ԼՈՒՐ ԿԱԴՐ

Լուսանկարն արվել է ՀՀ կառավարության շենքի դիմաց

Երեկ կառավարության շենքի դիմաց հաշմանդամ օդաչուներն էին հավաքվել, որոնք պահանջում էին վերականգնել իրենց խախտված իրավունքները: Շենքի դիմաց էին նաեւ նաիրիտցիները, Բուզանդ փողոցի բնակիչները, որոնք պարբերաբար մոտենում են շենքին, սակայն ոստիկանները ետ էին ուղարկում:

 
ՀԱՐՑ. Ես ուզում եմ իմանալ՝ եթե անձը բուժման նպատակով գտնվում է Հայաստանի Հանրապետությունից դուրս, ապա ի՞նչ կարգով է իրականացվում հաշմանդամի բժշկասոցիալական փորձաքննությունը:

Երանուհի Ռուբինյան (60 տարեկան, տնային տնտեսուհի)

ՊԱՏԱՍԽԱՆ. Ե. Ռուբինյանի հարցին ի պատասխան՝ տեղեկացնում ենք, որ եթե հաշմանդամը բուժման նպատակով գտնվում է Հայաստանի Հանրապետությունից դուրս, ապա նրա բժշկասոցիալական փորձաքննությունը, հաշմանդամի կամ նրա ներկայացուցչի դիմումի համաձայն իրականացվում է հեռակա՝ բժշկասոցիալական փորձաքննության նախկին փաստաթղթերի եւ այն բժշկական կազմակերպության տված փաստաթղթերի հիման վրա, որտեղ հաշմանդամը գտնվում է բուժման մեջ:

«Էխո» հասարակական կազմակերպություն

«ԺՈՂՈՎՈՒՐԴ». Տեղեկացնում ենք, որ բժշկասոցիալական փորձաքննությունն իրականացվում է անձի կենսագործունեության սահմանափակման աստիճանի որոշման, անձին հաշմանդամ ճանաչելու` «հաշմանդամ երեխա» կարգավիճակ եւ հաշմանդամության խումբ սահմանելու, հաշմանդամ չճանաչելու, հաշմանդամության ժամկետ, պատճառական կապ, մահվան պատճառական կապ, մասնագիտական աշխատունակության կորստի աստիճան որոշելու, հաշմանդամի անհատական վերականգնողական ծրագիր մշակելու եւ հաստատելու, ժամանակավոր անաշխատունակության թերթիկի երկարացման թույլտվություն տալու նպատակով:

 
ՀԱՐՑ. Ես ուզում եմ իմանալ՝ հաշմանդամ երեխային կամ 1-ին խմբի հաշմանդամին խնամելու ժամանակաշրջանը հաշվառվո՞ւմ է աշխատանքային ստաժում: Եվ կցանկանայի իմանալ՝ ընդհանրապես երեխային խնամելու ժամանակահատվածը աշխատանքային ստաժում հաշվառվո՞ւմ է, թե՞ ոչ:

Ռաիսա Սայադյան (37 տարեկան, մանկավարժ)

ՊԱՏԱՍԽԱՆ. Ռ. Սայադյանի հարցին ի պատասխան՝ հայտնում ենք, որ անհրաժեշտ աշխատանքային uտաժի առկայության դեպքում հաշմանդամ երեխային, մինչեւ նրա 18 տարին լրանալը կամ առաջին խմբի հաշմանդամին խնամելու ժամանակաշրջանը հաշվառվում է ծնողի, որդեգրողի, խնամակալի աշխատանքային ստաժում, եթե նա ունի խնամակալի հաշմանդամության ժամանակահատվածը հաստատող տեղեկանք, իսկ խնամակալի դեպքում՝ նաեւ խնամակալ ճանաչված լինելու եւ խնամակալության ժամանակահատվածի մասին տեղեկանքներ, սակայն տասը տարուց ոչ ավել, մինչեւ կենսաթոշակ նշանակելն ընկած ժամանակահատվածում:
Հայտնում ենք նաեւ, որ սահմանված աշխատանքային ստաժի առկայության դեպքում աշխատանքային ստաժում հաշվառվում են նաեւ ծնողներից մեկի՝ մինչեւ յուրաքանչյուր երեխայի երկու տարին լրանալը երեխային խնամելու ժամանակահատվածը՝ վեց տարուց ոչ ավել:
Մեկ օրացուցային տարվա համար չի կարող հաշվարկվել մեկ տարուց ավել աշխատանքային ստաժ, բացառությամբ սույն օրենքով սահմանված դեպքերի:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Տեղեկացնենք, որ աշխատանքային գրքույկի կամ դրանում համապատասխան գրառումների կամ ստաժը հաստատող՝ Հայաստանի Հանրապետության կառավարության սահմանած այլ փաստաթղթերի բացակայության դեպքում աշխատանքային ստաժը հաստատվում է արխիվային տեղեկանքով, իսկ դրա բացակայության դեպքում՝ դատական կարգով: