ՌՈՒՍԱՍՏԱՆԸ ՉԻ ԿԱՐՈՂ ԱՆՏԱՐԲԵՐ ԼԻՆԵԼ ԼՂ ՀԱՐՑՈՒՄ

Վերջին օրերին ղարաբաղյան կոնֆլիկտի շուրջ հնչող հայտարարությունների եւ թեմային առնչվող այլ հարցերի շուրջ «Ժողովուրդ» օրաթերթը զրուցել է Ղարաբաղյան հակամարտության կարգավորման բանակցություններում ՌԴ նախագահի նախկին ներկայացուցիչ, 1992-1996 թթ. ԼՂ միջնորդական առաքելության ղեկավար Վլադիմիր Կազիմիրովի հետ:

-Պարո՛ն Կազիմիրով, ՀՀ վարչապետ Նիկոլ Փաշինյանը հայտարարել է, որ Ռուսաստանը հնարավորություն ունի թույլ չտալու նոր պատերազմական գործողություններ ԼՂ հակամարտության գոտում: Ի՞նչ եք կարծում` ՌԴ-ն իսկապե՞ս ունի այդ հնարավորությունը:
-Ես խորապես համոզված եմ, որ, իհարկե, Ռուսաստանը չի կարող անտարբեր լինել Լեռնային Ղարաբաղի կոնֆլիկտի շուրջ զարգացումների հարցում: Ռուսաստանը քիչ բան չի արել մասսայական արյունահեղությունները դադարեցնելու հարցում: Եվ, իհարկե, հետաքրքրված է այդ կոնֆլիկտի խաղաղ կարգավորման հարցում: Բացի այդ, պետք է հաշվի առնել, որ անկախ այն հանգամանքից, թե ինչպես կարող են իրադարձությունները զարգանալ, Ռուսաստանը որոշակի պարտավորություններով կապված է ՀԱՊԿ անդամ երկրների հետ: Ահա իրավիճակը:
-Իսկ այժմ ՌԴ-ն օգտագործո՞ւմ է այդ հնարավորությունը, որպեսզի կանխի հնարավոր պատերազմը:
-Վերցրեք վերջին դեպքը, որ կազմակերպել էին բաքվեցիները 2016-ի ապրիլին: Ո՞վ էր զբաղվում այն հարցով, որ հնարավորինս շուտ դադարեցներ այն իրադարձությունները: Իհարկե, հենց Ռուսաստանը: Հենց Մոսկվայում հանդիպեցին շտաբերի ղեկավարները եւ պայմանավորվածություն ձեռք բերվեց, որպեսզի դադարեցվեն այդ օպերացիաները:
-Կարծում եք` եթե Ադրբեջանը եւս մեկ անգամ որոշի սադրանքի դիմել, այդ մասին նախապես կխոսի՞ ՌԴ իշխանության հետ:
-Գիտեք` Հայաստանը եւ Ադրբեջանը կարող են ինքնուրույն կողմնորոշվել` ինչպես իրենք վարվեն, ում հետ խոսեն: Ես միայն կարող եմ ասել, որ Ռուսաստանը նման իրադարձությունների զարգացմանն անտարբեր մնալ, իհարկե, չի կարող: Մեր շահերից է բխում, դա նաեւ Ռուսաստանի ազգային շահն է, որ Կովկասում պահպանվի թեկուզ եւ հարաբերական կայունությունը: Բայց լավ կլինի հասնել լուրջ, խորապես հիմնավորված կայունության: Դա, իհարկե, շատ ցանկալի կլիներ:
-ՀՀ պաշտպանության նախարարը Edaily-ին տված հարցազրույցում նշել է, որ Հայաստանը պատրաստ է պատերազմի: Եվ ապրիլյան ագրեսիայի կրկնության դեպքում հայկական կողմը կարող է չդիմանալ հակառակորդին շեշտակի եւ լայնածավալ հակազդելու նպատակով իր զինանոցում առկա բոլոր միջոցները կիրառելու գայթակղությանը: Սա կարո՞ղ է որպես մեսիջ դիտվել` ուղղված հակառակորդին:
-Ես կարող եմ միայն իմ անձնական տեսակետը հայտնել, որը ռուսաստանյան պաշտոնական շրջանակների տեսակետը չի արտացոլում: Ես ինքս դեմ եմ ռազմական գործողություններին: Եվ դա իմ անձնական հետաքրքրվածությունն է, որ նման գործողություններ չլինեն, քանի որ քիչ ջանք չի ներդրվել 1994 թվականին հրադադարի հասնելու համար: Ես դեմ եմ տարբեր տեսակի լեզվական հռետորաբանությանը` որ կողմից էլ որ դա լինի: Ես չեմ կարծում, որ ռազմատենչ հռետորաբանությունն ինչ-որ ձեւով դրական է ազդում ներկայիս հրադադարի վրա: Կայունություն դա չի ավելացնում, այլ` հակառակը:
-Իսկ Արցախի ՊԲ հրամանատար Լեւոն Մնացականյանը նշել է, որ առաջնագծում իրադրությունը կայուն հանգիստ է, բայց վտանգով լի: Կարծում եք` այժմ Ադրբեջանը կտրուկ քայլերի կգնա՞:
-Ինձ համար դժվար է ինչ-որ ձեւով վերլուծել ադրբեջանական ղեկավարության նպատակները: Դա կոնֆլիկտի կողմերին առնչվող հարց է: Նրանցից յուրաքանչյուրը թող չափի իր հնարավորությունները եւ փառք Աստծո, որ չեն օգտագործում այդ հնարավորությունները: Շատ վատ կլինի, եթե սկսեն օգտագործել դրանք պրակտիկայում:
-ՀՀ վարչապետ Նիկոլ Փաշինյանը հանդիպել էր ՀՀ առաջին նախագահ Լեւոն Տեր-Պետրոսյանի հետ: Քննարկվել էին Արցախի խնդրին առնչվող հարցեր: Սա համարո՞ւմ եք ոչ պատահական եւ ըստ Ձեզ` առաջին նախագահը կարո՞ղ է այս շրջանում օգտակար խորհուրդներ տալ:
-Այո՛, կարծում եմ Լեւոն Տեր-Պետրոսյանը ու յուրաքանչյուր նախագահ կարող են պատմել` ինչպես են գործերը եղել այն ժամանակ, երբ իրենք նախագահի բարձր դիրքն էին զբաղեցնում: Բոլոր նախագահներն էլ երեւի թե մշտապես նկատի են ունեցել ղարաբաղյան կոնֆլիկտի կարգավորումը` որպես առաջնահերթ խնդիրներից մեկը: Եվ, իհարկե, նրանցից յուրաքանչյուրը պատմելու բան կունենա: Ուզում եմ ասել, որ Հայաստանում որոշ անձինք փորձում են ինձ ներքաշել այն դիսկուրսի մեջ, թե ով է մեղավոր այն բանի համար, որ ԼՂ-ն 1997 թվականից հետո չի մասնակցում բանակցային գործընթացին: Ես որեւէ կերպ չեմ արտահայտվել այդ հարցերի շուրջ: Դա Հայաստանի ներքին գործն է, եւ ես չպետք է այդ մասին արտահայտվեմ:
-Դեռեւս ՀՀ վարչապետ Նիկոլ Փաշինյանի եւ Ադրբեջանի նախագահ Իլհամ Ալիեւի միջեւ հանդիպում նախատեսված չէ: Սա խնդիր համարո՞ւմ եք այս շրջանում, եւ հանդիպումն ի՞նչ կարող էր տալ:
-Մինսկի խմբի ներկայիս համանախագահներն ավելի դյուրին կերպով կարող են կողմնորոշվել, թե երբ է օգտակար այդ հանդիպումը եւ երբ` դեռեւս վաղաժամ: Իհարկե, բանակցությունները, շփումը բանակցային սեղանի շուրջ շատ ավելի օգտակար է, քան միակողմանի հայտարարությունները: Իհարկե, օգտակար են հանգիստ բանակցությունները եւ կոմպրոմիսի փնտրտուքը:
-Ադրբեջանն էլ մշտապես օգտագործում է կոշտ հռետորաբանություն:
-Դե բոլոր նրանք, ովքեր ուշադրություն են դարձնում կոնֆլիկտին, ռազմատենչ հռետորաբանությունը բոլորին արդեն հայտնի է:
-Այս շրջանում ե՛ւ Հայաստանը, ե՛ւ Ադրբեջանն ի՞նչ քայլեր պետք է ձեռնարկեն, որ որեւէ դրական տեղաշարժ լինի:
-Մինչեւ ինչ-որ կոնկրետ հարցեր լուծելը` լինի դա տարածքային, լինի դա բնակիչների վերադարձ նախկին բնակավայրեր, անհրաժեշտ է լուծել ամենակարեւոր հարցը. կոնֆլիկտի լուծման ընթացքում բացառել ուժի կիրառումը: Գիտեմ, որ կողմերից մեկը չի ուզում դրան գնալ: Բայց հենց դա շանս կտա խնդրահարույց հարցերը լուծել: Պետք է օգտագործել ոչ թե ուժը, այլ գիտակցությունը:

ԵՍ ՆՄԱՆ ՄԱՐԴ ՉԵՄ, ՈՐ ԻՆՁՆԻՑ ԵՐԵՍ ԹԵՔԵՆ

Ինչպես հայտնի է, հուլիսի 2-ին յուրացումներ կատարելու, ինչպես նաեւ ՀԿ ծառայողի լիազորությունները չարաշահելու կասկածանքով բերման էր ենթարկվել, ապա ձերբակալվել «Հայաստան» համահայկական հիմնադրամի տնօրեն Արա Վարդանյանը:

Վերջինս խոստովանել էր, որ տնօրինելով 25 մլն դրամի վարկային գծով բանկային քարտը` գումարն օգտագործել է անձնական նպատակներով: Վարդանյանը հուլիսի 6-ին 1 մլն դրամ գրավի դիմաց ազատ էր արձակվել: Դեպքի շուրջ «Ժողովուրդ» օրաթերթը զրուցել է հիմնադրամի արդեն նախկին տնօրեն Արա Վարդանյանի հետ:
-Պարո՛ն Վարդանյան, Դուք զղջո՞ւմ եք կատարվածի համար: Եվ եթե չլիներ ԱԱԾ բացահայտումը, փաստորեն, Դուք շարունակելո՞ւ էիք հանգանակված գումարները սեփական նպատակներին ծառայեցնել:
-Խնդրում եմ որպես պատասխան օգտագործել իմ փաստաբան Լուսինե Սահակյանի կողմից հրապարակված նյութերը:
-Իսկ ինչո՞վ եք մտադիր զբաղվել այս դեպքերից հետո:
-Այս պահին ես դեռ կատարում եմ հանձնման եւ ընդունման աշխատանքները հիմնադրամում: Իսկ ապագան ցույց կտա: Հանգստանալ չեմ պատրաստվում:
-Այս դեպքից հետո եղա՞ն ընկերներ, որոնք երես թեքեցին Ձեզնից:
-Ո՛չ: Ես նման մարդ չեմ, որ ինձնից երես թեքեն: Կգա ժամանակ եւ ես կպատասխանեմ բոլոր հարցերին: Բայց այս պահին դեռ նախաքննություն է ընթանում:
Հ.Գ. Նշենք, որ «Հայաստան» համահայկական հիմնադրամի տնօրենի թափուր պաշտոնի համար մրցույթ է հայտարարված: Մրցույթի պայմանները եւ մրցութային հանձնաժողովի կազմը հաստատել է ՀՀ նախագահ, հիմնադրամի հոգաբարձուների խորհրդի նախագահ Արմեն Սարգսյանը:

Նյութերը` ՄԵՐԻ ՄԱՐՏԻՐՈՍՅԱՆԻ

ՉԻ ՀԱՎԱՏՈՒՄ
Ինչպես հայտնի է, հուլիսի 14-ին խուզարկություն էր կատարվել Արթուր Աղաբեկյանի առանձնատանը եւ հարակից շինություններում: Կասկածներ են եղել, թե Աղաբեկյանը տարբեր միջոցներ է փոխանցել կալանավորված գնդապետ Մանվել Գրիգորյանին: «Ժողովուրդ» օրաթերթը փորձեց Աղաբեկյանի զինակից ընկեր, ՀՀ գլխավոր ռազմական տեսուչ Մովսես Հակոբյանից ճշտել` հավատում է արդյոք, որ նա կարող էր նման բան անել: «Կարծում եմ` ոչ միայն ես, այլեւ այն մարդիկ, ովքեր ճանաչում են Աղաբեկյանին, միանշանակ կասեն, որ հասցեատերը սխալ են ընտրել»,-ասաց Հակոբյանը: Նա ընդգծեց, թե Աղաբեկյանը իր մարտական ընկերն է, հարգանքով է վերաբերվում նրա անցած ճանապարհին, նրան եւ նրա այսօրվա աշխատանքին:

ԱՐՁԱԿՈՒՐԴՈՒՄ ԵՆ
Հայաստանի հանրապետական կուսակցությունում որոշել են` մինչեւ օգոստոսի կեսերը ՀՀԿ ԳՄ նիստ չեն անցկացնելու: Այս մասին «Ժողովուրդ» օրաթերթի հետ զրույցում նշեց ԱԺ ՀՀԿ խմբակցության ղեկավար Վահրամ Բաղդասարյանը: «Արձակուրդային շրջան է, օգոստոսի կեսից հետո նոր նիստեր կանցկացվեն»,-ասաց Բաղդասարյանը: Նկատենք, որ ՀՀԿ այս որոշման վրա ազդել է նաեւ Սերժ Սարգսյանի բացակայության հանգամանքը: «Ժողովուրդ» օրաթերթի նախորդ համարում հայտնել էինք, որ ՀՀԿ նախագահ Սերժ Սարգսյանն այս օրերին գտնվում է Եվրոպայում, մասնավորապես` Իտալիայում: Իսկ առանց նրա, ինչպես հայտնի է, ՀՀԿ ԳՄ նիստեր չեն անցկացվում:

ՆԵՂԱՆԱԼՈՒ ՊԱՏՃԱՌՈՎ
ՀՀ առաջին փոխվարչապետ Արարատ Միրզոյանի եւ, ընդհանրապես, կառավարության դեմ արշավը խորը արմատներ ունի: «Ժողովուրդ» օրաթերթի տեղեկություններով` վերջերս ամերիկյան հարցերով փորձագետ Արեգ Գալստյանը հանդիպել է ՀՀ արտաքին գործերի նախարար Զոհրաբ Մնացականյանին: Գալստյանը նախարարից խնդրել է իրեն տալ արտահաստիքային խորհրդականի պաշտոն, սակայն մերժում է ստացել: Միեւնույն ժամանակ արդեն Մնացականյանը նրան առաջարկել է համագործակցել հետագայում, սակայն ոչ պաշտոնի գնով: Եվ կարելի է ենթադրել, որ Գալստյանը շատ ծանր է տարել` որոշելով վրեժ լուծել ՀՀ նոր իշխանություններից, իսկական արշավ սկսելով կառավարության դեմ: Իսկ Արարատ Միրզոյանի ԱՄՆ այցն էլ դարձել է ամենալավ առիթը նման քայլի գնալու համար: Նրան այս հարցում օգնում են նախկին իշխանության որոշ ներկայացուցիչներ, որոնք մեծ փորձ ունեն կեղծ տեղեկատվություն մատուցելու եւ սոցիալական ցանցերում արշավ կազմակերպելու մեջ: «Ժողովուրդ» օրաթերթը փորձեց մեկնաբանություն ստանալ հենց Գալստյանից. «Ես հանդիպումներ եմ ունեցել տարբեր բարձրաստիճան պաշտոնյաների հետ: Սակայն դրանցից ոչ մեկի ժամանակ պաշտոնների հարց չի քննարկվել, եւ միակ մարդը, ով ինձ պաշտոն է առաջարկել, եղել է ԱԱԽ քարտուղար Արմեն Գրիգորյանը՝ մշտական խորհրդականի պաշտոն: Սակայն ես չեմ ընդունել առաջարկը»: