Երեւանի ավագանու ընտրություններում «Բարեւ Երեւան» դաշինքը գլխավորող Արմեն Մարտիրոսյանը «Ժողովուրդ»-ի հետ զրույցում նշեց, որ իրենց դաշինքի առավելությունն այն է, որ այնտեղ «ո՛չ պաշտոնական անձինք կան, որոնք անցյալի ստվերներ ունեն, ո՛չ նախկին նախագահներ, ո՛չ գործարարներ, օլիգարխներ կամ նրանց որդիներ»:
-Պարո՛ն Մարտիրոսյան, ինչո՞վ եք զբաղված անձամբ Դուք եւ «Ժառանգություն» կուսակցությունը: Այժմ բոլոր կուսակցությունները քարոզարշավ են իրականացնում Երեւանում, իսկ Ձեր կուսակցության առաջնորդ Րաֆֆի Հովհաննիսյանը կրկին մարզեր է մեկնում:
-Պարոն Հովհաննիսյանի մարզային այցելությունները բացարձակ չեն խանգարում Երեւան քաղաքի քարոզարշավին: Կա «բարեւի հեղափոխություն», կա հեղափոխության շրջանակներում տեղի ունեցող քաղաքական զարգացում: Մենք արդեն քարոզարշավի ակտիվ փուլ ենք մտնում ու մեծ գործունեություն ենք ծավալել:
-Այս անգամ Երեւանի ավագանու ընտրություններում առաջադրված են բազմաթիվ ընդդիմադիր թեկնածուներ, եւ կարծես թե առավել կոշտ մրցակցություն է լինելու: Ըստ Ձեզ` ո՞րն է Ձեր հաղթանակի երաշխիքը:
-Ի տարբերություն այլոց՝ մենք նման մոտեցում չունենք, որ որեւէ ընդդիմադիր ուժ կարող է մեզ խանգարել: Նայած թե դու ինչ ես ցանկանում կյանքի կոչել: Եթե քո ցանկությունը իրավիճակ փոխելն է, ապա այդ ընդդիմադիր ուժերը ոչ թե քեզ խանգարում են, այլ օգնում: Միշտ ավելի հեշտ է պայքարել համատեղ, քան միայնակ: Դրա համար, թե ով է մասնակցում, դա մեզ չի խանգարում, մեր հիմնական մրցակիցը եղել եւ մնում է իշխանությունը: Կան նաեւ ուժեր, որոնք կարծես թե ընդդիմադիր են կոչվում, բայց իրենց գործունեությամբ ցույց են տալիս, որ ոչ թե ցանկանում են համակարգային փոփոխությունների հասնել, այլ իրենց համար մի քանի աթոռ պոկել:
-Այնպիսի տպավորություն է, որ ՀՀ նախագահի ընտրությունների ժամանակ «Ժառանգություն»-ն ավելի ակտիվ էր աշխատում, քան հիմա: Գուցե անձի հե՞տ է կապված պասիվությունը:
-Քաղաքապետի անձը կարեւորելով` պետք է նշեմ, որ, այնուամենայնիվ, կարեւոր է, թե այդ կառավարման համակարգի հիմքը ովքեր են կազմում: «Բարեւ Երեւան»-ն այդ առումով շահեկանորեն տարբերվում է մնացածներից, որտեղ ո՛չ պաշտոնական անձինք կան, որոնք անցյալի ստվերներ ունեն, ո՛չ գործարարներ, նրանց որդիներ կամ օլիգարխներ, կամ նախկին նախագահներ, նրանց հարազատներ եւ այլն, եւ այլն: Սա մեր թիմի պայքարն է եւ ոչ թե միայն իմ: Կարող է արտաքնապես Ձեր ասածի նման ինչ-որ տպավորություն թողնի, բայց իրականում նման բան չկա:
-Ապրիլի 9-ին Բաղրամյան պողոտայում Ձեր եւ ոստիկանության միջեւ բախում տեղի ունեցավ, ինչի արդյունքում անգամ վնասվածք ստացաք: Ձեր կարծիքով` այդ ամենից Ձեր վարկանիշն իջա՞վ, թե՞ բարձրացավ:
-Ես երկար ժամանակ չեմ զբաղվում կշեռքի գործով ու չեմ կարող ասել` ծանրացել է, թե թեթեւացել, չեմ էլ պատրաստվում ուսումնասիրել ռեյտինգի հետ կապված խնդիրները: Ինձ համար կարեւորը գործն է, այն, ինչ արել եմ այս տարիների ընթացքում, ես այլեւս որեւէ մեկին ապացուցելու խնդիր չունեմ, թե ինչպիսի վիճակում եմ հայտնվում նման լարված իրավիճակներում: Թե ապրիլի 9-ի իրադարձություններն ինչպես են ազդել իմ ռեյտինգի վրա, ինձ բացարձակապես չի հուզում:
-Դուք ծնունդով Երեւանից չեք, Ապարանից եք, «Նիգ-Ապարան» հայրենակցական միության անդամ…
-Ես ծնունդով Երեւանից եմ, Մալաթիայի ծննդատանն եմ ծնվել, արմատներով կարող է… ես չգիտեմ՝ այսօր ով կարող է Երեւանում ասել` ես մաքուր երեւանցի եմ: Թե ով է մաքուր երեւանցին, ես չգիտեմ, բայց ես Երեւանում եմ ծնվել: Ես հայրական կողմից ունեմ ապարանյան արմատներ, մայրական կողմից՝ Լոռվա, ու երկու դեպքում էլ հպարտ եմ: Ես ամբողջ կյանքս ապրել եմ Աջափնյակում:
-Դուք այժմ Երեւանի ֆիզիկական կուլտուրայի պետական ինստիտուտում եք դասավանդում: Տեղեկություններ են շրջանառվում, որ ԿԳ նախարար Արմեն Աշոտյանի «միջնորդությամբ» եք այդտեղ աշխատում: Այժմ հոգեբանական ինչպիսի՞ վիճակում եք, երբ պայքարում եք Ա. Աշոտյանի կուսակցի դեմ:
-Ես 1995 թվականից եմ այդ բուհում դասավանդում, իսկ Աշոտյանը հաշվե՛ք, թե որ թվականից է նախարար: Ես դասախոս ընդունվել եմ այն ժամանակ, երբ երկրի նախագահը Լեւոն Տեր-Պետրոսյանն էր: Ա. Աշոտյանը հաստատ այդ ժամանակ դեռեւս ո՛չ նախարար էր, ո՛չ իմ ընկերն էր, ո՛չ էլ իմ գործընկերը: Ես իրեն որպես անձնավորություն հարգում եմ, ցավում եմ, որ ինքը նմանատիպ կուսակցական գործընկերներ ունի: Հուսով եմ, որ երբեւէ այդ ապաքաղաքական տարրերից ՀՀԿ-ն կմաքրվի, եւ իմ գործընկերը շատ ավելի հանգիստ կկարողանա իր գործունեությունը ծավալել:
.gif)
