ԶԱՐՄԱՆԱԼԻ, ՏՀԱՃ ԵՎ ՍՊԱՍՎԱԾ ԶԱՐԳԱՑՈՒՄՆԵՐ

Նախօրեին  «Ցեղակրոն» կուսակցության նախագահ Շանթ Հարությունյանի այդպես էլ չիրագործված «հեղափոխությունը» լուրջ քննարկման առարկա է դարձել: Երեկ՝ ողջ օրվա ընթացքում, հասարակական ու քաղաքական գործիչները փորձում էին հասկանալ, թե ով սարքեց «հեղափոխական բունտը», քանի որ ակնհայտ է, որ 100 հոգով հեղափոխություն անելն առնվազն լուրջ չէ: Այս  հարցի շուրջ «Ժողովուրդ»-ը զրուցեց քաղաքական դաշտի տարբեր ներկայացուցիչների հետ:

ԱԺ ՀԱԿ խմբակցության քարտուղար ԱՐԱՄ ՄԱՆՈՒԿՅԱՆ
-Պարո՛ն Մանուկյան, Դուք եւս նախօրեին Մաշտոցի պողոտայում տեղի ունեցած դեպքերից հետո գնացել էիք Կենտրոնի ոստիկանություն եւ հանդիպել ՀՀ ոստիկանապետի հետ: Ի՞նչ պարզեցիք այնտեղ:
-Գիշերը՝ մինչեւ 02:30-ը, մենք գտնվել ենք ոստիկանությունում, պահանջել ենք հանդիպում այն մարդկանց հետ, որոնց ոստիկանությունը բաժին է բերման ենթարկել: Առավել եւս այն մարդկանց հետ, որոնք ոչ մի իրավախախտում չեն արել, պարզապես ակցիայից հետո բերման են ենթարկվել ոստիկանություն: Ոստիկանապետը խոստացավ հանդիպում այդ մարդկանց հետ, բայց երկու ժամ հետո դրժեց իր խոստումը, ու մենք հանդիպում պահանջեցինք ոստիկանապետի հետ: Մեծ դժվարությամբ, բայց ժամը 12:00-ին հանդիպումը կայացավ, որի ժամանակ մենք ներկայացրինք մեր պահանջները, փաստարկները եւ այն մարդկանց անունները, որոնք ոչինչ չեն արել: Համոզվելով մեր ասածի մեջ՝ արդյունքում  մինչեւ ժամը 02:00-ն ազատ արձակեցին թվով 15 հոգու:
-Կատարվածի հետ կապված՝ շրջանառվում  են տարբեր վարկածներ, նշվում է հիմնականում երեք տարբերակ, համաձայն որոնց՝ այդ ամենը կազմակերպված էր ԱՄՆ-ի կողմից, ՌԴ հատուկ ծառայությունների կամ էլ հենց ՀՀ իշխանությունների: Ո՞ր տարբերակն եք առավել հավանական համարում:
-Ձեր նշած 3 ծառայությունների հետ էլ կապ չունեմ եւ չեմ կարող ասել: Ինձ համար մի բան է ակնհայտ, որ ժողովրդի մեջ լարվածությունն այնքան մեծ է, իշխանություններն այնքան են լարել վիճակը, այնքան են մարդկանց հասցրել մինչեւ կոկորդը, որ հնարավոր է՝ երկրում լինեն ցանկացած դրսեւորումներ: Համբերությունը սպառած մարդիկ ցանկացած բանի ընդունակ են: Սա մեր երկրի անհուսալի վիճակն է: Ես տեսնում են ընդհանուր լարվածություն, անհուսություն, իսկ դա բերում է ցանկացած քայլի:

ԱԺ ՀՀԿ խմբակցության անդամ ՍՈՒՔԻԱՍ ԱՎԵՏԻՍՅԱՆ
-Պարո՛ն Ավետիսյան, նախօրեին մի խումբ մարդիկ փորձում էին հեղափոխություն իրականացնել, քանի որ ծայրահեղ դժգոհ են ՀՀ իշխանություններից: Ըստ Ձեզ՝ այս ամենը ինչի՞ հետեւանք է, եւ արդյո՞ք կարծում եք, որ Շ. Հարությունյանի գործողություններն ուղղորդված էին:  
-Գիտեք ի՞նչ, ինձ համար շատ զարմանալի ու տհաճ էր, երբ ես փորձեցի նկարահանված կադրերը դիտել: Միգուցե երեխային հնարավոր է ուղղորդել, բայց մարդ, որը մի քանի օր շարունակ խոսում է հեղափոխությունից, ինչ-որ վրեժ լուծելուց… ճիշտն ասած՝ անհասկանալի է, որ նման մարդուն կարող է ինչ-որ մեկն ուղղորդել: Այն ցինիկ արտահայտությունները, հայհոյանքները, որոնք ինքը հնչեցրել է… կարծում եմ, որ մարդիկ այդ ամենից պետք է հասկանան, որ դեմոկրատիա չի նշանակում, որ ցանկացած մեկը կարող է վեր կենալ ու հայհոյել իշխանություններին:
-Բայց չէ՞ որ այդ ամենի հիմքում իշխանություններից համատարած դժգոհությունն է, բացի  այդ՝ իրավապահ մարմինները նախապես չեն կանխել…
-Գիտեք ի՞նչ, եթե հիմա Շ. Հարությունյանին իր կոչերի արդյունքում կանչեին պատասխանատվության, ուրեմն մի մասը կսկսեր նմաններին հերոսացնել ու հայտարարել, թե դա հերթական քաղաքական բռնությունն է:

ԱԺ ԲՀԿ խմբակցության անդամ ԱՐԱԳԱԾ ԱԽՈՅԱՆ
-Պարո՛ն Ախոյան, ինչպե՞ս եք գնահատում երեկ Մաշտոցի պողոտայում տեղի ունեցածը:
-Անկեղծ ասած, ես այդտեղ չեմ եղել ու տեղյակ չեմ մանրամասներից: Բայց կարծում եմ, որ դա ընդամենը անհեթեթություն էր: Զարմանալի է ինձ համար, ապշեցի, ինչպե՞ս կարելի է հեղափոխություն կազմակերպել:
-Այդ մարդիկ դժգոհ են իշխանություններից…
-Իսկ ովքե՞ր են այդ մարդիկ: Ես չեմ ցանկանում գնահատականներ տալ, ուրեմն կազմակերպողները, երբ ինչ-որ բան են կազմակերպում, պետք է նախեւառաջ տեսնեն՝ արդյոք այն ամենի մասին, որ խոսում են, պատկերացում ունեն, թե ոչ:

«Ժառանգություն» կուսակցության փոխնախագահ ԱՐՄԵՆ ՄԱՐՏԻՐՈՍՅԱՆ
-Պարո՛ն Մարտիրոսյան, Ձեր գնահատմամբ՝ նախօրեի միջադեպը ծրագրվա՞ծ էր, թե՞ ինքնաբուխ պոռթկմանը հետեւած համարժեք արձագանք էր:
-Տեղի ունեցածը, այսպես ասած, Շանթ Հարությունյանի աղաղակն էր, որ երկրի վիճակն այսպես շարունակել անհնար է: Նա ասում էր, որ այլեւս ոչ թե չի կարող ապրել, այլ չի կարող գոյատեւել, ու դանակը ոսկորին տվել ու անցել է: Քանի որ հասարակությունը չի կարողանում տարիներ շարունակ փոխել իշխանություններին, ստիպված արմատական դրսեւորումներ են տեղի ունենում: Ով ճանաչում է Շանթին, գիտի, որ թեեւ յուրօրինակ մտածելակերպ ունի, բայց ինքն անկախ մտածելակերպով անձնավորություն է, ուղղակի ձեւով իրեն հնարավոր չէր ներգրավել ինչ-որ գործընթացում: