ՔՈՉԱՐՅԱՆԻ ԳՈՐԾԻ «ՔԱՎՈՐԸ» ՆԻԿՈԼ ՓԱՇԻՆՅԱՆՆ Է

Հանրապետական կուսակցության փոխնախագահ Արմեն Աշոտյանի հետ «Ժողովուրդ» օրաթերթը զրուցել է Հայաստանում կատարվող իրադարձությունների, ինչպես նաեւ ՀՀԿ-ի եւ իշխանությունների հնարավոր համագործակցության մասին:

-Պարո՛ն Աշոտյան, մամուլում տեղեկություններ են շրջանառվում, որ ՀՀԿ-ն համագործակցության եզրեր է փնտրում իշխանությունների հետ: Որքանո՞վ են իրատեսական այդ տեղեկությունները:
-Ես մամուլում չեմ հանդիպել տեղեկություն, թե ՀՀԿ-ն համագործակցության եզրեր է փնտրում գործող իշխանությունների հետ: Հանրապետականը, ըստ նույն «Գելափ ինտերնեյշնլի» վերջին հարցման, մեր հասարակության կողմից դիտվում է թիվ մեկ ընդդիմադիր ուժը, այդպես կա, այդպես եղել է, ու այդպես էլ ընկալում է մեզ մեր հասարակությունը: Թեպետ որեւէ վատ բան, բացասարական բան, այսպես ասած, համագործակցության մեջ ես չեմ տեսնում, եթե խնդիրը վերաբերում է համազգային, համապետական կարեւորագույն հարցերին: Սա ակնհայտ ճշմարտություն է, մեր քննադատությունը երբեք ինքնանպատակ չի, ու եթե այստեղ իշխանությունը ականջալուր լիներ, այսքան մեծամիտ ու ինքնասիրահարված չլիներ, մեր քննադատությունը կարող էր ընկալել` որպես համագործակցության դրսեւորում, որովհետեւ այդ քննադատության իմաստը նախ եւ առաջ մատնանշելն էր սխալներ, կանխատեսել զարգացումներ, խորհուրդ տալ եւ կանխել բացասական հետեւանքներ` այս կամ այն որոշման հետ կապված:
-Դուք ժամանակին ականջալուր եղե՞լ եք ընդդիմությանը, երբ իշխանություն էիք:
-Իհարկե, լսել ենք, գուցե ոչ այն չափով, որ կարող էինք ասել` ամբողջությամբ եվրոպական մշակույթը մեզանում արմատավորվել է, բայց այն ինչ-որ կատարվում է այսօր Հայաստանի քաղաքական դաշտում, դա մեծ քայլ նահանջ է ներառական քաղաքականությունից, որովհետեւ ե՛ւ ԱԺ-ի այսօրվա կառուցվածքը, ե՛ւ ԱԺ-ում քաղաքական դրվածքները, ե՛ւ իշխանության գործադիր դրվածքի մեծամտական մոլուցքները, անհանդուրժողականությունը քննադատության նկատմամբ վկայում են այն մասին, որ ներառական, ժողովրդավարական քաղաքական որոշումների կայացման գործընթացը, որտեղ ընդդիմության ձայնը` խորհրդարանական, թե արտախորհրդարանական, լսելի է, մեզանում բացակայում է: Այն, ինչը մենք ունեինք, գուցե լավագույնը չէր, բայց այն, ինչ մենք ունենք այսօր, ավելի վատն է քաղաքական մշակույթի տեսանկյունից, քան նախկինում էր: Կան հարցեր, որտեղ, իհարկե, մենք` որպես Հայաստանի մտահոգ, շահագրգիռ քաղաքացիներ եւ քաղաքական ուժ, պատրաստ ենք որոշակի քաղաքական աջակցություն ցույց տալ այն ոլորտներում, որտեղ ավելի ենք տեղյակ, որ կուտակել ենք մեր իշխանության տարիներին: Սա պետականասիրության հետեւանք է:
-Եթե համագործակցություն չկա գործող իշխանությունների հետ, ապա ինչպե՞ս կբացատրեք ԱԺ նախագահ Արարատ Միրզոյանի հետ Ձեր հանդիպումը: Համագործակցության եզրեր չե՞ք փնտրել:
-Եթե շատ գլոբալ վերցնենք, հանուն ՀՀ-ի շահերի` խորհրդարանական դիվանագիտության եւ արտաքին հարաբերությունների հետ կապված հարցերում, այո, ոչ թե համագործակցության, այլ աջակցելու, որովհետեւ գործ ունենք մեր բոլորիս պետության հետ:
-Իսկ փակագծեր չե՞ք բացելու, թե, ի վերջո, ինչ եք խոսել ԱԺ նախագահի հետ:
-Փակագծեր չեմ բացելու. ես ասել եմ, որ եղել է իմ նախաձեռնությամբ, ինձ մոտ կուտակված որոշակի ինֆորմացիայի փոխանակման համար, եւ ես գոհ եմ եղել ե՛ւ ընթացքից, ե՛ւ արդյունքներից: Մեզանում, գիտեք, վատը ո՞րն է. հանդիպումները շատ սկանդալային եւ սենսացիոն են ընկալվում: Իրականում իշխանության փոխանցումը Հայաստանում գլխից գլուխ, այսպես ասած, տեղի չի ունեցել, այն անցել է ձեռքից ձեռք, հետեւաբար պետության ժառանգականության ինստիտուցիոնալ հիշողության, պետականության շարունակականության, անկախ օրվա իշխանություններից, խնդիրը լուծված չէ, ոչ բոլոր ոլորտներում է լուծված:
-ՀՅԴ Գերագույն մարմնի անդամ Տարոն Տոնոյանը մեզ հետ զրույցում հայտարարել էր, որ ով փորձի հետհեղափոխական քայլեր անել, տապալվելու է: Համամի՞տ եք Ձեր նախկին «դաշնակիցների» հայտարարության հետ:
-Ես չեմ մեկնաբանում այս պարագայում առանձին քաղաքական ուժերի, առանձին ներկայացուցիչների հայտարարությունը. դա անհատական է, թե կուսակցական, իրենք թող որոշեն: Բոլոր դեպքերում, մենք ՀՅԴ-ի հետ ունեցել ենք ե՛ւ ընդհանրություններ, ե՛ւ տարաձայնություններ, ու, բնականաբար, դրանք գոյություն ունեն նաեւ այսօր:
-Իսկ ՀՀԿ-ն ի՞նչ դիրքորոշում ունի` ՀՀ երկրորդ նախագահ Ռոբերտ Քոչարյանին կալանավորումից ազատելու հետ կապված, արդյոք ՀՀԿ-ն համակարծի՞ք է, որ Ռ. Քոչարյանը ազատության մեջ լինի:
-Գիտեք, Հանրապետական կուսակցության քաղաքական գնահատականները հնչել են անմիջապես Ռ. Քոչարյանին կալանավորելուց հետո, այդ հայտարարությունները կրկնվել են նաեւ իրադարձություններին համահունչ: Մենք շեշտել ենք, որ սա բացառապես քաղաքական հողի վրա իրականացվող հետապնդում է:
-Ո՞ւմ կողմից է հետապնդում իրականացվում:
-Սա Նիկոլ Փաշինյանի ղեկավարությամբ իրականացվող, քաղաքական հողի վրա հետապնդում է մի մարդու, որի քաղաքական հայացքների եւ ժամանակին, այսպես ասած, տարբեր ճամբարներում, բարիկադների տարբեր կողմերում լինելու հետեւանքով այսօրվա վարչապետը որեւէ կերպ չի մարսել: Ցավոք, դա անում է` քողարկվելով 10 զոհերի արյամբ, ցավոք, դա արվում է` կանգնելով Մարտի 1-ի զոհերի գերեզմանաքարերի վրա, այսինքն` որպես պատվանդան օգտագործելով: Եթե մի քիչ անաչառ հայացքով նայեք, այսպես կոչված, գործին, պետք է տեսնել, որ գործը ոտքից գլուխ զավեշտ է, որովհետեւ նախ եւ առաջ 10 զոհերի մահվան հանգամանքները չեն բացահայտվում այս հարուցված գործով: Պարզվում է` դատավարության ընթացքում որոշակի նյութեր մեղադրող կողմը չի ներառել, չի ընդգրկել համապատասխան գործի մեջ, ու դա բացահայտեցին այս օրերին Քոչարյանի դատապաշտպանները: Ակնհայտ է, որ այս պրոցեսը բացառապես քաղաքական է, ինձ դժվար է մեղադրել քոչարյանական լինելու մեջ, ես ունեմ առանձին քաղաքական թիմ: Բայց լռել այն ժամանակ, երբ երկրումդ, թողած բազմաթիվ այլ ներքին եւ արտաքին լրջագույն խնդիրներ, հարուցել են նման քրեական գործ, լուրջ չի:
-Մարտի 1-ի բացահայտումը լրջագույն գործ չէ՞:
-Ռոբերտ Քոչարյանի դեմ հարուցված գործը կապ չունի Մարտի 1-ի բացահայտման հետ: Ակնհայտ է, որ այս գործը բացարձակ կապ չունի Մարտի 1-ի զոհերի հետ. այս գործը զավեշտալի է: Քոչարյանի գործը լակմուսային թուղթ է` հասկանալու համար, թե ով ով է. մարդ կարող է չկիսել դիմացինի քաղաքական հայացքները: Նիկոլ Փաշինյանը այնքան ոխերիմ ու չարամիտ պետք է լինի, որ չների այն մարդկանց, ովքեր Քոչարյանի դեմ իրականացվող ապօրինություններին դեմ քայլեր կձեռնարկեն:
-Դուք կարծում եք, որ Ն. Փաշինյանը դատավարության ընթացքը «թելադրո՞ւմ» է:
-Նիկոլ Փաշինյանն այս գործի քավորն է. դրա մասին են վկայում հայտնի ձայնագրության հայտնի դրվագները, որոնք այդպես էլ չհերքվեցին: Փաստը մնում է փաստ, ես նորից պնդում եմ, որ Ռոբերտ Քոչարյանի դեմ հարուցված գործը հակաօրինական է, հակասահմանադրական է, ու քավորը Նիկոլ Փաշինյանն է:
Հարցազրույցն ամբողջությամբ`
Armlur.am կայքում

Զրուցեց ՍՈՆԱ ԳՐԻԳՈՐՅԱՆԸ

ԴԻՄՈՒՄ ԲԴԽ
ՀՀ սահմանադրական կարգը տապալելու համար մեղադրվող Ռոբերտ Քոչարյանի փաստաբաններից Հայկ Ալումյանը հայտնել էր, թե ԲԴԽ-ն փաստել է` դատավոր Դավիթ Գրիգորյանը Քոչարյանի հետ կապված մի ընթացակարգում օրենք է խախտել, եւ իրենք դեռ պետք է քննարկեն` արդյոք սա հիմք է ինքնաբացարկի միջնորդության համար, թե ոչ: Ինչպես հայտնի է, գործի նախաքննության ընթացքում դեռ Ռոբերտ Քոչարյանի խափանման միջոցի վերաբերյալ միջնորդությունը հունվարի 11-ին մակագրվել է դատավոր Դավիթ Գրիգորյանին: Դատավոր Գրիգորյանը, սակայն, հրաժարվել է գործը քննել` պատճառաբանելով, որ իրեն գործը մակագրել են այն ժամանակ, երբ ինքը չի հերթապահել: Այս արարքի համար դատավորը կարգապահական պատասխանատվության ենթարկվեց, ուստի չի բացառվում, որ պաշտպանական կողմը, հաշվի առնելով կատարվածը, կրկին բարձրացնի դատավորի ինքնաբացարկի հարցը: «Ժողովուրդ» օրաթերթին հայտնի դարձավ, որ Ռոբերտ Քոչարյանի պաշտպանները դիմել են ԲԴԽ` պահանջելով տրամադրել դատավոր Գրիգորյանին հայտարարված նախազգուշացում հայտարարելու հիմքը, որպեսզի իրենք էլ որոշեն անելիքները:

ԿԱՊԱՄՈՆՏԱԺԵՆ
Տեւական ժամանակ է` Երեւանում իրականացվում են ապօրինի շինությունների քանդման աշխատանքներ: «Ժողովուրդ» օրաթերթը տեղեկացավ, որ Գեղարքունիքի մարզի Ճամբարակ քաղաքում եւս առաջիկայում կիրականացվեն ապօրինի շինությունների ապամոնտաժման աշխատանքներ: Այս տեղեկությունը մեզ հետ զրույցում հաստատեց Ճամբարակի քաղաքապետ Վազգեն Ադամյանը: «Ժողովուրդ» օրաթերթի հարցին` ինչու նախկինում քաղաքապետարանը նման աշխատանքներ չի իրականացրել, Ադամյանն արձագանքեց. «Որովհետեւ փաստաթղթերը նոր ենք սկսել ուսումնասիրել. մինչեւ այդ կարիք չի եղել ուսումնասիրել: Հիմա որը ապօրինի է, կապամոնտաժենք, որն էլ օրինական է, կասենք` ուրախությամբ, ու կշարունակեն շինարարությունը»: Փաստորեն, ստացվում է, որ մինչ այս Ճամբարակում աջուձախ ապօրինի շինություններ են կառուցվել, իսկ քաղաքապետարանը չի վերահսկել: Հիմա նոր Հայաստանն է, եւ իրավիճակ է փոխվել:

ԱՍՈՒՄ Է` ՆՈՐՈՒԹՅՈՒՆ ԷՐ
ՀՀ ԱԱԾ-ում ՀՀ պետական տնտեսագիտական համալսարանի նախկին ռեկտոր Կորյուն Աթոյանի նկատմամբ քրեական գործ է հարուցվել` ՀՀ քրօր-ի 179 հոդվածի 3-րդ մասի 1-ին կետի հատկանիշներով: Ըստ այդ տեղեկությունների` 2011-2018 թվականներին Աթոյանը, պաշտոնական դիրքն օգտագործելով, վատնել է իրեն վստահված առանձապես խոշոր չափի գումար: Ըստ «Shamshyan.com»-ի` գումարի չափը կազմում է 350-400 մլն դրամ: «Ժողովուրդ» օրաթերթը մեկնաբանությունների համար զանգահարեց Աթոյանին, սակայն հեռախոսը պատասխանեց հարազատներից մեկը, ասաց, որ ինքն իրավասություն չունի նրա փոխարեն որեւէ պատասխան տալ: Բայց, չնայած սրան, վստահեցրեց, որ Աթոյանը քննչական գործողություններին չի մասնակցում, եւ այս տեղեկությունը իրենց համար նորություն էր: