ՔԱՂԱՔԱԿԱՆ ՀԱՄԱԿԱՐԳԻ ՏՈՒՆԸ ՔԱՆԴՈՂԸ

«Ժողովուրդ» օրաթերթը զրուցել է ՀՅԴ պատգամավորի թեկնածու Արծվիկ Մինասյանի հետ:

-Պարո՛ն Մինասյան, դուք աշխատել եք ե՛ւ այս, ե՛ւ նախկին իշխանությունների ժամանակ: Ի՞նչ փոփոխություններ եք նկատել:
-Որպես նախարար` բախտ է վիճակվել աշխատել երեք կառավարությունների հետ: Հովիկ Աբրահամյանի կառավարությունում չափազանց դժվար էր գաղափարների քննարկումն ու դրանց իրագործումը: Կարեն Կարապետյանի կառավարությունում առաջին հայացքից թվում էր, որ այս կամ այն ծրագիրը հեշտ կլինի կիրառել, սակայն հակադրություններն ու հակասությունները խորն էին` պայմանավորված ոչ միայն գաղափարական տարբեր մոտեցումներով, այլեւ անձնավորված որոշակի վերաբերմունքով: Իսկ Փաշինյանի կառավարության հետ շատ ավելի հեշտ էր աշխատելը, որովհետեւ վարչապետը անցել է պարլամենտական բավական մեծ ընթացք. քաղաքական գործից վարչապետի հետ, անշուշտ, ավելի հեշտ էր աշխատելը, սակայն այս կառավարության մեջ հաճախ հանդիպում էիր այնպիսի դեպքերի, երբ դիմացինը պարզապես չէր ընկալում ծրագրի էությունը, գաղափարը: Կառավարության մեջ ներգրավված մարդիկ պետք է հասկանան, որ ցանկացած ժամանակ պրոֆեսիոնալիզմ ու արհեստավարժությունը անհրաժեշտ են: Հին կադր արտահայտությունը չպետք է դառնա իրենց առաջնորդող ուժ, եւ մերժեն բոլոր հին կադրերին, որովհետեւ փորձառությունը ձեռք են բերում ժամանակի ընթացքում, մինչդեռ մենք հանդիպում ենք դեպքերի, որ ակնհայտորեն ոչ ճիշտ որոշումների արդյունքում փորձառու անձինք դուրս են մղվում պետական համակարգից, եւ դա կբերի Հայաստանում է՛լ ավելի սրացման եւ գործազրկության այն վիճակին, որ այսօր, ցավոք, ունենք: Հին եւ նոր կադրերի համադրությունը կլինի լավագույն տարբերակը: Այստեղ չկա սեւ եւ սպիտակ. բոլոր սպիտակները սեւանալու են, եթե մենք հասարակությանը երկու գույնի ենք բաժանում: Տարանջատել, կտրել կապը սերունդների միջեւ նշանակում է թուլացնել պետական կառավարման համակարգը:
-«Դաշնակցություն»-ը մասնակցելու է խորհրդարանական ընտրություններին: Ինչպե՞ս եք գնահատում կուսակցության շանսերը եւ առանձին Ձեր շանսերը` որպես ռեյտինգային թեկնածու:
-Արմավիրի մարզում, որտեղ ես եմ առաջադրված, մրցակցությունը մեծ է: Բոլոր քաղաքական ուժերն էլ ունեն արժանի թեկնածուներ: Ես չեմ խուսափել հրապարակային որեւէ բանավեճից, որովհետեւ հասարակությունը պետք է իմանա, թե ում է մանդատ տալիս: «Դաշնակցություն»-ը պիտի մասնակցի ընտրություններին, որովհետեւ այն ժողովրդի դիմադրողականությունն է: Եթե «Դաշնակցություն»-ը չլինի, ոչ մի վարչապետ չի կարող մարտահրավերներին դիմագրավել: Ես վստահ եմ, որ մեր հասարակության այն գիտակից հատվածը, որը տեսնում է այդ մարտահրավերները, «Դաշնակցության»-ը ձայն կտա:
-«Դաշնակցություն»-ը հայտարարեց, որ կուսակցության վարկանիշը ընկել է ՀՀԿ-ի հետ դաշինք կազմելու համար: ՀՀԿ-ական պատգամավոր Կարինե Աճեմյանը, անդրադառնալով սրան, ասաց, որ չի հասկանում` ինչո՞ւ են նման հայտարարություններ լինում այն դեպքում, երբ ժամանակին ՀՀԿ-ի հետ կոալիցիա կազմելու համար հերթեր էին գոյանում: Սրա մասին ի՞նչ կասեք:
-Երբ ասում են` «Դաշնակցություն»-ը, օրինակ, էսպիսի բան ասեց, պետք է նկատի առնել, որ ո՛չ ես եմ «Դաշնակցություն»-ը, ո՛չ էլ այլ դաշնակցական, եթե այն չունի կուսակցության ներկայացուցչական գործառույթ: Ինչ վերաբերում է համագործակցությանը կամ վարկանիշը ցածր լինելուն. Կարինե Աճեմյանը, որի հետ ես պատգամավոր եմ աշխատել, չեմ կարծում, որ ինքը այն քաղաքական անձն է, որ նման գնահատականներ է տալիս: Էդպիսի արտահայտություն առնվազն իրեն կարող էր թույլ տալ մարդ, որը որ կանգնած է կոալիցիա ձեւավորելու ակունքում, մանրամասնություններին տիրապետում է: Եթե անձը դրան չի տիրապետում ու նման բան է ասում, նշանակում է` այդ մարդը ուզում է քաղաքական այս վիճակում շոու անել կամ ինչ-որ հարվածներ հասցնել: «Դաշնակցություն»-ը համագործակցել է այն պատճառով, որովհետեւ իրեն խնդրել են: Դա վերաբերում է բոլոր այն իշխանություններին, որոնց հետ համագործակցել ենք` ներառյալ այս կառավարությունը: Մենք կառավարություն չենք մտել վարչապետին խնդրելով, հակառակը, վարչապետն է խնդրել, որ «Դաշնակցություն»-ը ներկայացված լինի կառավարությունում, որ կարողանանք բազմաթիվ մարտահրավերներ լուծել: Անդրադառնալով մեր անցյալին` ասել ենք, որ անցյալին վերադարձ չկա: Գուցե չպետք է մտնեինք կոալիցիա այն ժամանակ, երբ մեր ձայները վճռական չէին: Բայց մենք գնացել ենք այդ քայլին` ստանալով առավելագույնը երկրի համար, որ կարողանանք օգնել իշխանությանը այս խնդիրները լուծել: Երբ «Դաշնակցության» հասցեին մեղադրանքներ են հնչում, առնվազն պետք է հասկանալ` իսկ հասարակությունը ի՞նչ իշխանություն է ձեւավորել: Եթե «Դաշնակցություն»-ը բոլոր ժամանակներում համագործակցել է իշխանությունների հետ, ուրեմն կենսունակ է եղել, որ համագործակցել է:
-Երեւանի ավագանու ընտրությունների ժամանակ քաղաքական շատ ուժեր դժգոհեցին, որ պայքարը ընթանում էր սեւերի եւ սպիտակների միջեւ: Ի՞նչ եք կարծում, այս քարոզարշավը ինչպե՞ս կանցնի:
-Սեւի եւ սպիտակի բաժանումը օգտակար է երկու ուժերին` նախկին եւ ներկա իշխանություններին, որպեսզի կարողանան քաղաքական դաշտը հստակ բաժանել երկու մասի: Բայց դրանից ո՛չ հասարակությունն է շահելու, ո՛չ պետությունը, ո՛չ էլ մեր ընտրողները կարողանալու են գաղափարական, ծրագրային բանավեճի արդյունքում ընտրել այն ուժին, որը որ ապագայում կարող է լուրջ փոփոխություններ անել երկրում: Դա ցանկալի բան չէ, եւ չպետք է թույլ տալ, որ այդ բաժանումը դառնա առանցքը: Դա մեր քաղաքական համակարգի տունը քանդողն է: Երեւանի ավագանու ընտրություններում ոչ թե ավագանու ընտրություններ տեղի ունեցան, այլ վստահության քվե: Բայց դա կարելի էր չանել էլ Երեւանի մասշտաբով, որովհետեւ բոլորն էլ գիտեին, որ փոփոխությունը անհրաժեշտ է, եւ դրա համար Նիկոլ Փաշինյանը ունի հասարակության վստահությունը: Վստահ եմ` ո՛չ իշխանությունը, ո՛չ հասարակության մի մասը գոհ չէ այն պատկերից, ինչ ունեցանք Երեւանի ավագանիում, որովհետեւ մենք տեսնում ենք, որ չկա այն քննարկումը, չկա այն առողջ բանավեճը, հիմնարար լուծումների քարտեզը, որը պետք է զարգացնի Երեւանը: Համոզված եմ` այս խորհրդարանական ընտրությունները այսպես չեն լինի:
-Եթե «Դաշնակցություն»-ը չանցնի խորհրդարան, պատրաստ կլինի՞ արտախորհրդարանական ընդդիմություն լինել:
-Ես համոզված եմ, որ կանցնի: Այնուամենայնիվ, «Դաշնակցություն»-ը եղել է, կա եւ լինելու է առնվազն այնքան ժամանակ, քանի դեռ մեր ազգային, միասնական երազանքը` միացյալ, անկախ Հայաստանը, դեռեւս ձեւավորված չէ: Հետեւաբար, այդ առումով «Դաշնակցություն»-ը միշտ լինելու է: Ո՛չ ընտրություններով է ավարտվել կյանքը եւ ո՛չ էլ դրանով է սկսվում: Մեր ազգը ինքն իր ոչնչացման քաղաքականությունն է իրականացնելու, եթե ազգային դիմադրողականության ապահովման ուղղությամբ գործողություն իրականացվող քաղաքական ուժին չընտրի: Եթե որեւէ այլ ազգային, համահայկական կուսակցություն լիներ, որը կարող էր մրցակցել «Դաշնակցության» հետ, գուցե այդ հարցադրումը տրամաբանական կլիներ: «Դաշնակցություն»-ը եթե չլինի խորհրդարանում, բա էլ ո՞վ պետք է լինի: Իմ` քաղաքականության մեջ թրծված լինելը թույլ է տալիս դիմել մեր բոլոր քաղաքացիներին եւ այն անձանց, որոնք որ պատգամավորության թեկնածուներ են: Թող նրանք չփորձեն ասել բաներ, որոնք հետագայում խնդիրներ են առաջացնելու հենց իրենց համար: Որովհետեւ գալիս է պատասխանատվության պահը, քաղաքացու աչքերի մեջ նայելու պահը: Փորձենք ձեւավորել իսկապես պատասխանատու վերաբերմունք մեր ընտրությունների գործընթացում:

Զրուցեց ԼՈՒՍԻՆԵ ՄԻՆԱՍՅԱՆԸ

ՎԵՏԵՐՈԿՆԵՐԻ ՏԻՐՈՋԸ
ՀՀ վարչապետ Նիկոլ Փաշինյանը երեկ Լոռու մարզում «Իմ քայլը» դաշինքի քարոզարշավին կրկին անդրադարձավ նախօրեին ՔՊ վարչության նախագահ, Արցախյան ազատամարտի հրամանատար Սասուն Միքայելյանի դեմ լրատվական արշավին: Հիշում եք՝ Միքայելյանի՝ նախօրեին Թալինի ելույթը ներկայացվեց խեղաթյուրված, որից հետո ե՛ւ ՀՀԿ-ականները, ե՛ւ ՀՅԴ-ականները, ե՛ւ Արցախից պաշտոնյաներ սկսեցին քննադատական հայտարարություններ անել: Երեկ Փաշինյանը հայտարարեց, թե Միքայելյանին քննադատողները ձայն չհանեցին ԵԿՄ նախագահ Մանվել Գրիգորյանի հետ կապված բացահայտումների ժամանակ: «Բա ո՞ւր էիք, ա՛յ ազատամարտի պաշտպաններ: Գիտեմ` ուր եք: Ձեզնից ոմանք այդպիսի պահեստներ ունեն որոշ տեղերում, մենք այդ պահեստների տեղերը գիտենք, լուսանկարներ ունենք, շատ բան չենք ասում, քանի որ պետական գաղտնիքի հարց կա, ոմանք, որ բանակի համար նախատեսված հիմնադրամներից իրանց «վետերոկ»-ներն էին ֆինանսավորում, էդ ինչի՞ չէիք ազատամարտը պաշտպանում»: «Ժողովուրդ» օրաթերթի տեղեկություններով` Փաշինյանին զայրացրել է հատկապես այն հանգամանքը, որ Սասուն Միքայելյանի դեմ արշավին միացել են Արցախցի պաշտոնյաներ՝ ԼՂՀ ՊՆ խոսնակ Սենոր Հասրաթյանը, որ ավելի ուշ հեռացրել էր իր ֆեյսբուքյան գրառումը, նաեւ ԼՂՀ նախագահի հատուկ հանձնարարությունների գծով ներկայացուցիչ, ԱԱԾ նախկին ղեկավար Արշավիր Ղահրամանյանը: Ավելին, մեր տեղեկություններով` բանակի համար նախատեսված հիմնադրամներից իրանց «վետերոկ»-ները ֆինանսավորելու ակնարկներն ուղղված էին հենց Արշավիր Ղահրամանյանին, քանի որ նա է Արցախում «օբյեկտների» կամ «վետերոկների» սեփականատեր:

ԱՌԱՋԻՆ ՓՈՐՁՈՒԹՅՈՒՆԸ
ԲՀԿ առաջնորդ Գագիկ Ծառուկյանը այսօր քարոզարշավն անցկացնելու է Տավուշի մարզում` Իջեւան քաղաքում, ժամը 14.30-ին, իսկ 16:30-ին այդ նույն քաղաք է այցելելու «Իմ քայլը» դաշինքի առաջնորդ Նիկոլ Փաշինյանը: Հատկանշական է, որ Իջեւանը Փաշինյանի ծննդավայրն է, որտեղ էլ կհատվեն թերեւս երկու գլխավոր մրցակիցների ճանապարհները: Եվ սա փորձություն է նաեւ երկու ուժերի վարկանիշային թեկնածուների համար: Չնայած երեկ Ծառուկյանը հայտարարել է, թե բոլորը պետք է աջակցեն Փաշինյանին, «մատից փուշ հանեն», ոչ թե նրա համար խնդիրներ սարքեն:

ՕԵԿ ԹԵԿՆԱԾՈՒՆ` ՄԵՂԱԴՐՅԱԼ
«Օրինաց երկիր» կուսակցության կողմից առաջադրված ավագանու թեկնածուն հայտնվել է մեղադրյալի աթոռին: «Ժողովուրդ» օրաթերթին հայտնի դարձավ, որ մեղադրանք է առաջադրվել ՕԵԿ-ական թեկնածու Լիանա Մանուկյանին՝ տեղամասային ընտրական հանձնաժողովի անդամներ Էլիզա եւ Լուսինե Ջանոյանների լիազորությունների իրականացմանը խոչընդոտելու համար: Խափանման միջոց է ընտրվել ստորագրությունը երկրից չհեռանալու մասին, քրգործն էլ ուղարկվել է դատարան. այն կքննի դատավոր Դավիթ Գրիգորյանը: