լիազորություն չունենք այդ փաստերն ուսումնասիրել, գնահատականներ տալ: Ես առաջարկում եմ այդ հրապարակման հեղինակներին ուղղակի դիմեն համապատասխան մարմիններին: Խորհրդարանական լսումներով ի՞նչ պետք է պարզվի, լսումները լիազորություն չունեն հայտարարել՝ այդ տեղեկանքը կեղծ է, թե չէ, դա համապատասխան մարմինների որոշելիքն է: Որովհետեւ, եթե լսումները համարեն հաստատված, ապա էլի պետք է դիմեն իրավապահ մարմիններին: Կարծում եմ՝ ավելի օպտիմալ է եւ արդյունավետ՝ միանգամից դիմել իրավապահ մարմիններին:

Զրուցեց ՍՈՆԱ ԳՐԻԳՈՐՅԱՆԸ