ԼՈՒՐ ԿԱԴՐ

Լուսանկարն արվել է Շենգավիթ վարչական շրջանում

Այս մեքենայի վարորդը դիմել է նման խորամանկ քայլի՝ տեսախցիկների վարչական խախտումներից խուսափելու համար: Իհարկե, նման արարքները ողջունելի չեն, ուստի հորդորում ենք վարորդներին լինել զգոն եւ ուշադիր:

 
ՀԱՐՑ. Ես ուզում եմ իմանալ, թե իրավաբանական անձը վերակազմավորվելու դեպքում ի՞նչ փաստաթղթեր պետք է ներկայացնի:

Միքայել Հայրապետյան (41 տարեկան, տնօրեն)

ՊԱՏԱՍԽԱՆ. Վերակազմավորվող իրավաբանական անձը ներկայացնում է պետական տուրքի վճարումը հավաստող փաստաթուղթ: Վերակազմավորման արդյունքում ստեղծվող իրավաբանական անձը ներկայացնում է՝
-իրավաբանական անձ հիմնադրելու մասին հիմնադիր ժողովի արձանագրությունը՝ ստորագրված բոլոր հիմնադիրների կամ նախագահի եւ քարտուղարի կողմից (բացառությամբ մեկ անձով հիմնադրվող իրավաբանական անձանց): Օրենքով սահմանված դեպքում մեկ անձի կողմից իրավաբանական անձի հիմնադրման դեպքում ներկայացվում է հիմնադրի գրավոր որոշումը,
-ժողովի հաստատած էլեկտրոնային փաստաթղթի ձեւով կանոնադրությունը կամ կանոնադրության առնվազն երկու օրինակ՝ թղթային կրիչի վրա,
– պետական տուրքի վճարումը հավաստող փաստաթուղթ,
-առանձին կազմակերպական-իրավական ձեւ ունեցող իրավաբանական անձանց վերաբերյալ օրենքներով կամ այլ օրենքներով նախատեսված պետական գրանցման համար պարտադիր ներկայացման ենթակա այլ փաստաթղթեր,
-վերակազմավորվող իրավաբանական անձի մասնակիցների կամ դրա համար կանոնադրությամբ լիազորված իրավաբանական անձի մարմնի որոշումը,
– փոխանցման ակտը:

ՀՀ արդարադատության նախարարություն

«ԺՈՂՈՎՈՒՐԴ». Նշենք, որ անհրաժեշտ բոլոր փաստաթղթերը գործակալություն ներկայացնելուց ոչ ուշ, քան 10 աշխատանքային օրվա ընթացքում, եթե առկա չեն պետական գրանցումը մերժելու հիմքեր, գործակալությունը, սահմանված կարգով, պետք է կատարի վերակազմակերպմամբ պայմանավորված պետական գրանցում(ներ)ը:

 
ՀԱՐՑ. Խնդրում եմ ասեք, թե ի՞նչ փաստաթղթեր է անհրաժեշտ ներկայացնել պրոթեզաօրթոպեդիկ պարագաները, վերականգնման տեխնիկական միջոցները պետական պատվերի շրջանակներում (անվճար) ստանալու համար: Եվ կցանկանայի իմանալ, թե ո՞վ իրավունք ունի անվճար ստանալ հաշմանդամի սայլակ:

Հռիփսիմե Մելքոնյան (57 տարեկան, 2-րդ կարգի հաշմանդամ)

ՊԱՏԱՍԽԱՆ. Տեղեկացնում ենք, որ անձը պրոթեզաօրթոպեդիկ եւ վերականգնողական պարագա ստանալու համար դիմում է կազմակերպություն՝ ներկայացնելով
-անձը հաստատող փաստաթուղթ (մինչեւ 16 տարեկան երեխաների համար՝ ծննդյան վկայական եւ նրա ծնողներից մեկի կամ օրինական ներկայացուցչի անձը հաստատող փաստաթուղթը),
-համապատասխան կարգավիճակը հավաստող փաստաթուղթ,
-հաշմանդամներն առաջին անգամ դիմելու դեպքում` նաեւ վերականգնողական անհատական ծրագիր,
-լսողական սարք ստանալու համար` նաեւ սուրդոլոգի եզրակացությունը,
-աչքի եւ ձայնալարերի պրոթեզավորման համար` համապատասխան մասնագիտացված բժշկական կազմակերպությունների եզրակացությունները:
Հայտնում ենք նաեւ, որ առաջին խմբի հաշմանդամներին եւ մինչեւ 18 տարեկան հաշմանդամ երեխաներին վերականգնողական անհատական ծրագրին համապատասխան տրամադրվում է սայլակ: Հաշմանդամին սայլակը տրամադրվում է 3 տարի ժամկետով:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Ավելացնենք, որ 2016թ. հունվարի 1-ի դրությամբ հաշվառված է եղել 200 177 հաշմանդամություն ունեցող անձ, որն ընդհանուր բնակչության 6,6%-ն է: Նրանցից 7 801-ը՝ 3,9 %-ը, հաշմանդամ երեխաներն են: Հաշմանդամություն ունեցող անձանց մեջ 31,4 %-ը հաշմանդամ է ճանաչվել սրտանոթային խանգարումների հետեւանքով, 10,8%-ը՝ հոգեկան հիվանդությունների, 8,1%-ը՝ նորագոյացությունների, 7,9%-ը՝ նյարդային համակարգի հիվանդությունների, 7,4%-ը՝ էնդոկրին հիվանդությունների: