ՀԱՅՐԻԿՅԱՆԻ ՀԱՑԱԴՈՒԼԸ ՈՉԻՆՉ ՉԻ ՓՈԽԻ

Քաղաքական ասպարեզում տեղի ունեցող զարգացումներին մեր հասարակության տարբեր շերտեր յուրովի են արձագանքում: Հայաստանյան քաղաքական դաշտի փոփոխությունների շուրջ իրենց մեկնաբանություններով, եւ ինչու չէ, նաեւ ակտիվ մասնակցությամբ, աչքի են ընկնում նաեւ մի շարք արվեստագետներ, որոնցից մեկն էլ Երեւանի պետական կամերային թատրոնի դերասան Սերգեյ Դանիելյանն է, ով «Ժողովուրդ»-ի հետ զրույցում հայտնեց իր տեսակետը ներկայիս քաղաքական իրավիճակի շուրջ:

-Պարոն Դանիելյան, ԱԻՄ առաջնորդ Պարույր Հայրիկյանը դեռ ամռանը խոստանում էր հացադուլ հայտարարել՝ պահանջելով Սերժ Սարգսյանի հրաժարականը: Սեպտեմբերի 8-ին նա, ի վերջո, ՀՀ նախագահի նստավայրի առջեւ սկսեց խոստացած հացադուլը: Ինչպե՞ս եք գնահատում Հայրիկյանի պայքարի այս ձեւը:
-Պարույր Հայրիկյանի ցանկությունը մարդկային է: Մեր քաղաքացիները զանազան միջոցներ կարող են գործի դնել` պահանջելով քաղաքական դաշտում փոփոխություններ կատարել: Պարույր Հայրիկյանն էլ որպես քաղաքական գործիչ առավելեւս ունի այդ իրավունքը:
-Իշխանափոխություն պահանջելու այս եղանակն արդյունավե՞տ է:
– Պարույր Հայրիկյանն էլ դա է կարողանում անել: Նախագահի հրաժարական եւ, առհասարակ, իշխանափոխություն պահանջելու համար մարդիկ կարող են նույնիսկ պառկել ռելսերի վրա, մազերը պոկել հրապարակային վայրերում, գոռալ, աղաղակել եւ այդպես շարունակ: Կարող են նաեւ հիմնավոր, հիշվող եւ ամենակարեւորն՝ արդյունավետ քաղաքական գործունեություն ծավալելու միջոցով իրավունք ունենալ հրաժարականներ պահանջել: Մեթոդները բազմազան են: Արդյունքներն են նույնը լինում՝ որպես կանոն:
-Ձեր կարծիքով, Հայրիկյանի` իշխանափոխության պահանջին ո՞ր քաղաքական ուժերը կմիանան:
-Չեմ կարող կոնկրետ քաղաքական ուժերի առաջնորդների կամ էլ ներկայացուցիչների անուններ նշել, բայց պետք է ասեմ, որ, որպես կանոն, հացադուլները հաջողությամբ չեն պսակվում: Եվ քաղաքական շատ քիչ ուժեր կմիանան Հայրիկյանի այս պահանջին հացադուլի միջոցով: Հացադուլների հետեւանքը կարող է լինել հիվանդանոցային հանգուցալուծումը: Բայց դե հիմա այդ մարդն էլ այդ տարբերակն է ընտրել, ինչ արած, նա էլ գտնում է, որ իշխանափոխության հասնելու լավագույն տարբերակը հացադուլ անելն է: Ժամանակը ցույց է տալիս, որ բողոքի երթերը, զանազան ընդվզումները՝ ընդդեմ իշխանական թեւի, մեր օրերում հաջողություն չեն խոստանում:
-Քաղաքական դաշտի ընդդիմադիր թեւի գործիչները դեռ ամիսներ առաջ էին խոստանում աշնանային «թեժացումներ»: Ի՞նչ կանխատեսումներ ունեք, Ձեր կարծիքով, այդ թեժացումները ինչպե՞ս կդրսեւորվեն:
-Գուշակումներ չեմ կարող անել, հատկապես այն պատճառով, որ մեր քաղաքական դաշտն անկանխատեսելի է, ինչեր ասես կարող են լինել: Արդյոք թեժացումնե՞ր, թե՞ պասիվ քաղաքական գործողություններ կլինեն իշխանավորների եւ ընդդիմադիրների կողմից, չեմ կարող ասել, բայց դե կապրենք՝ կտեսնենք: Լիահույս եմ, որ քաղաքական բոլոր եղանակներն ի նպաստ մեր ժողովրդի կլինեն:

Զրուցեց ԼՈՒՍԻՆԵ ՀԱԿՈԲՅԱՆԸ

 
ԼՈՒՐԵՐ

ՎԻՇՆԵՎՍԿՈՒ «ԳՐԱՆԴ»-Ը ԹԱՐԳՄԱՆՎԵԼ Է ՀԱՅԵՐԵՆ

Առաջիկայում Երեւան է ժամանելու աշխարհահռչակ լեհ գրող Յանուշ Լեոն Վիշնեւսկին: Հայ ընթերցողին նա կներկայացնի իր նոր ստեղծագործությունը՝ «Գրանդ» վեպը: Հանդիպումը բացառիկ է, քանի որ առաջին անգամ հայ ընթերցողը հնարավորություն կունենա ընթերցելՎիշնեւսկու ստեղծագործությունը՝ հայերեն:
Գրքի հայերեն, ռուսերեն եւ ուկրաիներեն թարգմանությունները կատարվել են միաժամանակ: Հայերեն թարգմանության խմբագիրն է Զավեն Բոյաջյանը:
Սոպոտի «Գրանդ» հյուրանոցում տեղի ունեցող իրադարձությունները փոխում են մարդկանց ճակատագրերը: Մեր օրերում գործող այս հյուրանոցում տարբեր ժամանակներում բնակվել են Հիտլերը, Պուտինը, դը Գոլը, Մառլեն Դիտրիխը եւ այլք: Հրեաների հոլոքոստի, քաղաքական ինտրիգների ու պարզ մարդկային հարաբերությունների մասին պատմությունները խաչվում են հյուրանոցային համարներում ու դառնում Վիշնեւսկու վեպի առանցքը: Իրեն հատուկ նրբությամբ՝ Վիշնեւսկին ներկայացնում է հերոսների ապրումներն ու զգացողությունները, վախերն ու երջանկությունը:
Դավաճանության, հիշողությունների ու սպասումների մեջ խճճված հերոսների համար Վիշնեւսկին ունի միշտ գործող մի դեղատոմս՝ սերը:
Արդեն հաջորդ շաբաթ «Գրանդ»-ը կհայտնվի երեւանյան գրախանութներում: Գրքի շնորհանդեսը, որին կմասնակցի նաեւ հեղինակը, տեղի կունենա սեպտեմբերի 27-ին՝ Երեւանի «Ռոյալ Թուլիփ Գրանդ» հյուրանոցում:
Հիշեցնենք, որ «Գրանդ»-ի շնորհանդեսը «Գրական տապան» փառատոնի միջոցառումներից է: Ամենամյա գրական փառատոնն այս տարի տեղի կունենա սեպտեմբերի 18-28-ը:

ՀՈԲԵԼՅԱՆԱԿԱՆ ՄԻՋՈՑԱՌՈՒՄՆԵՐԸ ՇԱՐՈՒՆԱԿՎՈՒՄ ԵՆ

Վարչապետ Հովիկ Աբրահամյանի գլխավորությամբ կառավարությունում տեղի է ունեցել դիրիժոր, խմբավար, Հայաստանի պետական ակադեմիական երգչախմբի գեղարվեստական ղեկավար եւ գլխավոր դիրիժոր, ԽՍՀՄ ժողովրդական արտիստ Հովհաննես Չեքիջյանի 85-ամյակի միջոցառումների ծրագրի հոբելյանական հանձնաժողովի նիստը:
Հանձնաժողովը քննարկել է հոբելյանական միջոցառումների ընթացքը եւ անդրադարձել առաջիկայում նախատեսվող ծրագրերին: Հայաստանի պետական ազգային ակադեմիական երգչախմբի, ՀՀ պետական ֆիլհարմոնիկ նվագախմբի եւ մենակատարների մասնակցությամբ արդեն իսկ տեղի է ունեցել մաեստրոյին նվիրված հոբելյանական համերգ, կառավարության աջակցությամբ հրատարակվել է «Հովհաննես Չեքիջյան» գիրքը, որի շնորհանդեսը կկայանա առաջիկայում: Ավետիք Իսահակյանի անվան կենտրոնական գրադարանում բացվել է մաեստրոյին նվիրված գրքերի ցուցահանդես, պատրաստվել են տարբեր հեռուստահաղորդումներ, տեսաֆիլմեր՝ նվիրված մեծանուն արվեստագետին: Չեքիջյանին նվիրված միջոցառումներ են կազմակերպվել նաեւ ՀՀ սփյուռքի նախարարության կողմից անցկացված փառատոներում ու ծրագրերի շրջանակում:
Սեպտեմբերի 26-27-ին Հայաստանի գիտությունների ազգային ակադեմիայում կանցկացվի Հովհաննես Չեքիջյանի 85-ամյակին նվիրված գիտական նստաշրջան: Կոմիտասի անվան Երեւանի պետական կոնսերվատորիայի ուսանողների համար կսահմանվի Հովհաննես Չեքիջյանի անվան կրթաթոշակ:

 
ԾՆՎԵԼ Է ԵՐԿՐՈՐԴ ՈՐԴԻՆ

Աբել Աբելյանի ընտանիքում մեծ ուրախություն է. լույս աշխարհ է եկել դերասանի երկրորդ զավակը: Դերասանուհի Օլյա Հակոբյանն ամուսնուն կրկին որդի է պարգեւել: Երջանիկ ծնողները փոքրիկին անվանակոչել են Ռոբերտ:
Դերասանը պատրաստվում է գեղեցիկ անակնկալ մատուցել սիրելի կնոջը: Նա համոզված է, որ այս դեպքում լավագույն նվերը հանգիստն է: Աբելը մտադրություն ունի մի քանի ամիս անց գեղեցիկ ընտանեկան ճամփորդություն կազմակերպել:

ԿՐԿՆՕՐԻՆԱԿՈՒՄ ԵՆ

Վերջին շրջանում բավականին հաճախ են հանդիպում այնպիսի դեպքեր, երբ օտարերկրացի երգիչ-երգչուհիները կրկնօրինակում են հայ կատարողների երգերը: Ասվածի ամենաթարմ օրինակը ռումինացի երգչուհի RalucaDragoi-ի ներկայացրած կատարումն է, որը Լիլիթ Հովվհաննիսյանի «Ես եմ հորինել» երգի կրկնօրինակումն է։ Թեեւ պարբերաբար խոսակցություններ են պտտվում, որ հենց հայ երգիչ-երգչուհիներն են կրկնօրինակում օտարազգի կատարողների երգերը, Youtube-ը հնարավորություն է տալիս տեսնել, թե որ կատարողը երբ է ներկայացրել այս կամ այն հոլովակը:
Լիլիթ Հովհաննիսյանն այս երգը ներկայացրել է 2012 թվականի նոյեմբերի 14-ին, RalucaDragoi-ն` 2013 թվականի օգոստոսի 31-ին:
Ռումինական տարբերակում երգն անվանվում է «Unde i iubirea», որը թարգմանաբար նշանակում է «Որտեղ է սերը»:

ՆՈՐ ՀԱՂՈՐԴԱՎԱՐՈՒՀԻ

Առաջին ալիքի «Առավոտ լուսո» ծրագրի հաղորդավարների կազմը ենթարկվել է փոփոխությունների: Լիլիթ Մուրադյան-Վահե Խանամիրյան եւ Հերմինե Ստեփանյան-Արման Մարգարյան հաղորդավարական զույգերն են այսուհետ ողջունելու հեռուստադիտողներին:
Այսուհետեւ Արման Մարգարյանի հետ հեռուստադիտողներին առավոտյան ողջունող Հերմինե Ստեփանյանն այս ասպարեզում փորձված է: Հաղորդավարուհին տեւական ժամանակ վարել է «Կենտրոն» հեռուստաընկերությամբ հեռարձակվող «Սկսենք նորից» հաղորդումը: