«Ժառանգություն» կուսակցության առաջնորդ Րաֆֆի Հովհաննիսյանը «Ժողովուրդ»-ի հետ զրույցում հայտարարեց, թե ԱԺ «Ժառանգություն» խմբակցությունում եւ ընդհանրապես կուսակցությունում աշխատանքները նորմալ են ընթանում: Իսկ արդեն ԱԺ «Ժառանգություն» խմաբակցության նախկին ղեկավար Զարուհի Փոստանջյանի վերադարձից հետո կուսակցության աշխատանքներն ավելի ամբողջական կլինեն:
Երեկ հրավիրած ասուլիսում Ր.Հովհաննիսյանն անդրադարձավ Աժ 4 ոչ իշխանական ուժերի համախմբմանն ու աշխատանքներին` նշելով. «Ներկա դրությամբ մենք խորհրդարանի ներսում շատ կառուցողական համագործակցություն ունենք՝ ընդդիմադիր չորս ուժերի միջեւ: Ածականները փոփոխական են, բայց կարեւոր է էությունը, կարեւոր է, որ վերջին շրջանում խորհրդարանական նախաձեռնությունները քննարկվում են որոշակի արդյունքներով: Դա է համագործակցության եղանակը ներկա դրությամբ, ավելին չեմ կարող ասել, որովհետեւ մինչեւ հիմա չի կայացել չորս ուժերի ղեկավարների հավաքը, որը իմ եւ նաեւ ուրիշների կարծիքով՝ թույլ կտա որոշ անհարթություններ շտկել, որոշ տարաձայնություններ հաղթահարել եւ վերջապես խոսել 4-ի ձեւաչափի մասին»:
Ներկա դրությամբ այդ ձեւաչափը գործում է: Կան տարբեր մոտեցումներ: Նրանք, ովքեր համարում են, որ անցյալ տարվա նախագահական ընտրությունները կեղծվել են, իրենք պետք է ընդունեն ամբողջական իշխանափոխության գաղափարը, գործողությունների ծրագիրը եւ միասին ճշտեն ճանապարհային քարտեզը՝ այդ նպատակին հանելու համար: Ներկա դրությամբ չկա այդ համաձայնությունը, բայց դա չի նշանակում, որ «Ժառանգություն»-ը խորհրդարանում հետ է կանգնելու կառուցողական այդ ձեւաչափից»,- ընդգծեց Ր. Հովհաննիսյանը:
«Ժառանգության» առաջնորդը պատասխանեց նաեւ «Ժողովուրդ»- ի հարցերին:
-Պարոն Հովհաննիսյան, ՀՀ նախագահի ընտրություններից հետո, երբ Ձեր «հետեւից» մի ամբողջ բանակ էր գալիս, Դուք հանկարծակի որոշեցիք մեկնել ԱՄՆ ու իշխանափոխության պայքարը կիսատ թողնելով` ամիսներով «անհետացաք»: Ինչո՞ւ մեկնեցիք ԱՄՆ եւ ինչո՞ւ եք որոշել այժմ նորից հանրահավաքներ անցկացնել:
-Գիտեք ինչ… մարդկային փոքր ողբերգություն կար, որի համար ես երկու ամսով գնացի ԱՄՆ եւ եկա, ու հեռու նման դեպքերը ձեզանից, բոլորից: Ինչպես գիտեք, իմ ծնողներն ապրում են այնտեղ, ոչ իրենց ընտրությամբ եւ հիմնականում դա եղել է ընտանեկան պատճառներով:
-Բայց Դուք գոնե կարող էիք ԱՄՆ-ից արձագանքել ՀՀ-ում տիրող իրավիճակին: Այս ընթացքում Հայաստանում գազի գնի թանկացում տեղի ունեցավ, ստորագրվեցին գազային խայտառակ համաձայնագրեր, վաճառվեց «Որոտանի» հէկ-ը, սակայն Դուք որեւէ կերպ չարձագանքեցիք, ինչու:
-Դուք հարցը բացասական առումով եք տալիս, բայց հաշվի չեք առնում, որ «Ժառանգություն»-ը, մեր խմբակցության պատգամավորները, ի տարբերություն այլոց, չեն հավաքվել ինչ-որ մեկի շուրջ, ու կարծում եմ, որ սխալ հարց եք տալիս, քանի որ հենց «Ժառանգություն»-ն իր գործունեությամբ իր արձագանքը տվեց բոլոր՝ ներքին եւ արտաքին խնդիրներին ու մարտահրավերներին:
-Բայց ԱԺ «Ժառանգություն» խմբակցությունը կարծես թե որեւէ կերպ չի կարողանում համախմբվել ու աշխատել միահամուռ կերպով: Այսօր «Ժառանգություն»-ում մեկ տեսակետ գոյություն չունի: Կարծես թե բոլորն իրարից անտեղյակ են ու տարբեր հարցերի հետ կապված տարբեր տեսակետներ են հնչեցնում: Ըստ Ձեզ, ինչո՞ւ չի ստացվում «Ժառանգության» կոլեգիալ աշխատանքը:
-Կրկին ձեր հարցը բացասական է, բայց ես կարծում եմ, որ ԱԺ «Ժառանգություն» խմբակցությունն անցել է յուրօրինակ ճանապարհ: Ինչպես գիտեք, դա մեկ խմբակցություն չէ, խմբակցությունը բաղկացած չէ միայն մեր կուսակցականներից, կան քաղաքացիական հասարակությունից, այլ կուսակցություններից մարդիկ: Խորհրդարանական ընտրությունների ժամանակ եղավ այն, ինչ եղավ, եւ հիմա ես կարծում եմ, որ խմբակցությունն իր փոքրաթիվ անդամներով կատարում է իր առաքելությունը: Միգուցե Զարուհուն եք կարոտում, Զարուհին Բոստոնից կվերադառնա հունիս ամսին ու ավելի կամբողջանա խմբացկության գործունեությունը: Բայց ես կարծում եմ` մեր ներկայացուցիչները թե՛ իրենք իրենց փորձով, թե՛ գործունեությամբ, թե՛ դիվանագիտական աշխատանքով կատարում են իրենց առաքելությունը:
-Պարոն Հովհաննիսյան, շուտով մոտենում է ապրիլի 9-ը, եւ դժվար է չհիշել, որ Ձեր հասցեին ամենասուր քննադատությունը հնչեց այն ժամանակ, երբ Դուք Բաղրամյան 26-ում թողնելով ժողովրդին, նախընտրեցիք գնալ Ծիծեռնակաբերդ` ՀՀ ոստիկանապետ Վլադիմիր Գասպարյանի հետ աղոթելու: Չեք փոշմանաե՞լ, որ նման կերպ վարվեցիք ժողովրդի հետ, ինչից հետո նրանք հիասթափություն ապրեցին:
-Դուք տալիս եք հարց, որը ճշմարիտ չէ ու հեքիաթի վրա է հիմնված: Լավ չէ… «Սերժիկ հեռացիր» գոչյունների ներքո մենք շարժվեցինք այդ հոգեհանգիստը Ծիծեռնակաբերդում կատարելու համար: Հայաստանի ոստիկանապետը որոշեց միանալ մեզ: Ու նրանք, ովքեր հաճույք են ստանում` միասնական աղոթքի մասին հայտարարություններ անելով, ուղղակի խեղաթյուրում են իրականությունը կամ ուզում են ինչ-որ միավորներ դուրս բերել: Ժողովուրդը գնաց… մենք մոմակալներով ասացինք մեր խոսքը: Ու թե ինքը միացավ` դա, իհարկե, իր գործն է: Իսկ վերջում, երբ իմացանք, որ ժողովրդի մի մասը չէր իմացել ու մնացել էր Բաղրամյան պողոտայում, մենք վերադարձանք այնտեղ:
«ՓՆՏՐՎՈՒՄ» ԵՆ ԱՊՕՐԻՆԻ ՋՐՕԳՏԱԳՈՐԾՈՂՆԵՐ
Բնապահպանության նախարարության Ջրային ռեսուրսների կառավարման գործակալության պետ Վոլոդյա Նարիմանյանը, անդրադառնալով Արարատյան ավազանի ընդերքային ջրերի հորիզոնների անկմանը, վստահեցրեց, թե դա արդյունքն է այն բանի, որ դեռ խորհրդային տարիներից առանց թուլտվության խորքային հորեր են բացվել ու օգտագործվել:
-Պարոն Նարիմանյան, «Ջրի ազգային պաշար ծրագրով» տարեկան 1 մլրդ խմ ջրից ավելի չի կարելի հանել ընդերքից, քանի որ միայն այդ դեպքում է բնությունն ի վիճակի վերականգնել ընդերքային պաշարը: Այժմ կոնկրետ ինչքա՞ն ջուր է հանվում ընդերքից:
-Ջրօգտագործման թույլտվություններով՝ 937 միլիոն խմ: Ես չեմ կարող ասել, թե ինչքան է հանվում տարեկան, բայց թույլատրված է 937 միլիոն խմ:
-Բայց այսօր խնդիր կա, քանի որ դրանից առավել ջուր է հանվել ընդերքից: Ինչո՞ւ բավարար վերահսկողություն չկա:
-Ես նշել եմ, որ կան հորեր, որոնք առանց ջրօգտագործման թույլտվության շահագործվում են մինչեւ այժմ՝ խորհրդային տարիներից եկած: Մենք հաշվառել ենք. 599 խորքային հորից միայն 14-ը ունի ջրօգտագործման թույլտվություն: Ու դա էլ պատճառ է հանդիսանում այս ամենի: Իսկ մենք այժմ կամաց-կամաց լուծարում ենք, որպեսզի վերացնենք այդ ապօրինի ջրօգտագործումը:
-Իսկ ովքե՞ր են ապօրինի թույլտվություններ տվել, ինչո՞ւ համապատասխան գերատեսչությունները չեն հետեւել, որպեսզի նման բան չլինի:
-Ես չեմ կարող ասել, թե ովքեր են մեղավորները, ներողություն: Դա երեւի համապատասխան մարմինները կարող են ասել:
-Ի՞նչ սկզբունքով եւ ինչ չափաքանակով են թույլատրում հորատանցքեր բացել:
-Այլեւս թույլտվություններ չեն տրվում, իսկ նախկին թույլտվություններով սահմանված չափաքանակը կազմում է 937 միլիոն խմ: Թույլտվությունը տալիս է լիազոր պետական մարմինը: Կա կառավարության համապատասխան որոշում, եւ դրա համաձայն փաթեթը ներկայացվում է, նայում են, գնահատում ու թույլ են տալիս, կամ թույլ չեն տալիս:
-Արմավիրի մարզում ինքնաշատրվանող ջրերը նվազել են, բնապահպանները ահազանգում են, որ մի քանի տարի հետո լուրջ վտանգի առջեւ ենք կանգնելու:
-Արմավիրի մարզի խորքային հորերի հաշվառումը երբ որ ավարտվի` (Արարատի մարզում արդեն ավարտվել է), այն ժամանակ էլ մենք կհայտարարենք, թե ինչքանից ինչքանն է թույլտվություն ունեցել: Խորհրդային միության տարիներից եկած խորքային հորեր են, մարդիկ այդ տարիներից թույլտվություն չեն ձեւակերպել ու օգտագործում են այդ հորերը:
Նյութերը` ՍՈՆԱ ԳՐԻԳՈՐՅԱՆԻ
ԼՈՒՐԵՐ
ՄԻԱՍՆԱԿԱՆ ՀԱՎԱՔ
Լավատեղյակ աղբյուրներից «Ժողովուրդ»-ին հայտնի դարձավ, որ խորհրդարանական չորս ուժերն ընդհանուր հայտարարի են եկել միասնական հանրահավաք անելու գաղափարի շուրջ: Սակայն, ըստ նույն տեղեկությունների, նրանք վերջնական որոշում չեն կայացրել հանրահավաքի օրվա հետ կապված` դա անել ապրիլի 28-ից` կառավարությանն անվստահություն հայտնել նախաձեռնության քննարկումից առաջ, թե հետո: ԱԺ ՀԱԿ խմբակցության քարտուղար Արամ Մանուկյանը «Ժողովուրդ»-ի հարցին, թե երբ եք միասնական հանրահավաք անելու, նշեց. «Դեռ կոնկրետություն չկա: Այս պահին կոնկրետություն կա այն համատեղ միջոցառումների անցկացման հետ կապված, որոնց մասին հայտարարել ենք»:
ԼԻԴԵՐՆԵՐՈՎ
Երեկ ԲՀԿ նախագահ Գագիկ Ծառուկյանը հանդիպել է ՀԺԿ առաջնորդ Ստեփան Դեմիրճյանի հետ: Քննարկման հիմնական թեման եղել են երկրում ստեղծված իրավիճակն ու դրանից դուրս գալու ելքերը. ընդ որում, կողմերը նշել են, որ երկրում կուտակված խնդիրների լուծումը կարելի է գտնել միայն միասնական աշխատանքի արդյունքում: Տեղեկացնենք նաեւ, որ ԲՀԿ-ից հանդիպմանը մասնակցել են Ստեփան Մարգարյանն ու Միքայել Մելքումյանը, ՀԺԿ-ից` Ֆելիքս Խաչատրյանն ու Ստեփան Մինասյանը: Նկատենք, որ ԲՀԿ եւ ՀԺԿ առաջնորդների հնչեցրած մտքերի հետ ամենամեծ ցանկության դեպքում անգամ անհնար է չհամաձայնվել: Սակայն այստեղ մեկ այլ խնդիր կա. ԲՀԿ նախագահը, չգիտես ինչու, հանդիպումները կազմակերպում է հենց իր կուսակցության գրասենյակում, այնինչ` այդ ամենը նա կարող էր անել նաեւ ԱԺ-ում. ի վերջո, ե՛ւ ինքը, ե՛ւ Ստեփան Դեմիրճյանը պատգամավորներ են ու կարող են իրենց բանակցություններն անցկացնել հենց իրենց` քաղաքական թատերաբեմ հանդիսացող աշխատավայրում:
ՎԱՐՉՈՒԹՅԱՆ ՊԵՏԻ ԹԱՔՆՎԱԾ ՍՏՈՒԳՈՒՄՆԵՐԸ
Երեկ «Ժողովուրդ»-ի թղթակիցը Օպերայի տարածքում ուշագրավ դեպքի է ականատես եղել. Երեւանի քաղաքապետարանի տրանսպորտի վարչության պետ Հենրիկ Նավասարդյանը Օպերայի մոտ գտնվող կրպակի հետեւից հետեւում էր տրանսպորտի եռուզեռին: Ընդ որում, նա իրեն պահում էր տարօրինակ կերպով. կանգառի հարեւանությամբ գտնվող կրպակի հետեւից ծիկրակում էր, թաքնվում, անհանգիստ հետ ու առաջ քայլում եւ այսպես շարունակ: Ու տպավորություն էր, թե նա ինչ-որ մեկից վախեցած թաքնվում է: «Ժողովուրդ»-ի հետ զրույցում Հենրիկ Նավասարդյանն իր այս քայլը բացատրեց հետեւյալ կերպ. «Կրպակի հետեւից չեմ հետեւել, այլ չվացուցակի մոտ կանգնել եւ հետեւել եմ երթուղայինների աշխատանքին, թե որքանով են բարեխիղճ աշխատում: Նշեմ, որ դա իմ աշխատանքի մի մասն է եւ օրվա ընթացքում տարբեր ժամերի մենք այդպիսի ստուգումներ իրականացնում ենք»:
.gif)
