Սերժ Սարգսյանը երեկ հեռախոսազրույց է ունեցել Եվրոպական ժողովրդական կուսակցության նախագահ Վիլֆրիդ Մարտենսի հետ` անդրադառնալով Սաֆարովի արտահանձնմանը: Համաձայն պաշտոնական հաղորդագրության՝ հեռախոսազրույցը տեղի է ունեցել ԵԺԿ նախագահի նախաձեռնությամբ: Առաջին հայացքից թվում է` միանգամայն նորմալ երեւույթ է. եվրոպական կուսակցությունների միավորման ղեկավարը զանգահարել է` հետաքրքրվելու ԵԺԿ-ի անդամ ՀՀԿ, ՕԵԿ եւ «Ժառանգություն» կուսակցություններին այս օրերին առավելապես հուզող խնդրով, տվյալ դեպքում` մարդասպան Սաֆարովի ազատ արձակմամբ: Սակայն այստեղ կան մի քանի վիճահարույց պահեր: Նախ` ինչու է ԵԺԿ-ն այդպիսի ուշացմամբ արձագանքում, այն դեպքում, երբ Սաֆարովի արտահանձնմամբ Հայաստանում կարող էին կասկածի տակ դրվել եվրոպական արժեքներն ընդհանրապես, եւ Հայաստանի եվրոպական քաղաքականությունը` մասնավորապես: Ասել է թե` եթե ԵԺԿ-ն իրապես կարեւորում էր Հայաստանի անդամակցությունը, ապա պետք է որ սաֆարովյան խայտառակությանն առաջինը արձագանքողներից մեկը լիներ: Երկրորդ. ինչո՞վ էր պայմանավորված հայկական երեք կուսակցությունների լռությունը, ինչո՞ւ նրանք մինչ օրս որեւէ հայտարարությամբ կամ նամակով չեն դիմել ԵԺԿ-ին: Ընդ որում, այստեղ առավել նախաձեռնող կարող էին լինել «Օրինաց երկիր»-ը եւ «Ժառանգություն»-ը: Եւ ի վերջո` չմոռանանք, որ ՀՀԿ-ական Արմեն Աշոտյանը եւ Կարեն Ավագյանը բաստուրմակոնյակային դիվանագիտությամբ կարողացան ապահովել այդ նույն Մարտենսի չափազանց օպերատիվ եւ ցանկալի գնահատականը խորհրդարանական ընտրությունների վերաբերյալ: Չենք կասկածում, որ այս հարցում նրանք պատրաստ էին դատարկել կոնյակի գործարանի պահոցները` ԵԺԿ-ից անհրաժեշտ արձագանք ստանալու համար: Ինչո՞ւ ուրեմն անցած 12 օրերին որեւէ մեկը չհամարձակվեց դիմել ԵԺԿ-ին: Այս հարցի պատասխանը երեկ տվեց «Նոր ժամանակներ» կուսակցության նախագահ Արամ Կարապետյանը` «Առավոտ»-ին հայտնելով, որ Սաֆարովին Ադրբեջանին հանձնած Հունգարիայի վարչապետ Վիկտոր Օրբանը ԵԺԿ փոխնախագահն է: Ասել է թե` առանցքային ֆիգուր այն կազմակերպությունում, որին անդամակցում են ՀՀԿ-ն, ՕԵԿ-ը եւ «Ժառանգություն»-ը: Բնականաբար, այդ երեք քաղաքական ուժերը չէին կարող չիմանալ այդ մասին: Գիտեին, սակայն լռում էին: Հարց է առաջանում` ինչո՞ւ: Ի վերջո, նույն Սերժ Սարգսյանն էր, որ դիմելով Հայաստանի միջազգային գործընկերներին, նշեց, որ մենք սպասում ենք նրանց հստակ գործողություններին: Ինչպե՞ս կարող էր իր քաղաքական գործընկերների շարքում ՀՀԿ ղեկավարությունը մոռանալ ԵԺԿ-ին: Իրականում պարզ է, որ հանգիստ թողնելով ԵԺԿ-ին, ՀՀ իշխանությունները ցանկանում էին ավելորդ անգամ չշեշտել, որ սաֆարովյան խայտառակ գործարքով Հայաստանին ապտակ հասցնողը հենց այն Եվրոպան էր, որին այդքան ձգտում է ՀՀ քաղաքական վերնախավը: Բայց, ինչպես հայտնի է` մախաթը պարկում չես թաքցնի: Եւ ուշագրավ է, որ երեկվա հեռախոսազրույցը կայացավ Օրբանի` ԵԺԿ-ում ունեցած դերակատարության բացահայտումից բառացիորեն ժամեր անց:
.gif)
