Կաթ վերամշակող ընկերություններն իջեցրել են կաթի մթերման գները. բնակիչները բողոքել են

Արդեն մի քանի օր է, ինչ ՀՀ Շիրակի մարզի Ամասիայի տարածաշրջանի թվով ութ գյուղերի բնակիչներ հայտնվել են անելանելի դրության մեջ:Բանն այն է, որ նույն մարզում գործող կաթի վերամշակման ընկերությունները բնակիչներին տեղեկացրել են, որ մայիսի 1-ից մեկ լիտր կաթը մթերելու են 150 դրամով: Մինչդեռ նախկինում այն մթերում էին 170 դրամով:

Կաթ վերամշակող ընկերությունների ներկայացրած առաջարկին դեմ են արտահայտվել ութ գյուղի բնակիչ, ինչի առիթով էլ երեկ նրանք Բերդաշեն գյուղում բողոքի ակցիա են անցկացրել: Այդ գյուղերն են Զորակերտը, Զարիշատը, Ծաղկուտը, Շաղիկը, Արդենիսը, Բերդաշենը, Ալվարը և Գառնալիճը: Այս խնդրի շուրջ Armlur.am-ը զրուցեց Բերդաշենի գյուղապետ Համբարձում Ախցեխեցյանի հետ:

-Պարոն Ախցեխեցյան, ինչպե՞ս լուծվեց խնդիրը:

-Մարզպետը տեղյակ է խնդրին եւ բանակցություններ է վարել գյուղատնտեսության նախարարի տեղակալների հետ: Արդյունքում՝ մայիսի 4-ին երկու փոխնախարար կայցելի մարզ՝ բնակիչների եւ կաթ վերամշակող ընկերությունների հետ հանդիպելու նպատակով: Ամեն դեպքում, մայիսի 4-ին պարզ կլինի:

-Ի՞նչ են պատճառաբանում վերամշակող ընկերությունները, ինչո՞ւ են 20 դրամով էժանացրել կաթի մթերման գինը: 

-Դե շուկայական հարաբերություն է: Օրինակ՝ Լոռու մարզի մի շարք գյուղերից որոշ ընկերություններ մեկ լիտր կաթը 140 դրամով են մթերում: Իսկ մեզ մոտ վերամշակող ընկերությունները պատճառաբանում են, որ Հայաստանից պանիր չի արտահանվում, ինչի համար էլ չեն կարող կաթը այդ գնով ձեռք բերել: Իրացման հետ խնդիրներ կունենան: Բայց մյուս կողմից կաթը մեր գյուղերի բնակիչների եկամտի հիմնական աղբյուրն է:

-Որո՞նք են այդ վերամշակող ընկերությունները:

-Իգիթ, Ամասիա, Բանդիվան կաթի վերամշակման ընկերություններն են: Բնակիչները մինչեւ մայիսի 4-ը որոշել են կաթ չմթերել, որպեսզի տեսնեն՝ հարցն իրենց օգտին կլուծվի՞, թե` ոչ: Կարծում եմ, որ նշված ընկերություններն այլեւս 170 դրամով կաթ չեն մթերի:

Զրուցեց ՍՅՈՒՆԷ ՀԱՄԲԱՐՁՈՒՄՅԱՆԸ