ՆՈՐ ՕՄԲՈՒԴՍՄԵՆԻ ՀԱՐՑԸ ԿԱՆԽՈՐՈՇՎԱԾ ԷՐ Ս. ՍԱՐԳՍՅԱՆԻ «ԿԱԲԻՆԵՏՈՒՄ»

Երեկ Ազգային ժողովում շարունակվեց Մարդու իրավունքների պաշտպանի թեկնածության քննարկումը, ապա տեղի ունեցավ փակ քվեարկություն, որի արդյունքում արդարադատության փոխնախարար Արման Թաթոյանը ընտրվեց ՀՀ չորրորդ ՄԻՊ:

Նշենք, որ փակ քվեարկությանը մասնակցեցին 107 պատգամավոր, որոնցից Թաթոյանի օգտին քվեարկեցին 96-ը, դեմ՝ 7-ը: 4 քվեաթերթիկ անվավեր ճանաչվեց:
Մինչ քվեարկությունը ԱԺ մի շարք պատգամավորներ հանդես եկան ելույթներով: ՀԱԿ խմբակցության քարտուղար Արամ Մանուկյանը իր ելույթում անդրադարձավ մշակութային արժեքների պահպանության խնդիրներին:
Խոսելով Երեւանի Ամիրյան 2 հասցեում Իսահակյանի անվան նախկին գրադարանի շենքի ճակատային մասի քանդման փորձից՝ Մանուկյանն ասաց, որ իշխանությունները մշակութային արժեքները «գաղտագողի», կիրակի օրերին են փորձ անում քանդել, ինչը նոր տակտիկա է:
«Այն, ինչ իշխանությունն այսօր անում է մեր մշակույթի հետ, կոչվում է վայրագություն, ցեղասպանություն մեր մշակույթի պատմական արժեքների նկատմամբ… Քաղաքական բանտարկյալները, ինչպես Շանթն է, Գեւորգ Սաֆարյանը, Վարդգես Գասպարին, մի տարի հետո, մի քանի ամիս հետո ազատ են արձակվելու, եւ ինչ-որ բան կարելի է վերադարձնել այդ դաշտում, իսկ մշակութային արժեքների վերականգնումը անվերադարձ է»,-ասաց նա:
ՀԱԿ խմբակցության ղեկավար Լեւոն Զուրաբյանն էլ հայտնեց, որ իրենց խմբակցությունը չի մասնակցելու ՄԻՊ թեկնածուի քվեարկությանը, քանի որ արդյունքներն արդեն կանխորոշված են: «Մեզ համար ի սկզբանե պարզ էր, որ նոր օմբուդսմենի ընտրությունը կանխորոշված է Սերժ Սարգսյանի կաբինետում: Պետք է սթափ վերլուծել կատարվածը: Կարեն Անդրեասյանի հրաժարականը պարտադրված էր Սերժ Սարգսյանի կողմից, սա միանշանակ է»,-ընդգծեց նա:
ԲՀԿ խմբակցության ղեկավար Նաիրա Զոհրաբյանն էլ, դիմելով Արման Թաթոյանին, ասաց. «Ընդդիմությունն ամեն ինչ անելու է Ձեզնից «Ռեմբո» կերտելու՝ հայաստանյան ընդդիմադիր սոուսով: Իշխանությունն ամեն ինչ անելու է, որ Դուք դառնաք իր կամքի արտահայտողը եւ բավարարվեք «լայթսոտ» քննադատությամբ: Ընտրությունը Ձերն է լինելու, պետք է այնպես անեք, որ այս երկու բեւեռների պատանդը չդառնաք»: ԲՀԿ խմբակցության ղեկավարը նշեց, որ իրենք խմբակցության անդամների քվեարկությունը թողել են ազատ եւ յուրաքանչյուր պատգամավոր ինքը կորոշի ինչպես քվեարկել:
Այնուհետեւ քվեարկությունից հետո տեղի ունեցավ Մարդու իրավունքների նորընտիր պաշտպան Արման Թաթոյանի երդման արարողությունը: «Նախընտրական գործընթացում ինչպես ասել եմ, հիմա էլ եմ հայտարարում, որ անհապաղ սկսելու եմ իրականացնել բոլոր լիազորություններս»,- հայտարարեց ՄԻՊ-ը:
Նա հրաժարվեց որեւէ կոնկրետ դեպքի վերաբերյալ որեւէ գնահատական հնչեցնել: «Այս պահին որեւէ գնահատական տամ, ժամ ասեմ, սխալ կլինի եւ կոռեկտ չի լինի, այնպես որ հարցերը իմ ուշադրության կենտրոնում են»,-նշեց նա եւ անդրադառնալով Հայաստանում քաղբանտարկյալների առկայության խնդրին` պնդեց, որ ո՛չ Վարդգես Գասպարիի, ո՛չ Գեւորգ Սաֆարյանի գործից տեղեկություն չունի եւ նրան ժամանակ է պետք ծանոթանալու գործին, որպեսզի գնահատականներ հնչեցնի՝ արդյոք նրանք քաղբանտարկյալ են, ինչպես հայտարարում են իրավապաշտպանները, թե ոչ:
Խոսելով ԱԺ-ում իր հասցեին հնչեցրած բացասական գնահատականների մասին՝ Արման Թաթոյանը վստահեցրեց, որ դրանք իր մոտ որեւէ նստվածք չեն թողել. «Ոչ, ես այդպիսի մարդ չեմ, եւ բացառված է որեւէ նստվածք: Այն, ինչ հայտարարել եմ իմ ելույթներում, այն էր, ինչ ես մտածում եմ, ոչ թե մտածում եմ մի բան եւ այլ բան ասում»,-հավաստիացրեց Մարդու իրավունքների նորընտիր պաշտպանը:

ԱՐՓԻՆԵ ԹՈՎՄԱՍՅԱՆ

 
ԲՈՒԼԿԻ ԱՐԱՄԸ ՊԱՐՏՔԵՐ Է ԿՈՒՏԱԿՈՒՄ, ԻՍԿ ԿԱՌԱՎԱՐՈՒԹՅՈՒՆԸ՝ ՄԱՐՈՒՄ

ՀՀ կառավարությունը գյուղատնտեսության նախարարության ջրային տնտեսության պետական կոմիտեին ավելի քան 610 մլն դրամ կհատկացնի: Բանն այն է, որ այս տարվա հունվարի 1-ի դրությամբ ոռոգման ծառայություններ մատուցող ջրօգտագործողների ընկերություններում առաջացել են էլեկտրաէներգիայի գծով եւ «Սեւան-Հրազդանյան ջրառ», «Ախուրյան-Արաքս» ՓԲԸ-ի կողմից մատակարարված ոռոգման ջրի դիմաց կրեդիտորական պարտավորություններ:

Ըստ գյուղատնտեսության նախարարության ջրային տնտեսության պետական կոմիտեի՝ վերը նշված պարտքերի վճարումը պայմանավորված է ջրօգտագործողների ընկերությունների ֆինանսական կայունությունն ապահովելու նպատակով:
Այսինքն՝ ջրօգտագործողների ընկերությունների փոխարեն եւ նրանց անունից կառավարությունը «Հայաստանի էլեկտրական ցանցեր», «Սեւան-Հրազդանյան-ջրառ» եւ «Ախուրյան-Արաքս-ջրառ» ՓԲԸ-երին համապատասխանաբար էլեկտրական էներգիայի եւ ոռոգման ջրի դիմաց առաջացած պարտավորությունների դիմաց կվճարի մոտ 610 մլն դրամ: Նշված գումարից «Հայաստանի էլեկտրական ցանցեր» ՓԲԸ-ին օգտագործած էլեկտրաէներգիայի դիմաց կվճարվի ավելի քան 609 մլն դրամ: Իսկ «Սեւան-Հրազդանյան-ջրառ» եւ «Ախուրյան-Արաքս-ջրառ» ՓԲԸ-երին ոռոգման ջրի դիմաց առաջացած պարտավորությունները մարելու նպատակով կվճարվի 1.5 մլն դրամ:
Նշենք, որ այս նախագիծը մշակվել է ՀՀ գյուղատնտեսության նախարարության ջրային տնտեսության պետական կոմիտեի աշխատակազմի կողմից:
Այստեղ ակնհայտ է, որ կոռուպցիոն մեծ ռիսկեր կան, որովհետեւ ոչ մի ձեւ չկա վերահսկելու, պարզելու, թե ինչպես են կարողանում ՋՕԸ-երը պարտքեր կուտակել: Չէ որ հատկապես վերջին տարիներին, գարնան, ամռան եւ աշնան ամիսներին Արարատի, Արմավիրի մարզերի գյուղացիները բողոքում են ջուր չլինելուց: Բոլորին է հայտնի, որ ՋՕԸ-երի ղեկավարները պարտադրում են գյուղացիներին վճարել իրենց ծառայության դիմաց վարձավճարները:
Իսկ գյուղացիներն էլ պարտադիր վճարում են, որովհետեւ այլ ելք չունեն: Պարզապես չեն կարող չտալ, քանի որ իրենց բերքը կփչանա առանց ջրելու: Այնուամենայնիվ, ջրի ոռոգման համակարգը Հայաստանում ամենամութ եւ փակն է, նաեւ ամենակոռումպացվածը: Հավանաբար սա է պատճառը, որ ՋՕԸ-երի աշխատանքը թափանցիկ չէ:
Ջրի ոռոգման համակարգը գործող իշխանության համար գյուղացիների վրա ազդելու հսկայական լծակ է, որը, պարբերաբար, քաղաքական նպատակներով օգտագործվում է: Սա է պատճառը, որ այս համակարգը միշտ պահում են կոռումպացված: Եւ հենց գալիս է ընտրությունների ժամանակը, այն անմիջապես կիրառում են: Այստեղ տարօրինակն այն է, որ գյուղացին վճարել է իրեն վաճառած ոռոգման ջրի դիմաց, սակայն, չգիտես թե ինչու, ՋՕԸ-երը պարտքեր են կուտակել: Որտե՞ղ են գյուղացիների վճարած գումարները: Ո՞ւմ կողմից են դրանք գրպանվել: Ինչո՞ւ պետք է կառավարությունը մարի ՋՕԸ-երի անարդյունավետ աշխատանքի հետեւանքով կուտակված պարտքերը: Սրանք հարցեր են, որոնք այդպես էլ պատասխաններ չունեն:
Ի դեպ, գյուղացիների հետ ջուր վաճառելու դեպքում ՋՕԸ-երը նույնիսկ պայմանագիր չեն կնքում, եւ ոչ էլ կտրոն են տրամադրում վճարած գումարի դիմաց: Չի վերահսկվում ոչինչ:
Իսկ Արամ Հարությունյանը, ով նախկինում բնապահպանության նախարար էր, կրկին խայտառակ իրավիճակ էր ստեղծել ջրի ոլորտում: Վերջինս անխնա ջրօգտագործման թույլտվություններ էր տրամադրել ձկնաբուծական տնտեսություններին: Ինչի արդյունքում Արարատյան դաշտավայրը այսօր կանգնած է ե՛ւ խմելու, ե՛ւ ոռոգման ջրի կորուստի վտանգի առաջ: Ավելին՝ այն ջրազրկվել է: Հուսանք՝ այսօրվա նիստում ՀՀ վարչապետ Հովիկ Աբրահամյանը մանրամասն կհետաքրքրվի ՋՕԸ-երի աշխատանքով, ապա կորոշի՝ տրամադրե՞լ գումար, թե՞ ոչ:

ՍՅՈՒՆԷ ՀԱՄԲԱՐՁՈՒՄՅԱՆ

 
ԽՈՍՔԵՐՈՎ ՍԱՏԱՐՈՒՄ ԵՆ
Սահմանամերձ Տավուշի մարզի գազ օգտագործող ավտոմեքենաների տերերը շարունակում են դժգոհել գազի գնից եւ մեքենաների լիցքավորման որակից: Տավուշի ավտոգազալցավորման ճնշման կայաններում (ԱԳԼՃԿ) մեկ խորանարդ մետր գազը վաճառվում է 190-200 դրամով, իսկ Սեւանի ԱԳԼՃԿ-ներում՝ 170 դրամով: Մեքենատերերը գնից առավել դժգոհ են գազի լիցքավորման որակից: Նոյեմբերյանցի վարորդներից մեկը մեզ հայտնեց, որ Նոյեմբերյանի տարածաշրջանի ԱԳԼՃԿ-ում 2700 դրամի գազ լիցքավորելու դեպքում իր ավտոմեքենան անցնում է 150 կմ, իսկ Սեւանի ԱԳԼՃԿ-ներում նույնքան գումարի գազ լիցքավորելիս վառելիքը բավարարում է 235 կմ երթեւեկելու համար: Տավուշի մարզի ավտոմեքենաների տերերը դժգոհում են այն բանից, որ ռուսական բնական գազի խողովակաշարը Հայաստան է մտնում Տավուշի մարզի տարածքով, սակայն Ադրբեջանին սահմանակից մարզի տարածքում գազի գինն ավելի թանկ է, քան Սեւանում: Տավուշի մարզում գործող ԱԳԼՃԿ-ներից մեկի սեփականատերն իր անունը չհրապարակելու պայմանով ասաց, որ Սեւանում գործող ԱԳԼՃԿ-ները օգտագործում են մայր գազատարից վերցվող, սակայն չհաշվառվող գազ, ուստի ավելի էժան գնով են լիցքավորում ավտոմեքենաներին: Վաղուց հարկն է, որ տնտեսական մրցակցության պաշտպանության պետական հանձնաժողովը ԱԳԼՃԿ-ներում ստուգումներ կատարելով՝ հստակություն մտցնի այդ հարցում:

ՄԱՔՍԱՆԵՆԳՈՒԹՅՈՒՆ` ՎՐԱՍՏԱՆԻՑ
Վրաստանում բջջային հեռախոսները, պլանշետները, դեղորայքը եւ շատ այլ իրեր Հայաստանի համեմատ զգալիորեն էժան են, ինչի պատճառով հարեւան երկրից այդ ապրանքների մաքսանենգությունը շարունակվում է: Երեւան քաղաքի բնակիչ, 1974թ. ծնված Գոռ Ավետիսյանին մեղադրանք է առաջադրվել այն բանի համար, որ նա 2014թ. օգոստոսի 13-ին Վրաստանից գնել է խոշոր չափի՝ 2 միլիոն 520 հազար դրամ շուկայական արժեքով 8 հատ «Այֆոն 5 Ս» տեսակի բջջային հեռախոսներ, դրանք պահել իր կողմից վարվող «Մերսեդես Բենց 180» մակնիշի ավտոմեքենայի սրահի եւ բեռնախցիկի տարբեր հատվածներում եւ նույն օրը մաքսանենգությամբ, մաքսային հսկողությունից թաքցնելու եղանակով Բագրատաշենի մաքսակետով տեղափոխել է Հայաստան: Սակայն նույն օրը՝ ժամը 21-ի սահմաններում, բջջային հեռախոսները հայտնաբերվել են ՀՀ ֆինանսների նախարարության նախաբացթողումային հսկողության վարչության Գուգարքի բաժնի Բագրատաշենի բաժանմունքի աշխատակիցների կողմից: Գ. Ավետիսյանին մեղադրանք է առաջադրվել ՀՀ քրեական օրենսգրքի 215 հոդվածի 1-ին մասով, նրա նկատմամբ խափանման միջոց է ընտրվել չհեռանալու մասին ստորագրությունը: Սույն հոդվածը նախատեսում է 1-3 միլիոն դրամի չափով տուգանք կամ ազատազրկում՝ առավելագույնը 5 տարի ժամկետով, մաքսանենգության առարկա հանդիսացող գույքի բռնագրավմամբ: Այս քրեական գործով դատավարությունն ընթանում է Տավուշի մարզի առաջին ատյանի դատարանում:

ՈՍԿԱՆ ՍԱՐԳՍՅԱՆ
Տավուշ