ՀԱՐՑ. Մի քանի օր առաջ մի աղջիկ` Մարքեթինգի հայկական ասոցիացիայից, զանգահարեց բջջային հեռախոսիս եւ շատ սիրալիր սկսեց հարցումներ անել: Քանի որ ժամանակ ունեի, համաձայնեցի ու սկսեցի պատասխանել: Հարցումները հիմնականում բանկերին էին վերաբերում, բայց այլ հարցեր էլ էին տրվում: Ցանկանում եմ իմանալ, թե այդ հարցումների նպատակը որն է, ինչ նպատակ է հետապնդում, եւ դա ինչ կտա այդ ասոցիացիային:
ՊԱՏԱՍԽԱՆ. «Մարքեթինգի հայկական ասոցիացիա» հասարակական կազմակերպությունը եռամսյակը մեկ հետազոտություններ է իրականացնում, թե սպառողները ոնց են վերաբերվում տարբեր բանկերին, նրանց իմիջին, սպասարկման որակին եւ այլն: Ըստ արված հարցումների` մենք հասկանում ենք, թե Երեւանի բնակչությունը որ բանկերից եւ բանկային ծառայություններից է օգտվում, ծառայությունների բազմազանությունից տեղյակ է, թե ոչ: Հիմնական նպատակը սա է: Եղած տեղեկատվությունը մշակվում է, այնուհետեւ տրամադրվում բանկերին, միջազգային կազմակերպություններին, մամուլին եւ այլն: Միջազգային պրակտիկայում գոյություն ունեն ստանդարտներ, որոնց մենք հետեւում ենք որպես մարքեթինգի ասոցիացիա, եւ մեր հարցումները բոլորը համապատասխանում են միջազգային նորմերին, անձնական ոչ մի տեղեկություն չի հրապարակվում:
Օրինակ` մի քանի բանկից դժգոհում են, որ թղթաբանությունը շատ է, «Ամերիաբանկ»-ից գոհ են, որ փոխանցումներն արագ են կատարվում, «Յունիբանկ»-ի հետ կապված` 13 տոկոսը պարզաբանել են, որ ծառայությունները բարձր մակարդակով են կատարվում: Նման հարցումների արդյունքում բանկերը տեղեկանում են, թե բնակչության քանի տոկոսն է լավ կամ վատ վերաբերվում իրենց, ինչը մտածելու տեղ է տալիս, որ նման խնդիրներին արձագանքեն եւ ավելի ճիշտ աշխատեն:
հասարակական կազմակերպության
տնօրեն Յուրի Նավասարդյան
«ԺՈՂՈՎՈՒՐԴ». Նախաձեռնությունը, անշուշտ, շատ ավելի արդյունավետ կլինի, եթե հարցումների արդյունքները տրամադրվեն բանկերին, եւ վերջիններս հասարակության կողմից իրենց ծառայություններին տրվող գնահատականներից համապատասխան հետեւություններ անեն:
.gif)
