Ռուսաստանի այսպես ասած «կառուցողական ընդդիմության» հետ հանդիպման ընթացքում ՌԴ նախագահ Դմիտրի Մեդվեդեւը հայտարարել է, թե լրջորեն մտածում է ռուսական Սահմանադրության մեջ այնպիսի փոփոխություն կատարելու մասին, որը նույն անձին կարգելի երկու անգամից ավել Ռուսաստանի նախագահի պաշտոնը զբաղեցնել: Ակնհայտ է, որ Մեդվեդեւի այս հայտարարությունը պարզապես քարոզչական պարզունակ քայլ է` արված նախագահական ընտրություններից հաշված օրեր առաջ: Հայտնի է, որ մարտի 4-ին կայանալիք ընտրություններում հաղթելու առավել մեծ շանսեր ունեցող Վլադիմիր Պուտինն արդեն իսկ պաշտոնավարել է երկու անգամ եւ այս ընտրություններում հաղթելուց հետո նախագահի աթոռը կզբաղեցնի արդեն երրորդ անգամ, ինչը, հաշվի առնելով Ռուսաստանում ժողովրդավարության մակարդակն ու Պուտինի կերպարը, ավտոմատ կերպով կնշանակի եւս մեկ` չորրորդ պաշտոնավարություն: Եւ Մեդվեդեւի այս ուշացած հայտարարությունն, ափսոսանքից բացի, այլ զգացողություն չի կարող առաջացնել: Քանի որ առնվազն լուրջ չէ, երբ երկրի ղեկավարը, ով 4 տարի շարունակ բոլոր հնարավորություններն ուներ կատարելու համապատասխան փոփոխությունը, այդ մասին սկսել է «լրջորեն մտածել» իր` նախագահի աթոռը լքելուց հաշված օրեր առաջ: Նմանատիպ զգացողություն է առաջացնում մեծամասնական ընտրակարգից ամբողջովին հրաժարվելու` հայրենի ընդդիմադիր կուսակցությունների եւ ԲՀԿ համատեղ պահանջը: Եթե Հայ ազգային կոնգրեսի դեպքում հարյուր տոկոսանոց համամասնական ընտրակարգի անցնելու պահանջն ընտրություններից ընդամենը 3 ամիս առաջ հնչեցնելն ինչ-որ տեղ կարող է որպես քաղաքական մարտավարություն հասկանալի լինել, ապա «Ժառանգություն», «Հայ հեղափոխական դաշնակցություն» եւ «Բարգավաճ հայաստուն» կուսակցությունների դեպքում այս փուլում նման պահանջն առնվազն հավատընծա չէ: Քանի որ նշված երեք կուսակցություններն էլ ներկայացված են Ազգային Ժողովում եւ հրաշալի հնարավորություն ունեին այս հարցը բարձրացնել ոչ թե ընտրությունների նախաշեմին, այլեւ շատ ավելի վաղ: Դրա լավագույն հնարավորությունն անցած աշնանը «Ընտրական օրենսգրքի» փոփոխությունն էր, որի ընթացքում, սակայն, նշված կուսակցություններից ոչ մեկը հանդես չեկավ համամասնական ընտրակարգի անցնելու օրենսդրական առաջարկությամբ: Ուստի, ինչպես Մեդվեդեւի, այնպես էլ նշված կուսակցությունների դեպքում, դժվար է անկեղծության տարրեր գտնել: Բայց եթե Ռուսաստանի գրեթե նախկին նախագահն, ըստ ամենայնի, այլեւս հնարավորություն չի ունենա իրականացնելու իր մտադրությունը, ապա հայրենի քաղաքական կուսակցությունները համամասնական ընտրակարգի անցնելու իրենց ցանկությունն իրագործելու նոր հնարավորություն հաստատ կունենան: Մնում է ցանկությունը: Կապրենք` կտեսնենք:
.gif)
