ԼՈՒՐ ԿԱԴՐ

Լուսանկարը՝ համացանցից

Կարտոֆիլ վաճառելը նույնպես արվեստ է: Այս դեպքում վաճառողը կարտոֆիլին հատուկ քառյակ է ձոնել։

ՀԱՐՑ. Եթե աշխատակիցը երեք ամսից ավել գտնվել է հիվանդության մեջ, ապա ինչպե՞ս է կազմակերպվում նրա՝ նպաստ ստանալու իրավունքը:

Կարինե Մանուկյան (35 տարեկան, օպերատոր)

ՊԱՏԱՍԽԱՆ. Հայտնում ենք, որ «Ժամանակավոր անաշխատունակության եւ մայրության նպաստների մասին» Հայաստանի Հանրապետության օրենքի 8-րդ հոդվածի համաձայն` վարձու աշխատողին հիվանդության նպաստ տրվում է ժամանակավոր անաշխատունակության թերթիկով վավերացված ժամանակավոր անաշխատունակության ժամանակահատվածի աշխատանքային օրերի համար` սկսած երկրորդ աշխատանքային օրվանից մինչեւ բժշկասոցիալական փորձաքննություն իրականացնող իրավասու պետական մարմնի կողմից հաշմանդամության խմբի սահմանումը կամ հաշմանդամության խմբի վերանայումը:
Միաժամանակ հայտնում ենք, որ եթե բժշկասոցիալական փորձաքննություն իրականացնող իրավասու պետական մարմնի որոշման համաձայն վարձու աշխատողը հաշմանդամ չի ճանաչվում, բայց շարունակում է դեռեւս մնալ անաշխատունակ, ապա հիվանդության նպաստ ստանալու նրա իրավունքը կարող է շարունակվել, բայց ոչ ավելի, քան մինչեւ 3 ամիս ժամկետով կամ մինչեւ օրենքով սահմանված կարգով աշխատանքից ազատվելը:

ՀՀ պետական եկամուտների կոմիտե

«ԺՈՂՈՎՈՒՐԴ». Նշենք, որ տեւական հիվանդության դեպքում վարձու աշխատողները բժշկասոցիալական փորձաքննության են ուղեգրվում անաշխատունակությունը սկսելու օրից 3 ամսից ոչ ուշ:

ՀԱՐՑ. Ես աշխատում եմ դպրոցում, լրացել է 25 տարվա մանկավարժական կենսաթոշակի տարիքս: 2 տարի համատեղությամբ աշխատել եմ որպես պահակ: Ինձ սոցապ բաժնից տեղեկացնում են, որ հրաման ունեն համատեղությամբ աշխատողների ստաժը չհաշվել: Ինչո՞ւ չեն տրամադրում ինձ իմ հասանելիք թոշակի գումարը: Նշեմ, որ ունեմ 27-28 տարվա ստաժ:

Հարություն Հովհաննիսյան (ք. Թալին)

ՊԱՏԱՍԽԱՆ. Հ. Հովհաննիսյանի հարցին ի պատասխան` տեղեկացնում ենք, որ «Պետական կենսաթոշակների մասին» Հայաստանի Հանրապետության օրենքի 14-րդ հոդվածի 1-ին մասի համաձայն` մասնակի կենսաթոշակ նշանակվում է կրթության, մշակույթի որոշ կատեգորիաների աշխատողներին, եթե լրացել է նրանց 55 տարին եւ ունեն առնվազն 25 օրացուցային տարվա աշխատանքային ստաժ, որից առնվազն 12 օրացուցային տարին մասնագիտական ստաժ է: Մասնակի կենսաթոշակի իրավունք տվող մասնագիտական աշխատանքային ստաժում հաշվառվում են Հայաստանի Հանրապետության կառավարության սահմանված ցանկում նշված մասնագիտություններով եւ պաշտոններում մինչեւ 2003 թվականի օգոստոսի 1-ն աշխատած ժամանակահատվածները:
Համատեղությամբ աշխատած ժամանակահատվածը մասնագիտական աշխատանքային ստաժում չի հաշվառվում:
«Կրթության, մշակույթի որոշ կատեգորիաների աշխատողներին մասնակի կենսաթոշակի իրավունք տվող մասնագիտությունների եւ պաշտոնների ցանկը» հաստատվել է ՀՀ կառավարության 2011թ. մայիսի 5-ի թիվ 665-Ն որոշմամբ:

ՀՀ աշխատանքի եւ սոցիալական հարցերի նախարարության հասարակայնության հետ կապերի վարչություն

«ԺՈՂՈՎՈՒՐԴ». Ցավոք, շատ օրենքներ գործում են ի վնաս շարքային քաղաքացիների: Փաստ է, որ կենսաթոշակառուների թոշակի գումարը, մեղմ ասած, չնչին է ու չի բավարարում նրանց տարրական կարիքներ հոգալու համար: Ընդունված օրենքներն էլ շփոթում եւ տարակուսանքի առաջ են կանգնեցնում թոշակառուներին: