ՀԱՐԿԱՅԻՆ ՍՏՎԵՐԻ ՀԱՄԱՐ ԲՈԼՈՐՍ ԵՆՔ ՄԵՂԱՎՈՐ

Վերջին բացահայտումների եւ ոլորտային խնդիրների շուրջ «Ժողովուրդ» օրաթերթը զրուցել է ՊԵԿ նախագահ Դավիթ Անանյանի հետ:

-Պարո՛ն Անանյան, ՊԵԿ-ում անցկացված աուդիտի շրջանակում բացահայտումներ եղա՞ն:
-Ես ներքին աուդիտի վարչության հաշվետվությունը դեռ չեմ ստացել: Ներքին անվտանգության վարչությունն իր ամենօրյա գործառույթն իրականացնում է: Եվ ծառայողական քննություններ կան, որոնք իրականացվում են եւ վերաբերվում են այս կամ այն հարկային կամ մաքսային ծառայողի կոնկրետ վարքագծին առնչվող տեղեկատվության հերքմանը կամ հաստատմանը:
-Իսկ արդյունքների մասին հանրությունը ե՞րբ կտեղեկանա:
-Արդյունքների մասին հանրությանը տեղեկացնելու իրավական պարտականություն մենք չունենք, ուղղակի որդեգրելով թափանցիկ գործելակերպ` այն տեղեկատվությունը, որը մեր կարծիքով հանրային հետաքրքրության առարկա կլինի, մենք դրանք կբացահայտենք:
-ՊԵԿ նախկին նախագահը որեւէ կերպ պատասխանատվություն կրելո՞ւ է` իր աշխատանքի ընթացքում հնարավոր չարաշահումների կամ խնդիրների հետ կապված:
-Մենք չենք թիրախավորում կոնկրետ անձանց: Մենք այդպիսի նպատակադրում չունենք: Եթե որեւէ հարկ վճարողի վարքագծի ուսումնասիրման կամ օրենսդրությամբ սահմանված կարգով մեր գործառույթների իրականացման շրջանակում կտեսնենք, որ այդ հարկ վճարողի վարքագիծը որեւէ անձի` լինի դա պաշտոնատար անձ` ներկա, նախկին թե նախկինից նախկին, եթե նրանց կոնկրետ գործողությունների կամ անգործության հետեւանք է, մենք համապատասխան քայլերը կձեռնարկենք: Ինչ վերաբերում է իմ կոլեգային` Վարդան Հարությունյանին, շատ դեպքերում ես այսօր նաեւ իր կողմից կատարված աշխատանքի բարենպաստ արդյունքները քաղում եմ: Մենք իրականացնում ենք օրենսդրությամբ սահմանված կարգով մեր գործառույթները: Եթե դրա շրջանակում այդպիսի բաներ կբացահայտվեն, համապատասխան քայլերը մենք կիրականացնենք:
-Կնշե՞ք մի քանի հարց, որ Դուք` որպես ՊԵԿ նախագահ, Ձեր առջեւ խնդիր եք դրել` վերացնելու:
-Հարկային ստվերի գոյությունը: Դրա ոլորտային ուսումնասիրություն նախկինում չի կատարվել: Մենք հանրության առջեւ պետք է լինենք շատ ավելի, այսպես ասած, ազնիվ: Չէի ուզի, որ հանրության մոտ այնպիսի տպավորություն լիներ, որ մենք մեր ամենօրյա գործառույթների մի մասը դադարեցրել ենք եւ զբաղվում ենք միայն իրավապահ դաշտի գործառույթներով: Այդպիսի բան չկա: Թերեւս, ամենակարեւորը համակարգային բացթողումների, մեր 20-25 տարվա գործունեության, մեր բոլորիս բացթողումների պատճառները բացահայտելն է: Դա ստվերի գոյությունն է: Կա ստվեր, այո՛, կա ստվեր: Մեր գլխավոր խնդիրը հիմա ստվերի դեմ պայքարի գործիքակազմ առաջարկելն է կառավարությանը:
-Այդ հարկային ստվերն ո՞ւմ թողտվությամբ է ձեւավորվել եւ աճել:
-Դա Ձեր, իմ, հանրության թողտվությամբ, պաշտոնյաների եւ ոչ պաշտոնյաների թողտվությամբ է եղել: Հարկային հարաբերություններն ունեն 2 կողմ` հարկատու եւ հարկառու: Մեր բոլորիս հանդուրժողականության հավաքական արդյունքն է դա: Չենք կարող մատնանշել, օրինակ` Պողոսյան Պողոսն է մեղավոր, եկեք` իրեն պատժենք: Մենք բոլորս ենք մեղավոր:
-Ինչո՞ւ նախկինում չէիք բարձրաձայնում այս բոլոր խնդիրների եւ ստվերի մասին:
-Ինչ գիտեք` չեմ բարձրաձայնել: Կարծում եք` անպայման պետք է հրապարակավ բարձրաձայնած լինեմ այս կամ այն երեւույթի մասին: Իմ աշխատանքային գործունեության ավելի քան 25 տարիների ընթացքում ես նույնկերպ եմ գործել: Ես սովոր եմ բարձրաձայնել այն, ինչ տեսնում եմ: Ես միշտ ունեցել եմ եւ աչքի եմ ընկել իմ ըմբոստ խառնվածքով: Հետեւաբար, նախորդ կառավարության շրջանում բոլոր ոչ բարենպաստ կամ, իմ կարծիքով, շտկման ենթակա խնդիրների մասին բարձրաձայնել եմ բոլոր ատյաններում:
-Բայց նախկինում եղե՞լ է կաշկանդվածություն այս կամ այն մարմնից:
-Ոչ: Բացարձակ որեւէ կաշկանդվածություն չի եղել: Կաշկանդված լինելն իմ արժեքային համակարգի տիրույթում չէ:
-Դուք նշել եք մի քանի գազալցակայանների սեփականատերերի անուններ: Կխնդրեի ամբողջական ցանկը հնչեցնել:
-Մենք ամեն օր որոշակի բացահայտումներ ենք անում: Ես խոսել եմ 8 կազմակերպությունների մասին, որոնք շուրջ 950 մլն դրամի իրավախախտում են կատարել` նախնական հաշվարկով: Կազմակերպությունների հետեւում կանգնած են մարդիկ, որոնք հանրությանը հայտնի են, բայց շատ դեպքերում այդ մարդիկ իրավական առումով չեն հանդիսանում այդ կազմակերպությունների բաժնետերերը: Մենք առաջիկայում կհրապարակենք ամբողջական ցանկը:
-Դուք ունե՞ք օլիգարխ կամ միջին գործարար ընկերներ, եւ ովքե՞ր են նրանք:
-Ես օլիգարխ ծանոթներ չունեմ, որոնք իրենց հարստությունը դիզել են պետական պաշտոնների չարաշահմամբ կամ պաշտոնյաների հովանավորչությամբ:
-Իսկ գործարար ընկերներն ի՞նչ արտոնություններ ունեն:
-Ո՛չ, չէին էլ կարող ունենալ:
-Դուք ինքներդ ունե՞ք բիզնես:
-Ես բիզնես չունեմ: Եկել եմ Ֆինանսների նախարարություն 2016 թ.-ին PHP partners ընկերությունից, որտեղ հանդիսացել եմ հարկային ծառայությունների ղեկավար եւ եղել եմ ընկերության հիմնադիր բաժնետերերից մեկը: Ես այնտեղ ունեմ 24, 95 տոկոս բաժնեմասնակցություն, որը հավատարմագրային կառավարման եմ հանձնել 2016 թ.-ին: Խորհրդատվական այդ ընկերությունը ես չէի անվանի բիզնես եւ նրա կառավարմանը բացարձակապես չեմ մասնակցում:
-Իսկ Ձեր ընտանիքում կա՞ն անձինք, ովքեր զբաղվում են բիզնեսով:
-Կինս չի աշխատում: Հույս ունեմ, որ մոտակա ժամանակներս աշխատանքի կանցնի. առաջարկներ ունի: Մենք ընտանեկան բիզնես չունենք: Աղջիկս աշխատում է KPMG Armenia ընկերությունում` որպես աուդիտոր, որդիս սովորում է Ամերիկյան համալսարանում, փոքրս սովորում է դպրոցում: Եղբայրներս պետական ծառայողներ են, որեւէ բիզնես չունեն:
-Ջրի երես հանելով մի շարք պաշտոնյաների չարաշահումները` մտահոգություն չունե՞ք` թշնամիներ ձեռք բերելու: Իսկ եթե կրկին հեղափոխություն տեղի ունենա՞:
-Ես մեկ մտահոգություն ունեմ. հանկարծ իմ պաշտոնեական գործունեության, որեւէ գործառույթի առումով չթերանամ: Որեւէ այլ մտահոգություն չունեմ:
-Բանակում հայտնաբերված չարաշահումների գործն ի՞նչ փուլում է, եւ արդյո՞ք հարցաքննվելու է նաեւ Պաշտպանության նախկին նախարար Վիգեն Սարգսյանը:
-Քննություն է ընթանում, չեմ կարող բացահայտել: Իսկ Ձեր մատնանշած անձի վերաբերյալ եթե չունեք տեղեկատվություն, ինչու պետք է կանչենք հարցաքննության: Չունենք որեւէ տվյալ: Իսկ ընդհանուր առմամբ, նույնիսկ մենք մեր նկատմամբ պետք է լինենք խիստ: Եթե ես եմ չարաշահում ունենալու, ես իմ ենթականերին հրահանգ եմ տվել, որ եթե նույնիսկ տեղեկություն կստանաք իմ մասին, դա էլ պետք է պատշաճ ձեւով մշակվի եւ իրացվի: Չպետք է լինի ստացված տեղեկատվության կոծկում` անկախ նրանից, թե ում է վերաբերում:
-Դուք նշել եք, որ վարչապետն այնքան էլ հավանություն չի տվել Ձեր նշանակումներին, եւ եթե արդյունք ցույց չտաք, հրաժարական եք տալու:
-Ես ասել եմ, որ պարոն վարչապետն ունեցել է որոշակի վերապահումներ եւ հարցադրումներ է արել ինձ: Ես տվել եմ այդ հարցադրումների պատասխանը: Իսկ իմ հրաժարականը կտամ այն ժամանակ, երբ տեսնեմ, որ իմ առջեւ դրված խնդիրները ես չեմ կատարում:

Զրուցեց ՄԵՐԻ ՄԱՐՏԻՐՈՍՅԱՆԸ

ՀՅԴ-Ն Ե՛Վ ԳՈՀ Է, Ե՛Վ ԴԺԳՈՀ

ՀՅԴ Բյուրոյի անդամ Հրանտ Մարգարյանը կարծում է, որ իշխանությունները պետք է պատշաճ արձագանքեին եկեղեցու շուրջը կատարվող գործընթացներին։ Ինչպես հայտնի է՝ երկար ժամանակ է, ինչ Ամենայն հայոց կաթողիկոս Գարեգին Բ-ին կարգալույց անելու համար պայքար է տարվում։

«Եկեղեցու հետ կապված հարցերն անընդունելի են, մենք ինչու ենք զուսպ մնում, չեմ հասկանում, դրանով հասարակությանն ենք մղում առճակատման։ Կարգուկանոն պետք է երկրում իշխանությունները հաստատեն», – «Ժողովուրդ» օրաթերթի հետ զրույցում նշեց Հրանտ Մարգարյանը։
Միեւնույն ժամանակ Մարգարյանն ընդգծեց, թե յուրաքանչյուր անգամ կոալիցիայի մեջ լինելով` մշտապես էլ գոհ չեն եղել ընթացքից: «Վերջին մեկ տարին մենք կառավարության մեջ ենք եղել՝ նախկին եւ այսօր, երբեք էլ գոհ չենք եղել ո՛չ ընթացքից, ո՛չ էլ բոլոր կարգավորման հարցերից, բայց մենք ուզեցել ենք անել ամեն ինչ, որ ավելի լավ լինի։ Այսօր էլ ճիգ չենք խնայում՝ հույս հայտնելով, որ ամեն ինչ լավ կլինի», – հավելեց։
Դիտարկմանը` արդյո՞ք դժգոհ եք նաեւ կուտակային կենսաթոշակային համակարգի պարտադիր բաղադրիչի ընդունումից, քանի որ ՀՅԴ-ն դրան միշտ դեմ է եղել, եւ հնարավոր է հենց դա հետագայում հանդիսանա կառավարությունից դուրս գալու պատճառ, Մարգարյանը նշեց. «Ես այդպիսի բան չեմ կարող ասել։ Մի կաթիլ բան կարող է նույնիսկ պատճառ դառնալ։ Սակայն մենք այդ հարցով պահանջատեր ենք, առայժմ լսելի ենք դառնում ինչ-որ չափով, հուսով ենք, որ դրական լուծում կստանա»։

ՆԱԻՐԱ ՀՈՎՀԱՆՆԻՍՅԱՆ

ՆՈՐ ԵՎ ՀԻՆ ՀԱՅԱՍՏԱՆ
Երեկ ՀՀ վարչապետ Նիկոլ Փաշինյանը կարծես թե գտնվում էր հին եւ նոր Հայաստանի մեջտեղում: Նա մասնակցում էր պետական գործիչ Արամ Մանուկյանի արձանի բացման արարողությանը եւ կանգնած էր կողք կողքի ԱԺ նախագահ Արա Բաբլոյանի, Երեւանի քաղաքապետի պաշտոնակատար Կամո Արեյանի, Գարեգին Բ կաթողիկոսի հետ: Ընդ որում թե՛ Արա Բաբլոյանը, թե՛ Կամո Արեյանը ձգտում էին ամեն կերպ կոնտակտի դուրս գալ, զրուցել Նիկոլ Փաշինյանի հետ: Իսկ ահա բացման արարողությունից հետո, երբ Բաբլոյանը պատրաստվում էր հարցազրույց տալ «Ժողովուրդ» օրաթերթին, Նիկոլ Փաշինյանն Արա Բաբլոյանին անձամբ կանչեց զրուցելու եւ մինչ վարչապետի նստավայրը քայլելով` երկու պաշտոնյաներն ակտիվորեն զրուցում էին:

ԱՌԳՐԱՎԵԼ ԵՆ ՈՂՋ ԳՈՒՅՔԸ
«Ոսկու աշխարհ» տոնավաճառի սեփականատեր Վաղարշ Աբրահամյանը ԴԱՀԿ-ի հետ կռիվ է տալիս: «Ժողովուրդ» օրաթերթին հայտնի դարձավ, որ 2018 թվականի հուլիսի 12-ին «Վաղարշ եւ որդիներ» կոնցեռն ՍՊԸ-ն դիմել է ՀՀ վարչական դատարան ընդդեմ ՀՀ ԱՆ ԴԱՀԿ ծառայության: Ոսկու աշխարհի սեփականատերը պահանջում է, որ դատարանը ԴԱՀԿ ծառայության հուլիսի 3-ի գործողությունները ոչ իրավաչափ ճանաչի, կազմված արձանագրությունը վերացնի եւ առգրավված գույքերը հայցվորին վերադարձնելուն պարտավորեցնի: Դատելով իրավիճակից` ԴԱՀԿ-ն առգրավվել է ոսկու աշխարհի սեփականատիրոջ գույքը, եւ վերջինս դատարանի միջոցով է ցանկանում այն վերականգնել: Թե ինչ որոշում կկայացնի դատարանը, ցույց կտա ժամանակը: Մինչ այդ, նկատենք, որ Վաղարշ Աբրահամյանը ժամանակին ՀՀԿ իշխանության կողմնակիցներից է եղել:

ՏԱՔՍԻՆԵՐԻ ՈՒՂԵՎՈՐ ՉԿԱ
Հայաստանում այս տարվա հունվար-մայիս ամիսներին ուղեւորափոխադրումների քանակը զգալի նվազել է` անցած տարվա նույն ժամանակահատվածի համեմատ: «Ժողովուրդ» օրաթերթը ՀՀ վիճակագրական կոմիտեից տեղեկացավ, որ նշված ժամանակահատվածում ուղեւորափոխադրումների անկումը կազմել է 8.7 տոկոս: Անկումն արձանագրվել է ավտոմոբիլային ուղեւորափոխադրումների ոլորտում` 11.7 տոկոսով: Օրինակ` տաքսիների ուղեւորափոխադրումները նվազել են 8.1 տոկոսով: Ինչպես հայտնի է` դրանք անմիջականորեն արտացոլում են երկրի ժողովրդագրական վիճակը: Չէ՞ որ պաշտոնական տվյալներով` ամեն տարի ՀՀ-ից արտագաղթում է մոտ 40-50 հազար մարդ: Ակնհայտ է, որ նրանց բացակայությունն իր ազդեցությունն է ունեցել ուղեւորափոխադրումների ծավալների վրա: