ԲՀԿ-Ն ԷԼ ԿՆԵՐԿԱՅԱՑՆԻ ԿԱՌԱՎԱՐՈՒԹՅԱՆ ԿԱՌՈՒՑՎԱԾՔԻ ԻՐ ՏԱՐԲԵՐԱԿԸ

Երեկ «Իրազեկ քաղաքացիների միավորման» ղեկավար Դանիել Իոաննիսյանը ԵՊՀ-ում կառավարության կառուցվածքում սպասվող փոփոխությունների տեսլականի հետ կապված քննարկում էր հրավիրել: Հանդիպմանը ներկա էին պատգամավորներ` խորհրդարանական երեք խմբակցություններից: Քննարկումը բավականին թեժ ընթացք ստացավ: «Ժողովուրդ» օրաթերթը այս եւ այլ հարցերի մասին զրուցել է ԲՀԿ-ական պատգամավոր Գեւորգ Պետրոսյանի հետ:

-Պարո՛ն Պետրոսյան, երեկ տեղի ունեցած քննարկումը բավականին բուռն ընթացք ստացավ: «Լուսավոր Հայաստանի» ղեկավար Էդմոն Մարուքյանն ասաց, որ իշխանության ներկայացրած կառավարության կազմի վերաբերյալ հիմքերը իրեն չեն բավարարում, եւ եւս մեկ անգամ ներկայացրեց խմբակցության տեսլականը: Դուք էլ կարծես շատ հարցերով պաշտպանեցիք «Լուսավոր Հայաստանի» առաջ քաշած մոտեցումները: Կարո՞ղ ենք ասել, որ գրեթե ամբողջությամբ ընդունում եք «Լուսավոր Հայաստանի» ծրագիրը:
-«Լուսավոր Հայաստանը» ամբողջությամբ չներկայացրեց: Ես լուրջ չեմ վերաբերվի այն մարդուն, որը միանգամից կփորձի մեկ րոպեում ամբողջական գնահատական տալ այդ նախաձեռնությանը: Հիմնական հարցերում, այո, կային ընդունելի դրույթներ, բայց երեւի թե վեջնական կարծիք ես հիմա չհնչեցնեմ, մանավանդ որ խմբակցությունում դա չի քննարկվել, իսկ ես այս պահին խմբակցություն եմ ներկայացնում: Իմ անձնական կարծիքը եթե կհետաքրքրի, ապա ասեմ, որ առանձին դրույթների հետ համաձայն եմ, բայց թողնենք երեւի իրենք վերջնական ներկայացնեն, քննարկում լինի, «Բարգավաճ Հայաստանը» իր կարծիքը, խմբակցության դիրքորոշումը կհրապարակի:
-Այնուամենայնիվ, հատկապես ո՞ր դրույթներին եք կողմ:
-Դե, օրինակ, ես գտնում եմ, նորից եմ ասում, որ օպերատիվությունը իրավապահ մարմինների աշխատանքները ապահովելու համար ճիշտ չի լինի այնպիսի իրավակարգավորում տալ, որ Ազգային ժողովը անմիջական վերահսկողություն իրականացնի: Պատկերացրեք Ազգային Ժողովի նիստ գումարելու համար, քվորում ապահովելու համար կարող է, ասենք, ժամեր պահանջվեն, անգամ օրեր, այն դեպքում, երբ օպերատիվ աշխատանքը, գիտեք, ուշացումներ չի հանդուրժում, եւ դրանից կարող է հասարակական շատ մեծ շահեր տուժեն: Բայց եկեք թողնենք, որ ավելի ամփոփ երբ իրենք կներկայացնեն իրենց տեսակետը, մենք էլ, բնականաբար, հանդես կգանք այդ տեսակետի իրավաքաղաքական գնահատականներով:
-Փաստորեն նաեւ մտավախություն ունեք, որ հաճախ քվորում ապահովել չի ստացվի:
Իհարկե, նման դեպքեր կարող են լինել: Դրա վառ օրինակը. ընդամենը մի քանի օր առաջ մեկ նիստ տապալվեց Ազգային Ժողովում իշխող խմբակցության պատգամավորների պատճառով, հետո, բարեբախտաբար, քվորում ապահովվեց:
-Թեկուզ մասնավոր զրույցներում կառավարության կառուցվածքի հետ կապված քննարկումներ, խոսակցություններ եղե՞լ են «Լուսավոր Հայաստանի» հետ:
-Չէ, դեռ քննարկումներ չեն եղել: Մեզ համար բացարձակ կարեւոր չէ, թե տվյալ քաղաքական ուժը ընդդիմադիր դաշտում է, թե իշխանական: Եթե կան լավ նախաձեռնություններ, որոնք հավակնում են իսկապես պիտանի լինել հանրային շահին, պիտանի լինել իրավական գործընթացներին, ապա մենք կողմ ենք դրան. կապ չունի՝ ով է դրա հեղինակը:
-Այսինքն` հնարավո՞ր է, որ աջակցեք «Լուսավոր Հայաստանին»:
-Այո, իհարկե, հնարավոր է, բայց չի բացառվում, որ առանձին դրույթների վերաբերյալ լինեն անհամաձայնություններ: Դրա համար, քանի դեռ խմբակցությունում չի քննակվել, խնդրում եմ իմ ասածը չընդունել որպես խմբակցության դիրքորոշում: Կլինի քննարկում, մենք բոլոր հարցերի վերաբերյալ խորը, հանգամանալից պատասխաններով հանդես կգանք:
-Պարո՛ն Պետրոսյան, ԲՀԿ-ն էլ իր ծրագիրը կներկայացնի՞ կառավարության կառուցվածքի վերաբերյալ:
-Իհարկե: Հնարավոր է նման բան: Մենք, կարող է, կոնկրետ ինչ-որ սխեմա չներկայացնենք, բայց հիմնական, մեր կարծիքով խոցելի համարվող դրույթների վերաբերյալ հանդես կգանք մեկնաբանություններով, առանձին ասելիքով:
-Քննարկման ժամանակ վրդովվեցիք՝ ասելով, որ եթե մի նախարարությունում լավ չեն աշխատում, պարտադիր չէ դա փակել: Ինչքանո՞վ է կարեւոր հենց նախարարության կարգավիճակ ունենալը:
-Ես ոչ թե պայքարում եմ, որ անպայման այսինչը լինի նախարարության կարգավիճակով, ոչ, թող չլինի այդ կարգավիճակով, թող լինի պետական կոմիտեի կարգի, բայց կարեւոր է, որ այն ղեկավարեն իրազեկ, տեղյակ մարդիկ, ոչ թե ոլորտի հետ կապ, մազաչափ անգամ առնչություն չունեցող կադրերը, որոնք ոչ միայն ոլորտի խնդիրները չեն լուծի, այլ իրենց ներկայությամբ կավելացնեն դրանք:

Զրուցեց ԼՈՒՍԻՆԵ ՄԻՆԱՍՅԱՆԸ

ԵՐԲ ՊԱՇՏՊԱՆՈՒՄ ԵՆ ԿՈՌՈՒՊՑԻԱՅԻ ՀԱՄԱՐ ՄԵՂԱԴՐՎՈՂԻՆ

Երեկ Գյումրու թիվ 37 դպրոցի աշակերտները դասադուլ են հայատարարել` ի պաշտպանություն դպրոցի տնօրենԱստղիկ Ավետիսյանի: Այդ դասադուլը, սակայն, կազմակերպվել էր` ի պաշտպանություն մի տնօրենի, որն անցնում է կոռուպցիոն սկանդալի կապակցությամբ հարուցված քրեական գործով, որի անունը հայտնի դարձավ 2017թ. ԱԺ ընտրությունների թոհուբոհում` որպես ՀՀԿ-ի օգտին իր պաշտոնեական լծակներն օգտագործող պաշտոնյա: Եւ, ահա, Ավետիսյանն իր դեմ քրեական գործի հարուցումից հետո աշխատանքից ազատման դիմում է գրել:
Հիշում եք, դեռ նախորդ ամիս Շիրակի մարզի դատախազությունում հարուցվել է քրեական գործ «Գյումրու թիվ 37 հիմնական դպրոց» ՊՈԱԿ-ում թույլ տրված չարաշահումների դեպքի առթիվ։
Ըստ շրջանառվող լուրերի` Աստղիկ Ավետիսյանը վախեցել է ձերբակալումից. դա է դարձել պատճառ, որ վերջինս աշխատանքից ազատման դիմում է գրել: Դպրոցի տնօրենը մտավախություն է ունեցել, որ արժանանալու է Գյումրու թիվ 27 դպրոցի տնօրեն Կարինե Լազարյանի ճակատագրին, որը չարաշահումների պատճառով օրեր առաջ կալանավորվել է:
Բողոքի ակցիան կազմակերպել են ծնողական ու ուսուցչական այն հանրույթի ներկայացուցիչները, որոնք սակայն, Աստղիկ Ավետիսյանի կողմնակիցներն են: Նրանք ստիպել են բողոքի ակցիային մասնակցել նաեւ այն աշակերտներին ու ծնողներին, որոնք որեւէ շահագրգռվածություն չեն ունեցել: Բողոքի ակցիայի մասնակիցների պահանջն էլ մեկն է եղել՝ իրենց տնօրենին հանգիստ թողնել ու թույլ տալ աշխատել: «Դասի կեսից աշակերտները սկսեցին դուրս գալ: Երբ հարցնում էի` ինչու են դուրս գալիս, աշակերտներն ասում էին` չգիտենք: Մի քանիսը երեւի կազմակերպել էին, մնացյալը ընդհանրապես տեղյակ չէին: Հիմա աշակերտները պահանջում են տնօրենի հետվերադարձը, այսինքն` դիմումի մերժումը»,-ասել է դպրոցի ուսուցչուհի Գայանե Մարտիրոսյանը:
Ծավալված դեպքերի վերաբերյալ Շիրակի մարզպետարանի կրթության, մշակույթի եւ սպորտի բաժնի պետ Հրայր Կարապետյանը կարծիք է հայտնել ու տեղեկացրել, որ ինքն էլ է փորձել կապ հաստատել դպրոցի տնօրենի հետ, բայց չի ստացվել: «Անորոշություն է տիրում. փորձում ենք կապ հաստատել, տնօրենը չի պատասխանում: Դժգոհություն չեմ նկատել, դիմումը մակագրված չէ, ըստ իմ տեղեկությունների` դպրոցի տնօրենը շարունակում է պաշտոնավարել»,- ասել է Շիրակի մարզպետարանի կրթության սպորտի եւ մշակույթի վարչության պետ Հրայր Կարապետյանը:
Նշենք, որ Աստղիկ Ավետիսյանը Գյումրու թիվ 31 ընտրատարածքի նախագահ նախկին ՀՅԴ-ական, հետո ՀՀԿ-ին հավատարմության երդում տված Արտակ Ավետիսյանի կինն է: Արտակ Ավետիսյանն էլ մտերիմ հարաբերությունների մեջ է ԱԺ նախկին պատգամավոր Արման Սահակյանի հետ:

ՀԵՂԻՆԵ ՄԱՆՈՒԿՅԱՆ
Շիրակ

ՄԱՍՆԱԳԵՏ՝ ՖԻՆԱՆՍԱԿԱՆ ՀԱՄԱԿԱՐԳԸ ԲԱՐԵԼԱՎԵԼՈՒ ՀԱՄԱՐ

Օրեր առաջ Հայաստանի պետական տնտեսագիտական համալսարանի ռեկտորի պաշտոնակատար Ռուբեն Հայրապետյանի հրամանով` տնտեսագետ, «Փարվանյան Քոնսալթինգ» ընկերության գլխավոր տնօրեն Մհեր Փարվանյանը նշանակվել է ֆինանսական տնօրեն: Տեղեկացնենք, որ ըստ Mamul.am էլեկտրոնային կայքէջում Մհեր Փարվանյանի մասին տեղադրված տվյալների` նրա ցուցմունքով երկրորդ անգամ կալանավորվել եւ իր մահկանացուն կնքել է հանրահայտ «հաց բերողը»` Արթուր Սարգսյանը:

«Ժողովուրդ» օրաթերթը կապ հաստատեց ռեկտորի ժամանակավոր պաշտոնակատար Ռուբեն Հայրապետյանի հետ եւ հետաքրքրվեց, թե ինչու է հենց Մհեր Փարվանյանին նշանակել այս պաշտոնին:
-Պարո՛ն Հայրապետյան, ինչո՞ւ եք Մհեր Փարվանյանին նշանակել համալսարանի ֆինանսական գծով տնօրենի պաշտոնին: Կարդացե՞լ եք, թե ինչ է գրված մամուլում նրա մասին: Ռիսկեր չե՞ք տեսնում:
-Մհեր Փարվանյանին այստեղ բերել ենք իր մասնագիտական կարողությունների համար: Որեւէ այլ բան չկա: Այդ տհաճ տեղեկությունները ես կարդացել եմ, բայց դա չի այս պահին էական: Մենք ունենք ֆինանսական համակարգի բարելավման լուրջ անհրաժեշտություն, որի հետ կապված մասնագետի ենք հրավիրել: Միակ նպատակը արդյունավետությունը բարձրացնելն է. եթե կա ռիսկ, եւ եթե կան խոչընդոտներ, բնականաբար, դրանք ամեն տեղ էլ լինում են:
-Մինչեւ նրան այդ պաշտոնին նշանակելը չե՞ք ուսումնասիրել այդ տեղեկությունները. գուցե դրանք իրականությանը համապատասխանում են:
-Հիմա ապրում ենք այնպիսի ժամանակներում, որ ամեն տեսակ գրածին եթե ուշադրություն դարձնենք… իմ մասին էլ են գրում (ծիծաղում է- հեղ.), ես է՞լ հրաժարական տամ: Ինքս, զոհ լինելով տարատեսակ շշուկների, բանսարկությունների, չեմ կարող դրա հիմքով որոշում կայացնել, հասկանո՞ւմ եք:
-Մյուս կողմից` Տիգրան Մնացականյանը (ՀՀ վիճակագրական կոմիտեի ղեկավար Ստեփան Մնացականյանի որդին), որն ասիստենտ է, նշանակվել է ՀՊՏՀ գիտության եւ արտաքին կապերի գծով պրոռեկտոր:
-Ինքը գիտությունների թեկնածու է: Մնացականյանը գիտական աստիճան ունի, այստեղ խնդիր չկա:

Զրուցեց ՍՅՈՒՆԷ ՀԱՄԲԱՐՁՈՒՄՅԱՆԸ