ԼՈՒՐ ԿԱԴՐ

Լուսանկարը՝ պաշտոնական լրահոսի

Երեկ Սերժ Սարգսյանին իր հավատարմագրերն է հանձնել ՀՀ-ում Եթովպիայի Դաշնային Ժողովրդավարական Հանրապետության նորանշանակ արտակարգ եւ լիազոր դեսպան Գրում Աբայ Թեշոմեն (նստավայրը՝ Մոսկվա):

 
ՀԱՐՑ. Խնդրում եմ ասեք, թե կոնկրետ ի՞նչ փաստաթղթեր են անհրաժեշտ՝ ՀՀ տարածքից արտերկիր մրգեր ու բանջարեղեն արտահանելու համար:

Հովհաննես Դանիելյան (43 տարեկան, գործարար)

ՊԱՏԱՍԽԱՆ. Հայտնում ենք, որ բույսերի, բուսական արտադրանքի եւ կարգավորվող առարկաների արտահանումն իրականացվում է ներկրող երկրի բուսասանիտարական պահանջներին համապատասխան եւ թույլատրվում է արտահանման բուսասանիտարական հավաստագրի առկայության դեպքում, որը տրվում է յուրաքանչյուր տեսակի բեռի համար տեսուչի կողմից:
Արտահանման բուսասանիտարական հավաստագիր ստանալու համար բեռնատերը դրա մասին հայտ է ներկայացնում տեսչություն, որը հայտը ստանալուց հետո՝ եռօրյա ժամկետում, կատարում է բեռի ստուգում եւ տալիս արտահանման բուսասանիտարական հավաստագիր, իսկ բուսասանիտարական անձնագիր ներկայացնելու դեպքում բուսասանիտարական հավաստագիրը տրվում է անմիջապես: Բույսերի, բուսական արտադրանքի եւ կարգավորվող առարկաների արտահանման բուսասանիտարական հավաստագիրն ուժի մեջ է 14 օր՝ տրված օրվանից մինչեւ երկրի սահմաններից դուրս բերելը:

ՀՀ ԳՆ սննդամթերքի անվտանգության պետական ծառայություն

«ԺՈՂՈՎՈՒՐԴ». Ավելացնենք, որ 2015 թվականի հոկտեմբերի 7-ի դրությամբ ՀՀ-ից ընդհանուր առմամբ արտահանվել էր 60.600 տոննա թարմ պտուղ-բանջարեղեն՝ 2014 թվականի նույն ժամանակահատվածի 36.364 տոննայի դիմաց: Այս տարվա տվյալների մշակումը ընթացքի մեջ է:

 
ՀԱՐՑ. Ես ապրում եմ չսեփականաշնորհված բնակարանում: Խնդրում եմ ասեք՝ կարո՞ղ եմ այդ բնակարանից դուրս գրել իմ 1,5 տարեկան թոռնիկին՝ որդուս զավակին: Երեխայի մայրը բաժանված է որդուցս: Մայրը թոռնիկիս հետո բնակվում է իրենց բնակարանում՝ ուրիշ ընտանիքի հետ: Երեխայի մայրը կատեգորիկ հրաժարվում է բնակագրել երեխային իր մոտ: Նշեմ, որ որդիս համաձայն է երեխայի դուրս գրմանը: Խնդրում եմ ասեք՝ կոնկրետ ի՞նչ կարող եմ անել այս պարագայում:

Ռիմա Հարությունյան (60 տարեկան, տնային տնտեսուհի)

ՊԱՏԱՍԽԱՆ. Տեղեկացնում ենք, որ համաձայն ՀՀ ԸՕ 17 հոդվածի՝ ամուսնության լուծարման դեպքում դատարանը պարտավոր է որոշել, թե ամուսնալուծությունից հետո ծնողներից որ մեկի հետ են ապրելու անչափահաս երեխաները, եթե տվյալ հարցը չի կարգավորվել ամուսինների փոխհամաձայնությամբ: ՀՀ Քաղ. Օր. 23 հոդվածի համաձայն՝ 14 տարին չբոլորած անչափահասների բնակության վայր է ճանաչվում իրեն օրինական ներկայացուցիչների (ծնողների) բնակության վայրը:
Այդ իսկ պատճառով Ձեր դեպքում երեխայի (եւ, համապատասխանաբար, գրանցումն (բնակագրումն) այդ վայրում) բնակության վայր պետք է հանդիսանա այն ծնողի բնակության վայրը, որի հետ նա ապրում է դատարանի որոշման (նախկին ամուսինների միջեւ համաձայնության) համաձայն: Եթե դատարանի որոշման (համաձայնության) համաձայն երեխան ապրում է մոր հետ, ապա դատարանի որոշման եւ բնակության նոր վայրում բնակագրման վերաբերյալ դիմումի համաձայն պետք է հանվի տատիկի բնակության վայրում գրանցական հաշվառումից:

«Ձեր իրավախորհրդատու» փաստաբանական ընկերություն

«ԺՈՂՈՎՈՒՐԴ». Ավելացնենք, որ ծնողներից առանձին բնակվող, 16 տարին չլրացած անչափահասներն, ըստ ժամանակավոր բնակության վայրի կամ ըստ մշտական բնակության վայրի, հաշվառվում են ծննդյան վկայականի հիման վրա: