ՁԵՎԱԿԱՆ ԸՆԴԴԻՄՈՒԹՅՈՒՆ

ՀՀԿ ԳՄ վերջին նիստում որոշվել է վարչապետի՝ նոր Սահմանադրությամբ պետության առաջին դեմքի պաշտոնում առաջադրել Սերժ Սարգսյանի թեկնածությունը: Ու քանի որ ԱԺ-ում վարչապետի ընտրությունն անցկացվելու է բաց, «Ժողովուրդ» օրաթերթը փորձել է պարզել, թե ինչպես է քվեարկելու ԱԺ «Ծառուկյան» խմբակցությունը, որ իրեն ընդդիմադիր է հայտարարել, բայց հարկ եղած դեպքում կանգնում է իշխանությունների կողքին. այդպես վարվեցին նախագահի պաշտոնում Արմեն Սարգսյանի ընտրության ժամանակ՝ ապահովելով նրա ընտրվելը մեկ փուլով: Հետաքրքիր է, որ այս խմբակցությունից հնչում են իրարամերժ տեսակետներ. մի մասը պնդում է, որ ընդդիմադիր խմբակցության կողմից կողմ քվեարկելը չի ընկալվի, մի մասն էլ, այնուամենայնիվ, հակված է ընտրել Սերժ Սարգսյանին:

ԱԺ «Ծառուկյան» խմբակցության պատգամավոր Վարդեւան Գրիգորյան
-Պարո՛ն Գրիգորյան, ինչպե՞ս եք պատրաստվում քվեարկել վարչապետի ընտրության օրը:
-Մենք դեռ որոշում չենք կայացրել: Երեւի առաջիկա երկու օրը որոշում կկայացնենք` անպայման կասենք:
-Ձեր խմբակցությունից Նաիրա Զոհրաբյանը նշել է, որ եթե կողմ քվեարկեք Ս. Սարգսյանի թեկնածությանը` որպես վարչապետ, ուրեմն այլեւս ընդդիմություն չեք համարվի: Հիմա ընդդիմություն մնալու խնդի՞ր է դրված:
-Դե, հիմա քննարկման արդյունքում կերեւա` ինչ է լինելու: Քննարկման արդյունքում ինչ եղավ, անպայման Ձեզ կիրազեկենք:
-Եթե դաշինքը դեմ քվեարկի Ս. Սարգսյանի թեկնածությանը, գուցե բիզնես գործունեության մեջ մի շարք կուսակցական անձինք տուժե՞ն:
-Կարծում եմ` դա խմբակցության որոշելիքը կլինի: Խմբակցությունը կքննարկի, ամեն մեկն իր կարծիքը կհայտնի, հետո որոշումը կընդունվի:
-Բայց Ձեր տեսակետը ո՞րն է:
-Իմ տեսակետը մեկն է. ինչ որոշում կայացրեց խմբակցությունը, ես պատրաստ եմ այդ որոշմանը:
-Կարծո՞ւմ եք` խորհրդարանում «Ծառուկյան» դաշինքը` որպես ընդդիմություն, իր դերը լիարժեք իրականացնո՞ւմ է:
-Դա արդեն Դուք պետք է գնահատեք, ոչ թե մենք: Իհարկե, մենք ընդդիմություն ենք եւ ընդդիմության գործառույթները լիարժեք իրականացնում ենք: Բայց գնահատականը տալու է հասարակությունը, տալու է ժողովուրդը:
-Իսկ հնարավո՞ր է` նորից իշխանություն դառնաք:
-Նման հարց չի քննարկվել:

ԱԺ «Ծառուկյան» խմբակցության պատգամավոր Լուիզա Սարգսյան

-Տիկի՛ն Սարգսյան, պարզ է, որ վարչապետի ընտրության օրը կերեւա, թե ով ինչպես է քվեարկում: Բայց, օրինակ, եթե Ձեր խմբակցությունում բոլորը դեմ քվեարկեն Ս. Սարգսյանին` որպես վարչապետի թեկնածու, իսկ Դուք կամ մեկ այլ պատգամավոր` կողմ, չե՞ք կարծում, որ խնդիրներ կառաջանան:
-Թույլ տվեք… սա այն հարցն է, որ մինչեւ մեր խմբակցությունը պաշտոնական դիրքորոշում չունենա, մեր քաղաքական թիմը չունենա, այս թեմայի շուրջ չեմ խոսի: Երբ կհայտնենք, ես Ձեր հարցերին կպատասխանեմ:
-Բայց ի՞նչ եք կարծում` խմբակցությունում բոլորը միատեսա՞կ են քվեարկելու Ս. Սարգսյանի թեկնածությանը:
-Սա այն հարցն է, որ պետք է ունենանք քաղաքական որոշում, եւ ես ճիշտ, պատեհ չեմ համարում` մինչ պաշտոնական որոշում ունենալը խոսել այդ մասին:
-Իսկ այս պահին դաշինքն ընդդիմություն մնալու խնդիր ունի՞:
-Մենք ոչ մի նման խնդիր չունենք:
-Լինելով ընդդիմադիր` Ձեր խմբակցությունն Ա. Սարգսյանի թեկնածությանը կողմ քվեարկեց նախագահի պաշտոնում: Հիմա եթե դեմ քվեարկեք վարչապետի ընտրությանը, ստացվում է` ընդդիմությունը մեկ կողմ է, մեկ` դեմ կարեւոր ընտրությունների ժամանակ:
-Ինչ վերաբերում է Ա. Սարգսյանին, մենք Ա. Սարգսյանի հետ ունեցանք հանդիպում, բարձրացրեցինք մեզ հուզող հարցեր, որոնք մտնում են իր լիազորությունների շրջանակի մեջ, եւ ինքը համակարծիք էր դրանց: Ինքն ասաց, որ պետք է աշխատի եւ առաջնորդվի Սահմանադրությամբ, հույսեր ներշնչեց, եւ մենք գնացել, մեր դրական կարծիքն արտահայտել ենք: Իսկ թե ինչ կլինի 3 օր հետո, պաշտոնապես կլինի, ես Ձեզ կասեմ: Արմեն Սարգսյանն արդեն կատարված փաստ է, մնացածն ինչ կլինի, կլինի:
-Իսկ այժմ Ս. Սարգսյանի հետ` որպես վարչապետի թեկնածու, կարիք կլինի՞ հանդիպելու:
-Նման բան մենք չենք քննարկել: Ընդհանրապես, վարչապետության թեմայի շուրջ մենք դեռ քննարկում չենք ունեցել:
-Բայց այդ քննարկման ժամանակ Դուք կարծիք հայտնողներից մեկն եք լինելու: Կարծում եք` Ս. Սարգսյանը հարմա՞ր թեկնածու է վարչապետի պաշտոնում:
-Ինչո՞ւ եք ինձ ուզում տալ այդպիսի հարցեր, որոնց պատասխանները… Կարո՞ղ է` ես ինչ-որ կարծիք հայտնեմ, ու դա գաղտնի մնա: Ուղղակի պետք է գա դրա պահը, ժամանակը:
-Այսինքն` դեռեւս չե՞ք ուզում այդ մասին բարձրաձայնել:
-Ո՛չ, չեմ ուզում, մինչեւ իմ քաղաքական թիմը չունենա պաշտոնական դիրքորոշում:

ԱԺ «Ծառուկյան» խմբակցության պատգամավոր Վանիկ Ասատրյան

-Պարո՛ն Ասատրյան, ճիշտ կլինի՞, որ «Ծառուկյան» դաշինքը կողմ քվեարկի Ս. Սարգսյանի թեկնածությանը, թե՞ պետք է դեմ արտահայտվել:
-Մենք ունենք խմբակցություն, որտեղ ունենք քննարկելու հարցեր եւ որոշում կայացնելու:
-Բայց կարճ ժամանակ է մնացել, Դուք ի՞նչ տեսակետ ունեք. վարչապետի ընտրությանն ինչպե՞ս է պետք քվեարկել:
Հարցը լսելով` Վանիկ Ասատրյանն անջատեց հեռախոսը:

ՇԱՏ ՀԱՐՑԵՐ ԳՈՒՑԵ ԻՄ ՑԱՆԿՈՒԹՅԱՄԲ ՉԵՆ ԵՂԵԼ

Ներկայիս քաղաքական գործընթացների շուրջ «Ժողովուրդ» օրաթերթը զրուցել է բնապահպանության նախարարի ժամանակավոր պաշտոնակատար Արծվիկ Մինասյանի հետ:

-Պարո՛ն Մինասյան, եթե Դուք մնաք նախարարի պաշտոնում, Ձեզ համար որքանո՞վ հեշտ կլինի աշխատել Ս. Սարգսյանի հետ` որպես վարչապետի:
-Ես կարծում եմ` կլինի բարձր արդյունավետությամբ` նկատի առնելով ոչ միայն այն հանգամանքը, որ Սերժ Սարգսյանը եղել է վարչապետ, ղեկավարել է երկիրը եւ բոլոր խնդիրներին ոչ միայն քաջածանոթ է, նաեւ այս աշխատանքի ընթացքում բազմաթիվ ստրատեգիական որոշումներ կայացվել են հենց պարոն Սարգսյանի անմիջական մասնակցությամբ եւ դիրքորոշման հիման վրա, բնականաբար մեր ոլորտը` շրջակա միջավայրի քաղաքականությունը եւ բնապահպանությունը, կարեւորագույն այդ ոլորտներից է: Կանխատեսում եմ շատ արդյունավետ աշխատանք, մանավանդ որ մեծածավալ բարեփոխումների առջեւ ենք կանգնած: Շարունակելու ենք աշխատել, եւ ռեֆորմները, որ մեր առջեւ կան, պետք է փոխադարձ սատարումներով ամբողջ ծավալով իրականացնենք:
-ՀՅԴ-ն սատարում է Ս. Սարգսյանի թեկնածությունը: Իսկ ինչո՞ւ ՀՀԿ-ն չի սատարում Ձեզ` որպես կոալիցիոն գործընկեր, երբ առաջարկում եք վերացնել ընտրությունների վարկանշային համակարգը:
-Ես կարծում եմ` դա քաղաքական քննարկումների հարց է: Որեւէ անգամ նման պնդում կամ հակադարձ պնդում չի եղել, եւ առաջիկայում Դուք կտեսնեք, որ այդ հարցերն օրակարգային են եւ քննարկման առարկա լինելու են: Այլ բան է, թե ո՞ր փուլում եւ ի՞նչ ձեւով է դա ներկայացվելու:
-Իսկ Ձեզ համար դժվա՞ր չէր Կ. Կարապետյանի հետ աշխատել. նա Ձեզ նկատողություններ էր անում, կարծես թե անվստահություն էր հայտնում: Դժվա՞ր չէր նախարարի համար աշխատել այդ պայմաններում:
-Ինձ համար աշխատանքը եղել է բնականոն հունով: Շատ հարցեր գուցե իմ ցանկությամբ չի եղել, բայց կառավարության առանձնահատկությունը հենց այն է, որ կա վարչապետ, կան նախարարներ, եւ ամեն մեկն իր լիազորությունների շրջանակում է աշխատում: Ես համոզված եմ, որ իմ կողմից ցուցաբերվել է մաքսիմալ հարգանք, բայց նաեւ բազմաթիվ կետերով, որտեղ կան անհամաձայնություններ, մենք փորձել ենք իրար հետ երկխոսության միջոցով հարթել այդ ամենը: Համոզված եմ, որ պարոն Կարապետյանի` կառավարությունում առաջին փոխվարչապետի կարգավիճակում աշխատանքի շարունակումը, մեր աշխատանքի արդյունավետությունը դրանից չի տուժի, եթե չավելանա:
-Լուրեր են շրջանառվում, որ Դուք չեք լինելու նոր կառավարությունում: Իսկ ինքներդ ցանկություն ունե՞ք պաշտոնավարումը շարունակելու:
-Կան բազմաթիվ ռեֆորմներ, սկսած աշխատանք, որը պետք է տրամաբանական ավարտին հասցնել: Սա` իմ ցանկության մասով: Երկրորդը` չկա որեւէ պատճառ կամ առիթ` նման պնդումներ անելու: Դա, ես կարծում եմ, փոքր ինտրիգների եւ այն մարդկանց ցանկություններն են, ովքեր անվերջանալիորեն փորձում են ճեղք գտնել կամ անօրինական եկամուտների գեներացման հնարավորություն ունենալ: Մենք բացառում ենք այդ ամենը, մենք համակարգի առողջացման, խորքային վերանայման շատ լուրջ գործընթաց ենք սկսել, եւ հուսով եմ, որ այդ գործընթացը կունենա իր տրամաբանական ավարտը` անկախ նրանից, թե որքան կպաշտոնավարեմ:

Նյութերը՝ ՄԵՐԻ ՄԱՐՏԻՐՈՍՅԱՆԻ

ԾՆՈՒՆԴ՝ ՆԻՍՏԻ ՕՐԸ
Երեկ, մինչ Սփյուռքի եւ երիտասարդության հարցերով նախարար Հրանուշ Հակոբյանը մասնակցում էր կառավարության նիստին, կառավարության հետնամուտքի մոտ տոնական տրամադրություն էր: Բանն այն է, որ երեկ Հրանուշ Հակոբյանի ծննդյան օրն էր, եւ վերջինիս վարորդն էր ընդունում նախարարին ուղարկված ծաղիկները: «Ժողովուրդ» օրաթերթի թղթակիցը նկատեց, որ կառավարության շենքին մոտեցավ դեսպանատան համարներով մեքենա, եւ Հրանուշ Հակոբյանի վարորդին փոխանցեց վարդեր: Նախարարի վարորդը մեզ հետ զրույցում ասաց, թե նախարարի ծնունդն է, սակայն հրաժարվեց ասել, թե որ դեսպանն էր ուղարկել վարդերը: Նիստի ավարտից հետո տիկին Հակոբյանը իջավ կրկին վարդերով. երեւի գործընկերներն էին շնորհավորել նրան ու նվիրել ծաղիկները:

ՀԵՍՏԱՊԱՐՆ ԱԺ-ՈՒՄ
Երեկ խորհրդարանում 90 կողմ, 4 դեմ ձայների հարաբերակցությամբ ընդունվեց «Առեւտրի եւ ծառայությունների մասին» օրենքում փոփոխություններ կատարելու մասին նախագիծը: Սա, ի դեպ, վերջին օրերին ամենաբուռն քննարկումների ենթարկված օրինագծերից էր ոչ միայն օրեր առաջ տեղի ունեցած հանձնաժողովի նիստում, այլ նաեւ լիագումար նիստում: Իսկ բուռն քննարկման պատճառ էր հանդիսացել նախագծում տեղ գտած «հեստապար» /ստրիպտիզ/ տերմինը: Այն բացատրվում է որպես «պարելով եւ (կամ) երաժշտությամբ ուղեկցվող բեմական էրոտիկ ներկայացում, որի մասնակիցները ներկայացման ընթացքում աստիճանաբար մասամբ կամ լրիվ մերկանում են» նախադասությամբ: Ուշագրավն այն է, որ նախագծին «Ծառուկյան» խմբակցությունը կողմ է քվեարկել, բացի Վարդան Բոստանջյանից, ով այդ տերմինն ամենաշատը քննադատողներից է: «Ժողովուրդ» օրաթերթը պարզեց, որ Բոստանջյանը նման կեցվածք էր դրսեւորել 8 տարի առաջ՝ 2010 թվականին, երբ այս օրենքը բերվեց խորհրդարան, սակայն այդպես էլ չքննարկվեց՝ պատգամավորների դիմադրությանը հանդիպելով: Չնայած այս անգամ այդպես չեղավ, սակայն Վարդան Բոստանջյանը կրկին մնաց իր կերպարի մեջ: 8 տարի առաջ նա այս ամենը որակել էր որպես «անբարոյականության մասին օրենք», իսկ այս անգամ էլ կոչ արեց հեստապարը հանել, շպրտել մի կողմ: Հավելենք, որ դեմ քվեարկած 4 պատգամավորները եղել են «Ելք» խմբակցությունից:

ԸՆԴԴԵՄ ԲՈՒՀ-Ի
Մինչ ՀՀ քննչական կոմիտեում շարունակվում է Երեւանի Վ. Բրյուսովի անվ. պետական լեզվահասարակագիտական համալսարանում բացահայտված չարաշահումների գործը, համալսարանի աշխատակիցներն իրենց իրավունքները վերականգնելու համար դիմում են դատարան: «Ժողովուրդ» օրաթերթին հայտնի դարձավ, որ ապրիլի 11-ին լեզվահասարակագիտական համալսարանի դեմ դատական հայց է ներկայացրել Լյուդմիլա Մկրտչյանը՝ պահանջելով իրեն վերականգնել նախկին աշխատանքին: Ավելի վաղ այս բուհի դասախոսներից Սոնա Խլղաթյանն էր նման հայց ներկայացրել դատարան, սակայն նրան մերժել էին, եւ հիմա նա էլ բողոքարկել է գործը ՀՀ վերաքննիչ դատարանում: