ԼՈՒՐ ԿԱԴՐ

Լուսանկարն արվել է Էրեբունի վարչական շրջանում

Այս խոշոր աղբանոցը գտնվում է 194 դպրոցի հարեւանությամբ։ Փաստորեն, տուգանվելուց հետո էլ «Սանիթեք» ընկերությունը «տեղից չի շարժվում»։ Հուսանք, գոնե սեպտեմբերի 1-ի առթիվ տարածքի աղբը կմաքրվի։

ՀԱՐՑ. Աշխատել եմ մանկավարժ երաժշտական դաստիարակության տանը, որը գործել է հանրակրթական դպրոցում: 2001թ. աշխատել եմ նաեւ հանրակրթական դպրոցում, ունեմ 29 տարվա մանկավարժշական ստաժ: Դիմել եմ տարածքային սոցիալական բաժին, որտեղից տեղեկացրել են, որ «տուն» բառը չկա, եւ ես չեմ կարող ստանալ մանկավարժական թոշակ: Խնդրում եմ պարզաբանել` ինչո՞ւ չեմ կարող ստանալ մանկավարժական թոշակ:

Հասմիկ Վարդանյան (ք. Երեւան)

ՊԱՏԱՍԽԱՆ. «Պետական կենսաթոշակների մասին» ՀՀ օրենքի 14-րդ հոդվածի 1-ին մասի համաձայն` մասնակի կենսաթոշակ նշանակվում է կրթության, մշակույթի որոշ կատեգորիաների աշխատողներին, եթե լրացել է նրանց 55 տարին, եւ ունեն առնվազն 25 օրացուցային տարվա աշխատանքային ստաժ, որից առնվազն 12 օրացուցային տարին մասնագիտական ստաժ է: Մասնակի կենսաթոշակի իրավունք տվող մասնագիտական աշխատանքային ստաժում հաշվառվում են Հայաստանի Հանրապետության կառավարության սահմանված ցանկում նշված մասնագիտություններով եւ պաշտոններում մինչեւ 2003 թվականի օգոստոսի 1-ն աշխատած ժամանակահատվածները:
ՀՀ կառավարության 2011թ. մայիսի 5-ի թիվ 665-Ն որոշմամբ հաստատված «Պետական կենսաթոշակների մասին» ՀՀ օրենքով կենսաթոշակ նշանակելու համար դիմելու, կենսաթոշակ նշանակելու (վերահաշվարկելու), կենսաթոշակի տեսակը փոխելու, կենսաթոշակ վճարելու եւ կենսաթոշակի գործ (փաստաթղթեր) վարելու կարգի» 27-րդ կետի համաձայն` մասնագիտական աշխատանքային ստաժում հաշվառվում է միայն մասնակի աշխատանքային կենսաթոշակի իրավունք տվող ցանկում նշված կազմակերպությունում այդ իրավունքը տվող մասնագիտություններով ու պաշտոններում աշխատած ժամանակահատվածը:
Վերը նշված ցանկում «Երաժշտական դաստիարակության տուն» կազմակերպությունը նշված չէ, հետեւաբար այդ կազմակերպությունում աշխատած ժամանակահատվածը մասնակի կենսաթոշակի իրավունք տվող մասնագիտական ստաժում հաշվառվել չի կարող:
Ելնելով վերոգրյալից` մասնակի կենսաթոշակ նշանակելու համար անհրաժեշտ առնվազն 12 տարվա մասնագիտական աշխատանքային ստաժ չունենալու պատճառով Հ. Վարդանյանին այդպիսի կենսաթոշակ նշանակել հնարավոր չէ:

ՀՀ աշխատանքի եւ սոցիալական հարցերի նախարարության հասարակայնության հետ կապերի բաժին

«ԺՈՂՈՎՈՒՐԴ». Համատեղությամբ աշխատած ժամանակահատվածը մասնագիտական աշխատանքային ստաժում չի հաշվառվում:

ՀԱՐՑ. Խնդրում եմ ասեք` երեխաների ծնվելուց հետո պարտադի՞ր է քառասունք պահել, թե՞ ոչ:

Անժելա Մանուկյան (28 տարեկան, տնային տնտեսուհի)

ՊԱՏԱՍԽԱՆ. Ըստ բնական օրինաչափության` ծնված երեխան մտնում է կյանքի նոր միջավայր, որը խիստ տարբեր է նրա նախնական` մայրական ներքին միջավայրից: Եվ նախքան իրական կյանք մտնելը երեխան պետք է հարմարվի կյանքի այս նոր միջավայրին` օդին, լույսին, ձայնին: Քառասունքի կանոնը մաքրության օրենք է, որ վերաբերում է նախ` երեխայի մայրիկին, ապա` երեխային: Այցելել կարելի է, միայն, իհարկե, հիգիենիկ կանոնները պահպանելով, որպեսզի չվարակեն մոր եւ երեխայի թույլ օրգանիզմները: Երեխային տեսակցության գալն արգելելը քրիստոնեության հետ կապ չունի: Երեխան ծննդյան առաջին իսկ օրից պետք է սկսի սովորել կյանքին: Նա պետք է ունենա բացօթյա զբոսանքներ, ոչ թե տնային կալանքի տակ գտնվի:

Արարատյան Հայրապետական թեմ

«ԺՈՂՈՎՈՒՐԴ». Նկատենք, որ եկեղեցին երեխայի քառասունքի հատուկ կարգ ունի, համաձայն որի` ծննդյան օրվանից հաշված քառասուներորդ օրը ծնողները երեխայի հետ միասին գալիս են եկեղեցի եւ օրհնություն ստանում: