Երեկ հայրենի խորհրդարանը 114 կողմ, 1 դեմ, 1 ձեռնպահ ձայների հարաբերակցությամբ ամբողջությամբ ընդունեց ԱԺ «Իմ քայլը» խմբակցության պատգամավոր Արթուր Հովհաննիսյանի կողմից ներկայացված «Գովազդի մասին» ՀՀ օրենքում փոփոխություն կատարելու մասին նախագիծը։ Այսինքն` սա ենթադրում է, որ այսուհետ ցանկացած տեսակի գովազդ արգելվում է տեղադրել Երեւան քաղաքի ընդհանուր օգտագործման տարածքներում, հենասյուներին, էլեկտրասյուներին, ծառաբներին, քաղաքային կահավորանքներին, ցանկացած այլ հանրային վայրերում։ Ըստ օրենքում առկա պահանջների` այս ամենից զատ` գովազդները կարելի է տեղադրել բազմաբնակարան բնակելի շենքերում եւ Երեւան քաղաքի վարչական սահմաններում այդ նպատակով տեղադրված հայտարարությունների համար նախատեսված վահանակների, համայնքի ղեկավարի կողմից թույլատրված եւ համայնքի ավագանու կողմից սահմանված գոտիներում։ Մեկ ամիս հետո օրենքն արդեն գործելու է:
«Ժողովուրդ» օրաթերթը բազմիցս գրել է, որ հայրենի իշխանությունները «Սպառողական կրեդիտավորման մասին» օրենքով էլ նպատակ ունեն ԶԼՄ-ների ֆինանսական օրինական հոսքերից մեկը կտրել: Եւ այսպես, ԱԺ «Իմ քայլը» խմբակցության պատգամավորներ Արտակ Մանուկյանն ու Վարազդատ Կարապետյանը օրենքի փոփոխությամբ առաջարկում են արգելել սպառողական վարկերի գովազդը էլեկտրոնային լրատվամիջոցներում՝ բացառությամբ տվյալ կազմակերպության կայքէջի միջոցով եւ կազմակերպության սրահում: Իսկ գաղտնիք չէ, որ ԶԼՄ-ները այդ կազմակերպությունների գովազդներով են իրենց թափանցիկ ֆինանսական հոսքերն ապահովում: Թե ինչու են իմքայլականները որոշել նման քայլի դիմել, արդեն տեւական ժամանակ է՝ փորձում է օրենքի նախագծի հեղինակներից պարզել: Սակայն Արտակ Մանուկյանը կտրականապես հրաժարվում է օրենքի նախագիծը մեկնաբանելուց: Երեկ «Ժողովուրդ» օրաթերթին հաջողվել է զրուցել ԱԺ «Իմ քայլը» խմբակցության պատգամավոր, «Սպառողական կրեդիտավորման մասին» օրենքի նախագծի հեղինակներից Վարազդատ Կարապետյանի հետ՝ պարզելու համար, թե ինչու են որոշել ԶԼՄ-ների դեմ օրենքով հանդես գալ:
-Պարո՛ն Կարապետյան, Ձեր կողմից հեղինակած «Սպառողական կրեդիտավորման մասին» օրենքի նախագիծը ի՞նչ փոփոխություններ է ենթադրում: Ի՞նչ եք ցանկանում փոխել օրենքում:
-Մեր օրինագիծն այժմ շրջանառության մեջ է դրված, ու այն մենք քննարկում ենք տարբեր խմբերի հետ, երեւի մի տասը անգամ այն քննարկել ենք վարկային կազմակերպությունների հետ, Կենտրոնական բանկի հետ եւ արդեն սկսել ենք քննարկել նաեւ լրատվամիջոցների հետ՝ հասկանալու համար հնարավոր ազդեցությունն իրենց վրա: Հիմա մենք լսում ենք լրատվամիջոցներին եւ հասկանում ենք, որ դա նաեւ էական եկամտի աղբյուր է լրատվամիջոցների համար, եւ այդ մասով եւս մենք պատրաստվում ենք վերանայել նախագիծը:
-Իսկ եթե նախագիծը վերանայելու եք, եւ Ձեզ անհանգստացրել են այն դժգոհությունները, որոնց մասին բարձրաձայնում են ԶԼՄ-ները, կա՞ արդեն կոնկրետ այդ փոփոխությունը, որը ցանկանում եք իրականացնել նախագծում: Ի՞նչն է փոխվելու օրենքի նախագծում, ո՞ր հատվածին է վերաբերելու ձեր վերանայումը:
-Մենք հիմա լսում ենք լրատվամիջոցներից եկող առաջարկները, եւ որ տարբերակը, որը խելամիտ կհամարվի… Այսինքն՝ մեզ համար կարեւոր է, որ չխաբեն մարդկանց այդ կազմակերպությունները գովազդի միջոցով, եւ ինչպիսին կլինի սահմանափակումը, ապա սա քննարկումների միջոցով, նաեւ լրատվամիջոցների հետ քննարկումների միջոցով կգանք ընդհանուր եզրակացության:
-Դուք ի՞նչ տեղեկություններ եք հավաքագրել՝ այդ խաբող կազմակերպությունների հետ կապված, ի՞նչն է Ձեզ մտահոգել է, որ որոշել եք օրենքում փոփոխություններ կատարել: Ի՞նչ տվյալներ են Ձեզ հայտնի, խնդրում եմ, նշե՛ք:
-Մեր խնդիրը, երբ որ մենք խոսում էինք գովազդից, հեռուստատեսային գովազդը դրա շատ փոքր մասն է, Դուք դուրս եկեք քաղաք ու տեսեք, թե ինչ է կատարվում սյուների վրա , մուտքերի մոտ եւ այլն: Այսինքն՝ մենք ընդհանրապես երեւույթն ենք ուզում արգելել, բայց մենք արդեն ունենք օրենքը այդ մասով, այն մեր գործընկերն էր առաջարկել, որն ընդունվեց խորհրդարանի կողմից: Սա փակում է այդ սյուների թեման, սա է պատճառը, որ մենք ընդհանուր հեռուստատեսությամբ, ռադիոյով, օնլայն մամուլով գովազդի արգելման այդ տարբերակը հիմա սկսել ենք քննարկել: Ինչպիսի սահմանափակում թողենք կամ ընդհանրապես սահմանափակում թողենք, թե ուղղակի ասենք, որ միայն մենք կհետեւենք անբարեխիղճ հայտարարություններին, քաղաքացուն մոլորության մեջ գցողներին ու թողնենք Կենտրոնական բանկի վրա վերահսկողության գործառույթը:
-ԶԼՄ-ները բարձրաձայնել են, որ այդ գովազդը իրենց ֆինանսական աղբյուրն է…
-Այո, մենք դա հասկացել ենք ու ընդունել ենք, ԶԼՄ-ները իրականում պետք է կարողանան եկամուտի անկախ աղբյուրներ ունենալ, որպեսզի իրենք էլ անկախ լինեն, սա է պատճառը, որ մենք այս դրույթը միանշանակ կվերանայենք:
-Իսկ ինչո՞ւ մինչեւ օրենքի շրջանառությունը ԶԼՄ-ներին չեք լսել՝ հասկանալու այն խնդիրները, որոնք առկա են, որպեսզի այժմ նման հարցի առջեւ չկանգնեիք:
-Մեր աշխատանքը հետեւյալն է. մենք նախագիծը դնում ենք շրջանառության մեջ, սկզբում քննարկել ենք թիրախային ներկայացուցիչների հետ, հետո քննարկում ենք այլ ազդեցությունները, եւ ԶԼՄ-ները այլ ազդեցությունում են, ու մենք հիմա այդ փուլում ենք: Մենք լսել ենք ու հասկացել ենք, ես անձամբ հասկացել եմ, թե խնդիրն ինչումն է, հետեւաբար նախագիծը այն տեսքով, որը դրված է խորհրդարանի կայքում, այդ նույն տեսքով չի ներկայացվելու հանձնաժողովին:
ՎԵԹԹԻՆԳԻ ՄԵԽԱՆԻԶՄՆԵՐԻՑ ԳՈՀ ՉԵՆ
Երեկ, ի վերջո, խորհրդարանի ամբիոնին հասավ «Հայաստանի Հանրապետության դատական օրենսգիրք» սահմանադրական օրենքում փոփոխություններ եւ լրացումներ կատարելու մասին եւ հարակից օրենքների նախագծերի փաթեթը: Այն ավելի շատ հայտնի է վեթթինգի նախագիծ անունով եւ քննարկվեց ու երկրորդ ընթերցմամբ ընդունվեց:
«Ժողովուրդ» օրաթերթի՝ իշխանություներին մոտ կանգնած աղբյուրները փոխանցում են, որ այդքան էլ իշխանական խմբակցության ներսում համակարծիք չեն եղել օրենքում արված փոփոխությունների հետ, բայց քանի որ օրենքի նախագիծը խորհրդարան է ուղարկել հայրենի կառավարությունը, այն պետք էր ընդունել եւ վերջ: ՀՀ արդարադատության նախարար Ռուստամ Բադասյանը ներկայացրեց այն փոփոխությունները, որոնք իրենք իրականացրել են նախագծում՝ երկրորդ ընթերցմանը ներկայացնելու համար: Իշխանությունների կարծիքով՝ Կոռուպցիայի կանխարգելման հանձնաժողովը կարող է իրեն տրված լիազորությունների շրջանակներում դատավորներին վեթթինգի ենթարկել, ինչի համար էլ այդ նախագիծը համարում են լավը: Բայց, արի ու տես, Կոռուպցիայի կանխարգելման հանձնաժողովը, որը ստեղծվել է ամիսներ առաջ, այդքան էլ լիազորություն չունի, ընդամենը պաշտոնյան պետք է իր հայտարարագիրը ներկայացնի հանձնաժողովին, որը մինչեւ այսօր, տեխնիկական խնդիրներից ելնելով, չի ներկայացվում: Երեկ ԱԺ «Լուսավոր Հայաստան» խմբակցության ղեկավար Էդմոն Մարուքյանը հայտարարեց, որ, փաստորեն, փաթեթն ընդունվում է այնպես, որ 2017 թվականից հետո նշանակված դատավորների հետ կապված կարող է լինել գործընթաց, իսկ մինչեւ 2017 թվականին նշանակվածների նկատմամբ որեւէ բան չի կարող լինել: Չգիտես ինչու, Բադասյանը որոշել է վեթթինգ անցկացնել մինչեւ այդ թվականը:
Իշխանական մի հատվածի կարծիքով՝ դատավորների հետ կապված խնդիրները վերջնական կլուծվեն անցումային արդարադատության նախագծի միջոցով, որը եւս այս պահին մշակում է ՀՀ արդարադատության նախարարությունը, ու, շատերի կարծիքով, այն կփոխլացնի այս օրենքը: Թե իրականում այս ամենն ինչ արդյունք կտա, դժվար է ասել, քանի որ փորձը ցույց է տվել, որ հայրենի իշխանության ներկայացուցիչները նախագիծ են մշակում, ընդունում, հետո հասկանում, որ դեռ բաներ կային նախագծում ավելացնելու, ու կրկին լծվում են փոփոխություններ իրականացնելու բարդ գործին:
Նյութերը՝ ՍՈՆԱ ԳՐԻԳՈՐՅԱՆԻ
ՓՈԽՆԱԽԱՐԱՐԸ՝ ՏՈՒԺՈՂ
Մարտի 24-ին լրացավ ՀՀ կրթության, գիտության, մշակույթի եւ սպորտի նախարարի նախկին տեղակալ Արեւիկ Անափիոսյանի բնակարանի գողության դեպքի երկու ամիսը է, սակայն ո՛չ ենթադրյալ հանցագործներն են հայտնաբերվել, ո՛չ էլ գողոնը: «Ժողովուրդ» օրաթերթի տեղեկություններով՝ միայն ՀՀ քննչական կոմիտեի Արաբկիրի քննչական վարչությունը հարցաքննության է հրավիրվել ՀՀ կրթության, գիտության, մշակույթի եւ սպորտի նախարարի նախկին տեղակալ Արեւիկ Անափիոսյանին եւ նրան տուժող ճանաչել: Ավելին՝ նախաքննական մարմինը արձանագրել է, որ գողությունը կատարվել է այն ժամանակ, երբ նախկին փոխնախարարը գործուղման է եղել, եւ դեռ ավելին՝ վերջինիս բնակարան են մտել տան պատշգամբից: Բանն այն է, որ բանակարանը գտնվել է առաջին հարկում, եւ ենթադրյալ հանցագործները այդ ճանապարհն են ընտրել բնակարան մտնելու համար: Հիշեցնենք, որ ժամը 11։30-ի սահմաններում ոստիկանության Երեւան քաղաքի վարչության օպերատիվ կառավարման կենտրոն ահազանգ էր ստացվել, որ հունվարի 19-ի ժամը 03։20-ից մինչեւ հունվարի 23-ի ժամը 10։00-ն ընկած ժամանակահատվածում անհայտ անձը կամ անձինք տեխնիկական միջոցների գործադրմամբ կոտրել են Գյուլբենկյան փողոցի շենքերից մեկի պատշգամբի ճաղավանդակը, մտել տուն եւ բնակարանից հափշտակել ոսկյա եւ բրենդային կանացի ժամացույցներ, ոսկյա զարդեր եւ գումար։ Եվ փաստի առթիվ Արաբկիրի քննչական բաժնում գողության հատկանիշներով հարուցվել էր քրեական գործ:
ՈՒՇԱՑՐԵԼ Է
ՀՀԿ-ական նախկին պատգամավոր Արայիկ Գրիգորյանին պատկանող ընկերության նկատմամբ վարչական վարույթ է հարուցվել։ «Ժողովուրդ» օրաթերթը տեղեկացավ, որ վարչական վարույթ հարուցող մարմինը ՀՀ տնտեսական մրցակցության պաշտպանության պետական հանձնաժողովն է։ Պարզվում է, որ «Ավշարի գինու գործարան» ընկերության կողմից խախտվել է «Տնտեսական մրցակցության պաշտպանության մասին» օրենքը։ Բանն այն է, որ հանձնաժողովը կոնյակի շրջանառության ոլորտում իրականացվող ուսումնասիրության շրջանակներում դիմել է ընկերությանը` գրությունը ստանալուն հաջորդող օրվանից հաշված 10 աշխատանքային օրվա ընթացքում ուսումնասիրության համար անհրաժեշտ տեղեկատվություն ներկայացնելու պահանջով: «Ժողովուրդ» օրաթերթը տեղեկացավ, որ ընկերությունն այն ստացել է 2019 թվականի օգոստոսի 21-ին, որից հետո պարտավոր էր գրությամբ սահմանված տեղեկատվությունը ներկայացնել մինչեւ սեպտեմբերի 4-ը ներառյալ: Սակայն գրությամբ պահանջված տեղեկատվությունն ընկերությունը ներկայացրել է հոկտեմբերի 24-ին եւ ոչ ամբողջական: Որոշվել է ընկերության նկատմամբ հարուցել վարչական վարույթ։
.gif)
