ՏԵՍԱՆՅՈՒԹ. «Կրակի վրա ցեմենտ լցնելը հակացուցված է». բնապահպանները մտահոգված են Խոսրովի անտառների հրդեհը ցեմենտով հանգցնելու փաստով

Վայոց Ձորում եւ «Խոսրովի անտառ» պետական արգելոցում օրեր շարունակվող հրդեհները մարելու համար ՀՀ արտակարգ իրավիճակների նախարարությունը փորձեց նաեւ ստեղծված իրավիճակը մեղմել ցեմենտով: Մասնավորապես, ՀՀ արտակարգ իրավիճակների նախարար Դավիթ Տոնոյանի գլխավորությամբ մասնագիտական խումբը կրակը մեկուսացնելու նպատակով ուղղաթիռից ցեմենտի պարկեր է նետել: Սա բնապահպանների մոտ մտահոգություն լուրջ առիթ է հանդիսացել:

Բնապահպան Սիլվա Ադամյանը ArmLur.am-ի հետ զրույցում անթույլատրելի համարեց այդ մեթոդը: «Իրենք կարող էին ուղղակի հող, ավազ լցնել, որը իրականում կհանգցներ կրակը, դա ընդունված մեթոդ է, բայց ոչ ցեմենտ: Պարզ է, որ ցեմենտի վրա ջուր լցվելու դեպքում այն կքարանա, կդառնա բետոն»:

Ստացվում է, որ Վայոց Ձորի անտառների եւ «Խոսրովի անտառ» պետական արգելոցի մի մասը հրդեհից հետո դառնալու են բետոնապատ տարածքներ:
«Իրենք ցայտնոտնի մեջ էին ընկել, դրա համար էլ կրակը հանգցնելու համար այդ միջոցներին են դիմել: Բայց պետք է հասկանալ, որ բետոնից ազատվելը շատ դժվար կլինի, եթե ոչ՝ անհնար: Բետոնապատ տարածքում ոչինչ չի աճի: Ցավոք, մենք ունենք շատ կորուստներ եւ դեռ պարզ չէ, թե քանի տեսակի կենդանի ենք կորցրել. քանի առանձնյակ է այրվել կամ վնասվել»,- մեծ ափսոսանքով նկատեց բնապահպանը:

Իսկ ահա Կովկասի բնության հիմնադրամի ազգային համակարգող Արման Վերմիշյանը ArmLur.am-ի հետ զրույցում, անդրադառնալով այս խնդրին, արձագանքեց. «Իմ տեղեկություններով բաց թողնված ցեմենտի ոչ բոլոր պարկերն են բացվել: Դրանց մի մասն ուղղակի չի պատռվել: Դա անիմաստ փորձ է եղել, ես չգիտեմ, թե դա որքանով է արդյունավետ հրդեհի դեմ պայքարում: Բայց մտահագությունը տեղին է, որովհետեւ ցեմենտը քարացման բնույթ ունի»:
Զրույցի ընթացքում Վերմիշյանը ցավով նկատեց նաեւ, որ համապատասխան պետական կառույցների արձագանքը համարժեք չի եղել, քանի որ չեն կարողացել կանխարգելել հրդեհը: «Մենք չկարողացանք ուղղակի ճիշտ եւ ժամանակին արձագանքել: Ես ինքս Վեդու կողմից եմ եղել մոտ 200 հոգով էինք, բայց չգիտեինք ինչ անել, ձեռքներիս ջրի տարաներ էին, բահեր, բայց այրվող գիհիների դեմ դրանք ուղղակի խաղալիք էին: Հրդեհի դեմ պայքարում միակ տարբերակը այս ինքնաթիռն էր, որը չգիտեմ ինչու որոշվեց, որ այսօր պետք է թռիչք անի»,- ներկայացրեց Վերմիշյանը:

Տեղեկացնենք, որ այսօր ժամը 12:00-ի դրությամբ՝ Խոսրովի անտառի պետական արգելոցի սահմաններում այրվել է 16 կմ պարագծով բուսածածկ տարածք, որից 360 հա մակերեսով՝ անտառներ: Հրդեհաշիջման աշխատանքները շարունակվում են: